នៅពេលគេចង់បញ្ជាក់សភាពលក្ខណៈរបស់នាម គេប្រើគុណនាម។ គុណនាមមានច្រើនប្រភេទដូចជា៖
១. គុណនាមប្រក្រតី
គុណនាមប្រក្រតី គឺជាគុណនាមដែលបញ្ជាក់លក្ខណៈធម្មតារ។ គុណនាមប្រក្រតីមានដូចជា៖ ល្អ កខ្វក់ ខ្មៅ ស វែង ខ្លី សម្បូរ ខ្សត់ តូច ធំ មូល ជ្រុង ស្រួច ទា ធាត់ ស្គម ខ្លាំង ខ្សោយ ថ្លៃ ថោក សាប ប្រៃ ជូរ ល្វីង ស្រាល ធ្ងន់...។ ឧទាហរណ៍៖
- អារម្មណ៍ល្អរៀនសូត្រចេះចាំល្អ។
- ទឹកកខ្វក់នាំឱ្យប៉ះពាល់សុខភាព។
- គោខ្មៅធាត់ជាងគោស។
២. គុណនាមចំនួន
គុណនាមចំនួន គឺជាគុណនាមសម្រាប់បញ្ជាក់លក្ខណៈចំនួនឱ្យនាម។ គុណនាមចំនួន ចែកជាពីរគឺ គុណនាមចំនួនរាប់ និងគុណនាមចំនួនរៀប។
ក. ចំនួនរាប់
១. ឪពុកខ្ញុំមានគោប្រាំនឹម។
២. ថ្ងៃនេះសុភាពដកសំណាបបានពីរដំបរ។
ចំនួនរាប់មានដូចជា៖ ប្រាំនឹម ពីរដំបរ ប្រាំរយ ពីរដណ្តប់ ប្រាំខាំ ពីរសែន ប្រាំម៉ឺន ប្រាំឡូ...។
ខ.ចំនួនរៀប
១. ដាណេរៀនថ្នាក់ទីប្រាំបី។
២. ខ្ញុំរៀនដល់មេរៀនទីបួន។
៣. ខ្ញុំភ្ញាក់ពីដំណេកនៅម៉ោងប្រាំ។
ចំនួនរៀបមានដូចជា៖ ប្រាំបី ទីបួន ម៉ោងប្រាំ ជាន់ទីមួយ ថ្នាក់ប្រាំបួន...។
៣. គុណនាមកម្មសិទ្ធិ
គុណនាមកម្មសិទ្ធិ គឺជាគុណនាមដែលប្រាប់ម្ចាស់កម្មសិទ្ធិនៃនាម។ គុណនាមកម្មសិទ្ធិមាន៖ ខ្ញុំ ឯង វា កាត់ នាង យើង ពួកគាត់ នាង យើង ពួកគាត់ គេទាំងអស់គ្នា...។
៤. គុណនាមចង្អុល
គុណនាមចង្អុល គឺជាគុណនាមមួយបែបដែលគេប្រើនៅខាងស្តាជាប់នាម ឬកន្សោមនាមសម្រាប់កំណត់នាម ឬកន្សោមនាមនោះ។ គុណនាមចង្អុលមានពីរគឺ៖ ទីជិត ទីឆ្ងាយ
- ទីជិត៖ នេះ នោះ...។
- ទីឆ្ងាយ៖ នោះ ណោះ...។
៥. គុណនាមសំណួរ
គុណនាមសំណួរ គឺជាគុណនាមសម្រាប់សួររកប្រភេទអ្វីមួយ ឬចំនួនប៉ុន្មានឱ្យនាម។ គុណនាមសំណួរមាន៖ អ្វី, អ្វីមួយ, អ្វីខ្លះ, ណាមួយ, ណាខ្លះ...។ ឧទាហរណ៍៖
- តើប្អូនរៀនថ្នាក់ទីប៉ុន្មាន?
- តើមិត្តទិញសៀវភៅអ្វីខ្លះ?
៦. គុណនាមមិនច្បាស់
គុណនាមមិនច្បាស់ គឺជាគុណនាមសម្រាប់បញ្ជាក់សេចក្តីមិនជាក់លាក់។ គុណនាមមិនច្បាស់មាន៖ អ្វី, ណា, អ្វីខ្លះ, មួយណា, ណាខ្លះ, ឯទៀត, ដទៃ, អ្វីមួយ...។
ឧទាហរណ៍៖
- ខ្ញុំមិនដឹងថាគាត់ត្រូវការសៀវភៅណាមួយទេ។
- ខ្ញុំមិនដឹងថាគាត់ទិញអ្វីខ្លះទេ។
គុណនាម គឺជាពាក្យសម្តីសម្រាប់សម្តែងលក្ខណៈរបស់នាម។ គុណនាមមានច្រើនប្រភេទ ហើយមានលក្ខណៈផ្សេងគ្នា។ គុណនាមដូចជា៖ គុណនាមប្រក្រតី គុណនាមចំនួន គុណកម្មសិទ្ធិ គុណនាមចង្អុល គុណនាមសំណួរ និង គុណនាមមិនច្បាស់។