ក្រឡាហោមគង់ ជាមន្រ្តីខ្មែរស្នេហាជាតិមួយរូប ដែលបានតស៊ូប្រឆាំងនឹងការគាបសង្កត់របស់អាណានិគមនិយមបារាំង។ បារាំងដឹងពីគោលជំហរ និងគំនិតរបស់លោកក៏បានរកមធ្យោបាយចាប់លោក។ លោកត្រូវពួកអាណានិគមនិយមបារាំងចាប់បាន និងយកទៅធ្វើទារុណកម្មដោយសម្ងាត់។ កប៉ាល់បារាំងបាននាំលោកឃ្លាតចេញពី វត្តឧណ្ណាលោម ឆ្ពោះទៅកាន់ទិសឧត្តរ។ នៅលើនាវា ដៃទាំងពីររបស់លោកត្រូវជាប់ខ្នោះចងផ្អោបនឹងបំពង់ផ្សែង។ ក្រឡាហោមគង់អង្គុយត្រមង់ត្រមោចម្នាក់ឯង ទឹកមុខក្រៀមក្រំជាពន្លឹក។ ប៉ុន្តែ ស្មារតីស្នេហាជាតិមាតុភូមិ ពុំបានធ្វើឱ្យលោកតក់ស្លុតឡើយ ទោះបីជាលោកបានដឹងខ្លួនច្បាស់ថាត្រូវទទួលមរណភាពដោយសារដៃឃាតករបារាំងក៏ដោយ។ នៅលើកប៉ាល់ក្រឡាហោមគង់ ដៃនិងជើងជាប់ច្រវាក់រើពុំរួច បានត្រឹមតែនិយាយតិចៗម្នាក់ឯង៖ “ឱទឹកដីខ្មែរ ពេលខ្ញុំរលត់សង្ខារទៅ តើអ្នកនឹងទៅជាយ៉ាងណា។ ឪពុកម្តាយបងប្អូនរួមលោហិត ប្រហែលជាមិនបានដឹងផងទេ។ នេះគឺជាការព្យាបាទរបស់ជាតិបរទេស សូមឱ្យកូនខ្មែរស្នេហាជាតិទាំងឡាយខិតខំតស៊ូទាមទារឯករាជ្យឱ្យបានជូនមាតុភូមិ”។
ការបាត់បង់វីរជនស្នេហាជាតិរូបនេះ ធ្វើឱ្យយើងសោកស្តាយអាណិតអាសូរក្រៃលែង។ គាត់បានបាត់បង់ជីវិតចាកឆ្ងាយពីយើងពិតមែន ប៉ុន្តែកិត្តិនាម និងវីរភាពរបស់លោកបានមកសណ្ឋិតនៅជាប់នឹងដួងព្រលឹងកូនខ្មែរជានិច្ច។