មេរៀនទី៣ (សង្ខេបមេរៀន) វេយ្យាករណ៍៖ សញ្ញាលាក់ ឬបេយ្យាលៈ (។ល។)

     សញ្ញាពិសេស​ ជាសញ្ញាដែលប្រើទាក់ទងនឹងឃ្លាល្បះនិងអត្ថបទ។ សញ្ញាពិសេសមានដូចជា សញ្ញាគូសមួយ(-) ដំពីរ(៖) ក្បៀសបើកបិទ(“.....”) វង់ក្រចកជ្រុង ឬតង្កៀប([ ]) សញ្ញាលាក់ ឬបេយ្យាលៈ(។ល។)។

     សញ្ញាលាក់ ឬបេយ្យាលៈ(។ល។) គេអាចប្រើដាក់នៅក្នុងល្បះ ឬខាងចុងល្បះ ឬក៏ចុងអត្ថបទ ហើយសម្គាល់ថា អ្វីៗដែលគេរៀបរាប់មិនទាន់អស់នៅមានតទៅ។
- ការស្រូបផ្សែងរបស់កុមារបណ្តាលឱ្យកុមារមានជំងឺដង្ហើម បន្ថយការលូតលាស់នៃសួត និងមានជំងឺហឺត មហារីកឈាម មហារីកខួរក្បាល។ល។ ដែលជាជំងឺពិបាកព្យាបាល។
- ថ្វីត្បិតតែផ្សារនេះតូចមែន ប៉ុន្តែខ្ញុំឃើញលក់គ្រឿងបរិភោគច្រើនមុខដូចជា ខាងបន្លែមានស្ពៃ សាលាដ ខាត់ណា ត្រកួន ផ្ទី ត្រយូងចេក។ល។ ខាងផ្លែឈើមានចេក ស្វាយ ដូង ខ្នុរ ឪឡឹក ចំណែកម្ហូបមានត្រី សាច់ជ្រូក មាន់ ទា សាច់គោ។ល។