ដើម្បីទាក់ទងគ្នា ឬដើម្បីសម្តែងគំនិតប្រាប់គ្នាទៅវិញទៅមក គេប្រើល្បះ ។ ល្បះ គឺជាបន្សំរវាងកន្សោមពាក្យនិងកន្សោមពាក្យ ហើយមានន័យគ្រប់គ្រាន់ស្តាប់បាន។ គេអាចនិយាយបានម្យ៉ាងទៀតថា ល្បះ គឺជាក្រុមពាក្យ ដែលមានន័យគ្រប់គ្រាន់ស្តាប់បាន។ ល្បះ មានបួនបែប គឺ៖
ក. ល្បះបញ្ជាក់
ល្បះបញ្ជាក់ គឺជាល្បះសម្រាប់ប្រើប្រាស់បញ្ជាក់ ឬបង្ហាញប្រាប់ព័ត៌មាន សកម្មភាពផ្សេងៗ តាមរយៈអ្នកនិយាយ ឬអ្នកសរសេរ ។ ល្បះបញ្ជាកបញ្ចប់ដោយសញ្ញាខណ្ឌ“។”។
ខ. ល្បះបញ្ជា
ល្បះបញ្ជា គឺជាល្បះសម្រាប់បង្គាប់បញ្ជា ធ្វើសំណើ សំណូមពរ ឱ្យដំបូន្មាន អង្វរ ...ឱ្យនរណាម្នាក់ធ្វើអ្វីមួយ ។ ល្បះបញ្ជា បញ្ចប់ដោយសញ្ញាខណ្ឌ“។” ឬសញ្ញា“!” ។
គ. ល្បះសំណួរ
ល្បះសំណួរ គឺជាល្បះសម្រាប់សួរព័ត៌មានផ្សេងៗ ល្បះសំណួរ បញ្ចប់ដោយសញ្ញាសួរ“?”។
ឧទាហរណ៍៖
- ហេតុអ្វីបានជាមិត្តចង់ឈប់រៀន?
- ឯងធ្វើលំហាត់ហើយ ឬនៅ?
ឃ. ល្បះឧទាន
ល្បះឧទាន គឺជាល្បអសម្រាប់បញ្ជាក់ពីការភ្ញាក់ផ្អើល ភ័យរន្ធត់ ត្រេកអរ រំភើប តក់ស្លុត...។ ល្បះឧទាន បញ្ចប់ដោយសញ្ញាឧទាន“!”។
