- យស (ន) អានុភាព ឥស្សរភាព ទ្រព្យធន បរិវារ កេរ្តិ៍ឈ្មោះល្អ។
- សក្តិ (ន) អំណាច សេចក្តីអង់អាច។
- សច្ចំ (ន) ទៀង ពិត ប្រាកដ មែនហើយ។
- កត្តញ្ញូ (ន) អ្នកដឹងការគុណដែលអ្នកឯទៀតបានធ្វើចំពោះខ្លួន។
- ខន្តី (ន)សេចក្តីអំណត់អត់ធន់អំណត់អត់ឱន។
- ឧបេក្ខា (ន) ការតាំងចិត្តជាកណ្តាលដំណើរមិនលម្អៀងទៅខាងណា។
- ពាក្យសត្យ (ន) ពាក្យពិត ទៀងទាត់ពាក្យទៀងត្រង់។
- បរលោក (ន) លោកឯមុខ លោកឯនាយ។
១. បើអ្នកមានយស មានសក្តិខ្ពង់ខ្ពស់ គាប់នឹងរាជការ
ធ្វើធំធ្វើថី មន្រ្តីមានត្រា ព្រះហ្លូងឧកញ៉ា
សាលាកុង្សីយ៍។
២. ចេះច្បាប់បារាំង កុំភ្លេចសច្ចំ កតញ្ញូខន្តី
កុំឆ្មើងហួសមាឌ ភ្លេចញាតិប្រុសស្រី ជំនុំកាត់ក្តី
យកឧបេក្ខា។
៣. កុំកាន់សីហលោ កុំកាន់លោភា ទោសោមោហា
កុំចក់អាភៀន កុំឃ្លានផឹកស្រា កុំស្អប់ខាងណា
សច្ចាយកត្រង់។
៤. លួងលោមពិសោធ កុំឆបព្ឆោត បញ្ចូលឱ្យបង់
ឱ្យបែកឱ្យបាក់ ពាក្យសត្យពាក្យសង្ឃ កូនអើយផ្ចិតផ្ចង់
តម្រង់ស្មារតី។
៥. កុំភ្លើនឃើញប្រាក់ កុំភ្លើនភ្លាត់សក្តិ ធ្លាក់ទៅអវិចី
កាន់ធម៌ទសពិធ រឹតឡើងរាសី គាប់ពីលោកិយ
ដល់បរលោកនាយ។
៦. អ្នកក្តីជាភ្លើង កុំកាត់កាន់ជើង អ្នកម្ខាងមើលងាយ
ចៅក្រមជាទឹក រំឮករំលាយ កុំជេរកុំវាយ
បង្ខំនាំខុស។[...]
៧. បើទៅជារាស្រ្ត ប្រាជ្ញាវៃឈ្លាស គូសវាសឆ្លកឆ្លាក់
ឱ្យឆ្លៀតរែកពុន បើធ្ងន់សុំដាក់ ខំរកមាសប្រាក់
ឱ្យគ្រាន់ទាន់ចាយ។
៨. រាជ្យបារាំងសេស កូនកុំប្រហែស កុំថ្នមរូបកាយ
ដើរគិតដេកគិត ជួញជិតជួញឆ្ងាយ បើចង់សប្បាយ
ស្រេចនៅមានទ្រព្យ។
៩. រាជ្យហ្លូងពីមុន រកស៊ីរែកពុន មានក្រតាមភ័ព្វ
រាជ្យលោកឥឡូវ ត្រូវខំឱ្យញាប់ តែខ្ជិលច្រើនជាប់
ខ្នោះជើងខ្នោះដៃ។
១០. តាំងពីឆ្នាំច ចាំជាតំណ ទំនិញឡើងថ្លៃ
ចងក្បិនឱ្យតឹង ប្រឹងកុំសំចៃ សញ្ជឹងយប់ថ្ងៃច័ន្ទ
កុំឱ្យក្រខ្សត់។
១១. បើចង់ស្រាលខ្លួន រៀនសូត្រឱ្យមួន ឱ្យមាំឱ្យស្ទាត់
កុំចេះស្ទាក់ស្ទើរ ល្ងីល្ងើឥតបទ បើចេះប្រាកដ
ប្រាក់រត់តាមហៅ។
១២. កុំថ្នមកម្លាំង កាប់ជីកចូកចាំង កុំថារងាក្តៅ
រៀនអ្វីឱ្យឆ្អិន កុំឱ្យខ្លោចឆៅ កុំដេកតែខ្លៅ
ក្រក្រៅសណ្តាប់។
១៣. បើល្ងង់ឱ្យចេះ រករៀនតម្រិះ រិះរកតម្រាប់
ឥន្រ្ទិយឆ្វេងស្តាំ កុំចាំគេប្រាប់ រៀនស្តីរៀនស្តាប់
រៀនមើលឱ្យស្តែង។
១៤. កើតមកជាមនុស្ស ទាំងស្រីទាំងប្រុស មិនមែនចេះឯង
បើក្រឱ្យមាន វិញ្ញាណចេះក្រែង គិតគ្រប់កន្លែង
កុំដេកតែក្រ។