- ថាយ៉ាង (ន) កាយវិការឫកពា។
- វាសុក្រី (ន) ស្តេចនាគ។
- នាគបាសាណ (ន) នាគដែលបើកពពារ ឬធំឡើងរឹទ្ធិ។
- ថាវរៈ (គុ) មាំមួន ស្ថិតស្ថេរ មាំទាំ។
- សង្ខារ (ន) ជីវិត។
- ហ្មាយ (កិ) សម្គាល់ ចំណាំ កំណត់ដឹង...។
- ចីរកាល (គុ) កាលដ៏យូរអង្វែង តរៀងទៅ...។
អនិច្ចាតោថ្មលោកកសាង មើលថាថាងយ៉ាងរស់ស្ទុះប្រែប្រាយ
ឥឡូវមកធ្លាយធ្លាក់បាក់ខ្ចាត់ខ្ចាយ ស្តាយអើយស្តាយមិនគួរមកពិការ។
មានអ្នកព្រៃចង្រៃឥតគំនិត ទៅសំលៀងកាំបិតគ្រឿងប្រហារ
ឱ្យខូចខាតសាច់បង់អាសា មិនស្តាយការស្នាដៃបុរាណសោះ។
ឱតោអើយតោឈរមិនមើលមៀង មកឱ្យគេសំលៀងខ្នងតោចុះ
ម្តេចមិនខឹងវាសំលៀងនោះ ឱ្យវាលុះក្តីមរណ៍យក៏វាទៅ។
អាណាអើយបំផ្លាញរូបតោលោក គ្មានប្រយោគឱ្យយល់ការរាក់ជ្រៅ
គួរឬលោកខំសាងតាំងទុកនៅ មកសត្រូវបំផ្លាញរបស់លោក។
គន់ៗស្ពានថ្មតប្រជិត ជាក្តារថ្មដាសដិតប្រកិតគោក
ទោះដំរីថ្មតប្រជិត ឥឡូវជ្រោកស្រុតខ្លះតែដើរបាន។ [...]