មេរៀនទី៧ (សង្ខេបមេរៀន) ការនិយាយ៖ ឆ្លើយតបទៅនឹងការបញ្ចុះបញ្ចូល

     ការបញ្ចុះបញ្ចូល គឺជាការទាក់ទាញចិត្តដោយមធ្យោបាយផ្សេងៗ ដើម្បីឱ្យនរណាម្នាក់ស្របតាមគាំទ្រ ឬធ្វើសកម្មភាពអ្វីមួយ...។ គេមានវិធីច្រើនយ៉ាងណាស់ ដើម្បីទាក់ទាញនរណាម្នាក់ឱ្យលង់ចិត្តចូលក្នុងអន្ទាក់របស់គេ។ ការបញ្ចុះបញ្ចូលខ្លះមានគោលបំណងទៅរកផ្លូវល្អ មានផលប្រយោជន៍ និងមានកិត្តយស។ ឯការបញ្ចុះបញ្ចូលខ្លះអូសទាញទៅរកផ្លូវអាក្រក់ គ្មានប្រយោជន៍ និងមានគ្រោះថ្នាក់។ មធ្យោមបាយនៃការបញ្ចុះបញ្ចូលមានការលើកសរសើរ ការលួងលោម ការបញ្ឆោររហូតដល់ការទិញទឹកចិត្តតាមរយៈសម្ភារៈផ្សេងៗ ឬមាសប្រាក់ទៀតផង ។

ដើម្បីចៀសវាងការចាញ់បោកគេ ឬធ្វើសកម្មភាពណាមួយដែលមានគ្រោះថ្នាក់នោះយើងគប្បី៖
- ពិចារណារកហេតុផលឱ្យបានច្បាស់លាស់ជាមុនសិន។
- រិះគិតមើលថាតើសកម្មភាព...ត្រឹមត្រូវតាមច្បាប់ឬទេ? ឬខុសច្បាប់?
- ស្វែងយល់ទៅលើបំណងរបស់អ្នកអូសទាញយើង(បំណងល្អ ឬអាក្រក់) គួរឱ្យជឿទុកចិត្តបានឬទេ?
- ស្វែងយល់ពីមនុស្សទូទៅ តើគេធ្វើដូចយើងដែរឬទេ? មានប្រយោជន៍ឬទេ?
- ពិចារណាថាតើសកម្មភាពនោះមានផលប្រយោជន៍សម្រាប់ខ្លួនឯង គ្រួសារ ឬសង្គម ឬទេ?
- ពិគ្រោះយោបល់ជាមួយឪពុកម្តាយបងប្អូន លោកគ្រូ អ្នកគ្រូ...។
- ឆ្លើយតប ឬដោះស្រាយទៅតាមស្ថានភាពជាក់ស្តែងក្នុងករណីដឹងថាសកម្មភាព​​ ឬការអូសទាញនោះបង្កឱ្យមានគ្រោះថ្នាក់។

     ក្នុងករណីមាននរណាម្នាក់បញ្ចុះបញ្ចូលអ្នកឱ្យធ្វើអ្វីមួយដោយមិនដឹងពីគោលបំណច្បាស់លាស់ ឬបំណងអាក្រក់ណាមួយ អ្នកគប្បីប្រើប្រាស់បំណិនឆ្លើយតបមួយចំនួនដូចខាងក្រោម៖

❶. ការពន្យារពេល
- ខ្ញុំសុំពេលសួរយោបល់ឪពុកម្តាយខ្ញុំសិន។
- ខ្ញុំមិនទាន់ទុកចិត្តទេ...។
- ខ្ញុំសុំពេលគិតមើលសិន។
- ខ្ញុំនឹងឆ្លើយតបនៅថ្ងៃក្រោយ។
- ចាំបន្តិច...។

❷. បដិសេធ
- សុំទោសខ្ញុំរវល់ណាស់...។
- ខ្ញុំមិនហ៊ានទេ ខ្លាចចាញ់បោកគេ...។
- នេះជាអំពើខុសច្បាប់ ខ្ញុំមិនធ្វើទេ។

❸. អូសទាញគេវិញ និងបញ្ជាក់ហេតុផល
- ធ្វើដូចនេះជាការបំពានលើច្បាប់មិត្តគួរចៀសវាង...។
- កុំប៉ះពាល់ កុំសាកល្បងវាឱ្យសោះ ព្រោះវាអាចឱ្យយើងលង់ខ្លួនក្នុងអបាយមុខ។
- យើងស្ថិតក្នុងវ័យសិក្សា មិនគួរបោះបង់ពេលវេលារៀនសូត្រឡើយ។
- នៅផ្ទះធ្វើស្រែចម្ការជាមួយពុកម៉ែយើងវិញ ប្រសើរជាងទៅធ្វើការឆ្ងាយគ្មានគោលដៅច្បាស់លាស់។
- នៅផ្ទះធ្វើស្រែចម្ការជាមួយពុកម៉ែយើងវិញ ប្រសើរជាងទៅធ្វើការឆ្ងាយគ្មានគោលដៅច្បាស់លាស់។
- ក្នុងវ័យនេះ យើងត្រូវខិតខំប្រឹងប្រែងរៀនសូត្រឱ្យមានចំណេះដឹងជ្រៅជ្រះជាមុនសិនសឹម...