ប្រជាជននៃប្រទេសជាច្រើនលើពិភពលោក តែងចង់បានអ្នកដឹកនាំតាមគន្លងលទ្ធិប្រជាធិបតេយ្យដែលមាន សមត្ថភាពដឹកនាំ និងផ្តល់សិទ្ធិសេរីភាពដល់ប្រជាពលរដ្ឋ ។ ការបង្កើតគោលនយោបាយសាធារណៈរបស់រដ្ឋាភិបាលគឺជាការខិតខំពង្រឹងឯកភាពជាតិ រួមកំលាំងគ្នាប្តូរផ្តាច់ ក្នុងការកសាង និងការពារប្រទេសឱ្យបានស្ថិតស្ថេរគង់វង្សក្នុងឯករាជ្យ អធិបតេយ្យភាព បូរណភាពទឹកដី សន្តិភាព ប្រជាធិបតេយ្យ អព្យាក្រឹត្យភាព វឌ្ឍនភាព សុភមង្គល និងខិតខំពង្រឹងផ្នែកសន្តិភាព ស្ថេរភាព សន្តិសុខ និងសណ្តាប់ធ្នាប់សង្គម ឱ្យកាន់តែរឹងមាំ ហើយជំរុញឱ្យមានការអភិវឌ្ឍសេដ្ឋកិច្ចជាតិឱ្យកាន់តែរីកចំរើនខ្លាំងក្លា។
គោលនយោបាយសាធារណៈរបស់រាជរដ្ឋាភិបាលកម្ពុជាគឺ៖
- ប្រកាន់ខ្ជាប់នូវគោលនយោបាយសាមគ្គី
- គោរព និងការពាររដ្ឋធម្មនុញ្ញ
- ការពារឯកភាពជាតិ
- មិនប្រកាន់ពូជសាសន៍ ភេទ ជំនឿសាសនា ឋានៈសង្គម
- ប្រកាន់ខ្ជាប់លទ្ធិប្រជាធិបតេយ្យសេរីភាពពហុបក្ស
- អនុវត្តសេដ្ឋកិច្ចទីផ្សារសេរី
- គោរពសិទ្ធិសេរីភាព ធានាយុត្តិធម៌ សមធម៌សង្គម
- ពង្រឹងពង្រីកនីតិរដ្ឋ
- ប្រយុទ្ធប្រឆាំងអំពើរំលោភច្បាប់ និទ្ទណ្ឌភាព
អំពើពុករលួយ អំពើហិង្សា ការជួញដូរគ្រឿងញៀន និងមនុស្ស ឧក្រិដ្ឋកម្ម
ព្រមទាំងដោះស្រាយបញ្ហាដីធ្លី.......។
ការអប់រំ សំដៅលើការលើកស្ទួយបណ្តុះបណ្តាលធនធានមនុស្សប្រកបដោយចំណេះដឹង និងចំណេះធ្វើពិតប្រាកដមានគុណធម៌ អត្តចរិតល្អប្រពៃ មានកាយសម្បទារឹងមាំ និងមានស្មារតីទទួលខុសត្រូវខ្ពស់ក្នុងការងារដើម្បីជួយអភិវឌ្ឍ សេដ្ឋកិច្ចសង្គមនិងធានាកិច្ចការពាររាល់សមិទ្ធផលរបស់ជាតិ ក្នុងនោះយកចិត្តទុកដាក់ជាចំបងដល់កុមារ យុវជន និងស្ត្រី។
បញ្ហាកំណើនប្រជាជន ជាកត្តាជំរុញឱ្យមានការបំផ្លិចបំផ្លាញធនធានធម្មជាតិ និងកង្វក់បរិស្ថានធម្មជាតិ។ ដោយយោលលើកត្តាចាំបាច់ពីបញ្ហាដីធ្លី និងលំនៅឋានរបស់ប្រជាជន រាជរដ្ឋាភិបាលបានខិតខំកែទម្រង់ការគ្រប់គ្រងដីធ្លីនិងលំនៅឋានក្នុងទ្រង់ទ្រាយធំគឺ រៀបចំតាក់តែង និងដាក់ឱ្យចូលជាធរមាននូវនីតិវិធី និងលិខិតបទដ្ឋានគតិយុត្តិនានាដែលទាក់ទងនឹងដីធ្លី ឬលំនៅឋាន ដូចជាច្បាប់ភូមិបាល ច្បាប់ព្រៃឈើ...។ ទន្ទឹមនឹងនោះរាជរដ្ឋាភិបាលបានបង្កើតអាជ្ញាធរជាតិសម្រាប់ដោះស្រាយទំនាស់ដីធ្លី ។
បច្ចុប្បន្នរដ្ឋាភិបាលកម្ពុជាបានខិតខំពង្រឹងខឿនការពារប្រទេស និងសន្តិសុខជាតិឱ្យរឹងមាំ ការពារបូរណភាពទឹកដី ឯករាជ្យ អធិបតេយ្យ នៃព្រះរាជាណាចក្រកម្ពុជាព្រមទាំងការរក្សាភាពសុខសាន្តរបស់ប្រជាជន ។
ធនធានធម្មជាតិ សំដៅលើអ្វីដែលមានប្រយោជន៍ ។ នៅប្រទេសកម្ពុជា ការបាត់បង់ធនធានធម្មជាតិបណ្តាលមកពីការកាប់ព្រៃឈើហួសហេតុ ការបំផ្លាញទីជំរកសត្វព្រៃ មច្ឆជាតិ សំណឹកដី ទឹកជំនន់ ការនេសាទត្រីខុសច្បាប់ និងខុសបច្ចេកទេស ការបំពុលទឹក ។
- ការបំពុលទឹក ៖
ការសាងសង់លំនៅដ្ឋាននៅតាមមាត់ទឹក កំពង់ចម្លង កំពង់ផែ លើទឹក ការបោះ ចោលកាកសំណល់
កំទេចកំទី ខ្មោចសត្វ........។
- ការបំពុលខ្យល់អាកាស ៖
បណ្តាលមកពីការកាប់បំផ្លាញព្រៃឈើ គ្រោះធម្មជាតិ ផ្សែងពីរោងចក្រ យានយន្ត
ការដុតបំផ្លាញកម្ទេចកម្ទី ការសាកល្បងអាវុធគីមី.........។
ការចោលសំរាមពាសវាលពាសកាល ជាហេតុធ្វើឱ្យប៉ះពាល់ដល់សុខភាព គុណភាពបរិស្ថាន និងធ្វើឱ្យ ខូចសោភ័ណនៃការរស់នៅផងដែរ ។
ការប្រើប្រាស់ដីធ្លីនៅតំបន់ខ្លះ មានបញ្ហាធ្ងន់ធ្ងរដោយសារប្រជាជនខ្វះចំណេះដឹង ឬបទពិសោធន៍ក្នុងការប្រើប្រាស់ជីគីមី ដែលធ្វើឱ្យដីរឹង ខ្សោះជីជាតិជាដើម។
តាមរយៈនៃការយល់ដឹង និងមានទំនួលខុសត្រូវកាន់តែខ្ពស់របស់ប្រជាពលរដ្ឋ បញ្ហាដែលផ្តល់ផលអាក្រក់ ចំពោះបរិស្ថាន និងធនធានធម្មជាតិ នឹងត្រូវកាត់បន្ថយ ហើយនាំគ្នាថែរក្សា។