អំណាចរដ្ឋបាលមូលដ្ឋាន មានតួនាទីបំពេញមុខងារសណ្តាប់ធ្នាប់និងសុខសុវត្ថិភាពជូនរដ្ឋសាធារណៈ និងប្រជាពលរដ្ឋ ។ ក្រុមប្រឹក្សានីមួយៗ ត្រូវទទួលខុសត្រូវចំពោះប្រជាពលរដ្ឋ ឆ្លើយតបនឹងតម្រូវការរបស់ប្រជាពលរដ្ឋ និងជំរុញមូលដ្ឋាន អោយមានការអភិវឌ្ឍប្រកបទៅដោយនិរន្តរភាព។
ក្រុមប្រឹក្សាឃុំ-សង្កាត់ ក្រុមប្រឹក្សាក្រុង-ខណ្ឌ-ស្រុក និងក្រុមប្រឹក្សារាជធានី-ខេត្ត មានតួនាទីដឹកនាំគ្រប់គ្រង រដ្ឋបាលរបស់ខ្លួន ដោយធ្វើការប្រជុំយ៉ាងតិចមួយដងក្នុងមួយខែ នៅក្នុងសាលប្រជុំរបស់ខ្លួន ។
រដ្ឋដែលមានអ្នកគ្រប់គ្រង និង ដឹកនាំល្អធ្វើឱ្យប្រជាពលរដ្ឋទទួលបាននូវអត្ថប្រយោជន៍ច្រើន ។ រដ្ឋបាលកណ្តាលត្រូវតែចែករំលែកអំណាចរបស់ខ្លួនទៅឱ្យរដ្ឋបាលមូលដ្ឋានដែលគេឱ្យឈ្មោះថាវិមជ្ឈការនិងវិសហមជ្ឈការ ដែលផ្ទុយពីអ្វីដែលជាការប្រមូលផ្តុំអំណាចឱ្យនៅតែក្នុងដៃ រដ្ឋបាលកណ្តាល ។ ការប្រមូលផ្តុំអំណាចបែបនេះហៅថា មជ្ឈការ ។
មជ្ឈការ គឺជាការប្រមូលផ្តុំអំណាច ឬជាប្រព័ន្ធគ្រប់គ្រងដែលប្រមូលផ្តុំអំណាច នៅតែក្នុងដៃរបស់រដ្ឋបាលកណ្តាល គឺមានន័យថា អំណាចទាំងអស់នៅក្នុងដៃបុគ្គល ឬក្រុមដែលមានអំណាចគ្រប់គ្រងប្រទេស ។ ការប្រមូលផ្តុំអំណាច តែក្នុងដៃបុគ្គលម្នាក់ ឬក្រុមដែលមានអំណាចគ្រប់គ្រងប្រទេស នោះអាចបង្កឱ្យអ្នកកាន់អំណាចឈានទៅរកការអនុវត្តរបបផ្តាច់ការ បុគ្គលនិយមជួនកាល អាចប្រើនយោបាយប្រជាភិថុតិបោកប្រាស់ប្រជាជនខ្លួនឯងដើម្បីអំណាច ។
គុណសម្បត្តិនៃប្រព័ន្ធមជ្ឈការ ត្រង់ថារដ្ឋអំណាចថ្នាក់ក្រោមអនុវត្តតាមវិធីរបស់រដ្ឋតែមួយដែលជាការពង្រឹងបាននូវឯកភាពជាតិ និងផ្តល់ភាពងាយស្រួលដល់ថ្នាក់កណ្តាល ក្នុងការត្រួតពិនិត្យ វាយតម្លៃសកម្មភាព អនុវត្តរបស់ថ្នាក់ក្រោម សម្រួលថ្នាក់កណ្តាលក្នុងការគ្រោង និងត្រួតពិនិត្យចំណាយចំណូលថវិកា ។
គុណវិបត្តិនៃប្រព័ន្ធដឹកនាំតាមបែបមជ្ឈការ គឺរដ្ឋបាលសាធារណៈ មិនអាចស្ថិតនៅជិតនឹងប្រជាពលរដ្ឋមិនបានដឹងពីតម្រូវការប្រជាពលរដ្ឋក៏ដូចតម្រូវការរបស់មូលដ្ឋានឱ្យពិតប្រាកដ ជួនកាលគម្រោងកម្មវិធីដែលថ្នាក់កណ្តាលបានដាក់ចុះធ្វើឱ្យខូចប្រយោជន៍ប្រជាពលរដ្ឋក្នុងមូលដ្ឋាន ។ រដ្ឋបាលបែបមជ្ឈការជារដ្ឋបាលដែលមានលក្ខណៈបិទជិត ។ ប្រជាពលរដ្ឋមិនអាចចូលរួមនៅក្នុងការសម្រេចចិត្តអ្វីមួយឬ ក្នុងការរៀបចំនិងក្នុងការអនុវត្តគម្រោងកម្មវិធីអភិវឌ្ឍន៍ជាតិបានឡើយ ។
វិមជ្ឈការ មានន័យថាជាការគ្រប់គ្រងបុគ្គលភាពគតិយុត្តិរបស់រដ្ឋឱ្យទៅជាសមូហភាព ផែនដីទាំងឡាយ ណាដែលស្ថិតនៅក្រៅសមូហភាពរដ្ឋ ដើម្បីឱ្យសមូហភាពផែនដីនោះមានស្វ័យភាពក្នុងការរៀបចំប្រជាជននៅក្នុង មូលដ្ឋានរបស់ខ្លួនឱ្យមានការរីកចំរើនទាំងផ្នែកស្មារតី និងសម្ភារៈ ។ ន័យម៉្យាងទៀត វិមជ្ឈការគឺជាការប្រគល់ភាពជាម្ចាស់លើមុខងារ ឬជាការចែករំលែកអំណាចក្នុងប្រព័ន្ធ អភិបាលកិច្ចតាមរយៈការផ្ទេរអំណាចនៃរដ្ឋបាលកណ្តាលរួមទាំងការទទួលខុសត្រូវ និងត្រូវធនធានឱ្យទៅរដ្ឋបាល មូលដ្ឋាន ឬរដ្ឋបាលថ្នាក់ក្រោមជាតិ ។ ដើម្បីឆ្លើយតបទៅនឹងតម្រូវភាពមូលដ្ឋានដែលស្ថិតនៅក្រោមការគ្រប់គ្រងរបស់ពួកគេ ។
វិសហមជ្ឈការ មានន័យថារាជរដ្ឋាភិបាល ឬក្រសួង ស្ថាប័នធ្វើប្រតិភូកម្មលើមុខងារ សិទ្ធិអំណាច និងធនធាន ទៅអង្គភាពក្រោមបង្គាប់ ឬទៅក្រុមប្រឹក្សាណាមួយ ដើម្បីអនុវត្តន៍ការងារនោះក្នុងនាមរាជរដ្ឋាភិបាល ក្រសួង ស្ថាប័ននោះ ។ ក្នុងន័យនេះ ភាពជាម្ចាស់មិនបានផ្តល់ជូនអង្គភាព ក្រោមបង្គាប់ ឬក្រុមប្រឹក្សាឡើយ ។ រាជរដ្ឋាភិបាល ឬក្រសួង ស្ថាប័ន នៃរាជរដ្ឋាភិបាលបានរក្សាទុកនូវភាពជាម្ចាស់នោះដូចជា ៖ ក្រសួងមហាផ្ទៃធ្វើប្រតិភូកម្មលើមុខងារ ធ្វើសេចក្តីចម្លងអត្រានុកូលដ្ឋានទៅឱ្យ ក្រុមប្រឹក្សាក្រុង-ខណ្ឌ-ស្រុក ហើយអភិបាលទាំងនោះត្រូវបានគេប្រគល់ឱ្យ អនុវត្តការងារនេះក្នុងនាមក្រុមប្រឹក្សារបស់ខ្លួន ។ ក្នុងការធ្វើប្រតិភូកម្មមុខងារនេះ ក្រសួងមហាផ្ទៃ និងផ្តល់ធនធាន និងការបណ្តុះបណ្តាល ។
ដើម្បីសម្របសម្រួលនិងគាំទ្រដល់ដំណើរការនៃការកែទម្រង់វិមជ្ឈការ និងវិសហមជ្ឈការប្រកបដោយប្រសិទ្ធភាពរដ្ឋនីមួយៗ ត្រូវរៀបចំកម្មវិធីជាតិមួយក្នុងកំណែទម្រង់វិមជ្ឈការ និងវិសហមជ្ឈការ ។ គោលនយោបាយកំណែទម្រង់របស់រដ្ឋាភិបាលកម្ពុជាទទួលបានការគាំទ្រ និងចូលរួមដោយឥតសំចៃពីគ្រប់ក្រសួង ស្ថាប័ន នៃរាជរដ្ឋាភិបាល មន្ត្រីរាជការស៊ីវិល នគរបាលជាតិ កងយោធពលខេមៈភូមិន្ទគ្រប់លំដាប់ថ្នាក់ពីគ្រប់គណបក្ស នយោបាយនានា ពីសង្គមស៊ីវិល និងផ្នែកឯកជន រួមទាំងប្រជាពលរដ្ឋទាំងមូល ក៏ដូចជាដៃគូអភិវឌ្ឈប្រទេសផ្តល់ជំនួយសំដៅនាំកម្ពុជាឆ្ពោះទៅរកការអភិវឌ្ឍលើគ្រប់វិស័យ ។