ហាំលែត ជាបុត្រាស្តេចដាណឺម៉ាក ដែលកំពុងសិក្សានៅអាល្លឺម៉ង់បានទទួលដំណឹងថាបិតាខ្លួនសុគត ក៏វិលត្រឡប់មកកាន់មាតុភូមិវិញបានប្រទះនឹងអាពាហ៍ពិពាហ៍ ដ៏តក់ក្រហល់របស់មាតា ជាមួយនឹងឪពុកមារបស់ខ្លួន។ ហាំលែតក៏ផ្តើមសង្ស័យនឹងរឿង ដ៏អាថ៌កំបាំងនេះហើយខ្មោចបិតាបានបង្ហាញរូបព្រមទាំងប្រាប់ ហាំលែតថាក្លូឌីយូសដែលជាឪពុកមារបស់ហាំលែតបានលួចសម្លាប់ទ្រង់ដោយសម្ងាត់បំផុតដើម្បីប្លន់ដណ្ដើមយករាជ្យសម្បត្តិ និងរាជក្សត្រីធ្វើជាមហេសី។ ខ្មោចបិតាបានសុំឱ្យហាំលែតសងសឹកជំនួស ហើយហាំលែតបានសន្យាថានឹងសម្រេចបំណងនេះ។ ហាំលែតជួបនាងអូហ្វេលីយ៉ា ដែលជាសង្សាររបស់ខ្លួនហើយបានដឹងថានាងបានក្លាយខ្លួនទៅជាអ្នកបម្រើកលឧបាយរបស់សត្រូវដោយមិនដឹងខ្លួនហាំលែតក៏បានផ្តាច់ទំនាក់ទំនងពីនាង។ ហាំលែតបានចាត់តាំងឲ្យគេសម្ដែងឆាកមួយ ដែលមានទម្រង់ដូចគ្នាបេះបិទនឹងឆាកពិឃាដរបស់ក្លូឌីយូសមកលើបិតារបស់ខ្លួន តាមការពន្យល់របស់ខ្មោចបិតាហើយបានអញ្ជើញក្លូឌីយូស និងមហេសីមកទស្សនា។ រឿងដែលក្លូឌីយូសបានមើលគឺរំភើបខ្លោចផ្សាយ៉ាងខ្លាំងហើយក្លូឌីយូសក៏បានស្ទុះចេញពីទីនោះ។ ហាំលែតក៏បានចាប់ដាវស្ទុះតាមប្រកិតពីក្រោយឃើញវាកំពុងថ្វាយបង្គំព្រះហាំលែត ក៏ផ្អាកមិនសម្លាប់វាពេលនោះទេ។ ហាំលែតបានចូលទៅក្នុងបន្ទប់មាតាដើម្បីបកអាក្រាតទោសកំហុសរបស់ក្សត្រី។
ពេលនោះវាំងននរញ្ជួយហាំលែតស្មានថាក្លូឌីយូសពួននៅទីនោះក៏បុកសម្លាប់មួយផ្លែដាវតែធាតុពិតជាប៉ូឡូនី ញូស ឪពុកនាងអូហ្វីលីយ៉ាសោះ។ ដោយសារតែហាំលែតបានសម្លាប់មន្ដ្រីធំកូឌីយូស ក៏សម្រេចចិត្តបញ្ជូនឱ្យហាំលែតទៅប្រទេសអង់គ្លេស ដើម្បីឱ្យស្តេចប្រទេសនោះជួយសម្លាប់ហាំលែតជំនួសខ្លួន។ នៅតាមផ្លូវហាំលែតបានជួបនឹងចោរប្លន់ក៏ឆ្លៀតឱកាសរត់រួច ហើយក៏វិលត្រឡប់មកប្រទេសរបស់ខ្លួនវិញ។ ហាំលែតបានជួបនឹងឡាអ៊ែកនៅកន្លែងបញ្ចុះសពនាងអូហ្វលីយ៉ា។ ដោយសារគម្រោងការ សម្លាប់ហាំលែតបរាជ័យ ក្លូឌីយូសបានរៀបចំគម្រោងលើកទី២គឺការបង្កើតឆាកប្រយុទ្ធមួយរវាងហាំលែត និងឡាអ៊ែកព្រមទាំងឱ្យដាវដែលបានជ្រលក់ថ្នាំពុលទៅឲ្យឡាអ៊ែក ហើយក៏បានលាយថ្នាំពុលជាមួយស្រាសម្រាប់ជូនហាំលែតនៅពេលឈ្នះឡាអ៊ែក។
ការប្រយុទ្ធចាប់ផ្ដើម ហាំលែតបានត្រូវ របួសដោយសាច់ដាវរបស់ឡាអ៊ែក តែឡាអ៊ែកក៏បានត្រូវមួយដាវដែររួចក៏ដាច់ផ្ងារតែមុនពេលស្លាប់ ឡាអ៊ែកបានប្រាប់ហាំលែតគ្រប់យ៉ាងពីឧបាយកលរបស់ក្លូឌីយូស។ ហាំលែតក៏ស្ទុះចូលចាក់សម្លាប់ក្លូឌីយូសភ្លាម ហើយដោយខ្លួនឯងក៏ត្រូវឆូតនឹងចុងដាវត្រាំថ្នាំពុលដែលមានពិសរបស់ឡាអ៊ែក ពេលនោះហាំលែតក៏បានស្លាប់ដែរ។