នៅក្នុងសង្គមខ្មែរ ពិធីរៀបមង្គលការជាប្រពៃណីមួយដែលមានបញ្ញត្តិប្រហែលនឹងកាតព្វកិច្ចដែរព្រោះអ្នកដែលបានគ្នាជាប្ដីប្រពន្ធត្រូវតែរៀបការបើគេចវេះពិធីនេះនឹងត្រូវគេចាត់ទុកថាជាអ្នកគ្មានសិរីសួស្ដីគ្មានកិត្តិយស។ នេះជាទម្រង់មង្គលការតាមប្រពៃណីខ្មែរដែលយើងយកមកអធិប្បាយដោយសង្ខេប៖
ដំបូងបង្អស់ឪពុកម្ដាយ ឬអាណាព្យាបាលខាងប្រុសបានចាត់ស្រីម្នាក់ ដែលស្គាល់ទុកចិត្តមិនអភព្វ ដែលគេឱ្យឈ្មោះអ្នកនោះថា អ្នកស្មាយ មេអណ្តើកហើយធ្លាប់ស្និទ្ធស្នាល និងគ្រួសារខាងស្រី ។ លុះបានដឹងថានាងនោះ (កូនក្រមុំ) នៅទំនេរហើយដឹងថាថ្ងៃ ខែ ឆ្នាំត្រូវគ្នាល្អទើបគេចូលទៅចែចូវដល់ឪពុកម្ដាយឬអាណាព្យាបាលរបស់កូនស្រីនោះ។
ក្រោយពេលដែលបានចាត់មនុស្សឱ្យទៅនិយាយចែចូវបានដឹងថាគេបើកផ្លូវឱ្យចូលហើយខាងប្រុសត្រូវរៀបចំគិតគូររឿងស្ដីដណ្ដឹងតទៅទៀត។ មុននឹងចូលទៅដណ្ដឹងថ្ងៃណាៗត្រូវតែផ្ដល់ព័ត៌មានឱ្យទៅខាងស្រីជាមុនសិន។ ពិធីស្ដីដណ្តឹងត្រូវប្រព្រឹត្តទៅ ៣ដងដែរមនុស្សដែលមានភារកិច្ចទៅដណ្តឹងកូនស្រីគេហៅថា “អ្នកផ្លូវចៅមហា” ឯអ្នកដែលតំណាងឱ្យគ្រួសារខាងស្រីគេឱ្យឈ្មោះថា “មេបា” ។
ចំពោះថ្ងៃខែរៀបមង្គលការដែលគេជ្រើសរើស និងគន់គូរដោយម៉ត់ចត់ហើយគេពុំរើសខែណាដែលមាន ២៩ថ្ងៃ (ខែឈ្មោល) ឬខែណាដែលមានព្រះសង្ឃចូលវស្សាទេគេត្រូវយកទៅចុះក្នុងផែនក្រដាសមួយសន្លឹក ហើយរៀបរណ្ដាប់កំដរដៃផងមាន ស្លាម្លូ ចេក រងស្លាដែលដាក់គ្រឿងគ្រប់សព្វ។ រួចហើយអ្នកផ្លូវត្រូវយកក្រដាសកំណត់ពេលវេលា និងរណ្ដាប់ទៅជូនមេបាខាងស្រី។ មេបាខាងស្រី ក៏បើកក្រដាសកំណត់ពេលានោះអានជូនភ្ញៀវស្តាប់។ ក្រោយពីបានជូនក្រដាសពេលា ជូនទៅមេបារួចហើយអ្នកផ្លូវក៏ជូនស្លាកំណត់ទៅមេបាពិសាពិធីនេះហៅថា “ស៊ីស្លាកំណត់” ។
តាមប្រពៃណីបុរាណ ពិធីរៀបមង្គលការប្រព្រឹត្តទៅចំនួន៣ថ្ងៃ គឺថ្ងៃចូលរោង ថ្ងៃស៊ីស្លាកំណត់ និងថ្ងៃ សំពះ។
នៅថ្ងៃទី១ គ្រួសារខាងប្រុសត្រូវមកសង់រោងការនៅផ្ទះខាងស្រី។ រោងការច្រើនតែសង់អំពីឫស្សីប្រក់ស្បូវមាន ៣ល្វែង។ ល្វែងមួយសម្រាប់ចុងភៅធ្វើម្ហូប ល្វែងមួយទៀតសម្រាប់លៀងភោជនាហារ ហើយលង្វែងមួយទៀតជាល្វែងផ្កាស្លាសម្រាប់កូនកំលោះស្នាក់នៅរហូតដល់ថ្ងៃចុងក្រោយ។
នៅវេលាព្រឹកថ្ងៃទី២ គេហែកូនកំលោះដោយមានភ្លេងខ្មែរ កំដរផងមកកាន់ផ្ទះខាងស្រី។ កូនកំលោះនោះត្រូវចូលទៅនៅរោងផ្កាស្លា។ ចំណែកនៅលើផ្ទះការមានធ្វើពិធីសែនព្រេនជម្រាបដូនតាអំពីការរៀបចំទុកដាក់កូនចៅឱ្យមានគូស្រករនិងពិធីស៊ីស្លាកំណត់
នៅថ្ងៃទី៣ លុះព្រឹកភ្លឺស្រាងៗឡើងសាម៉ីខ្លួនស្រីត្រូវរៀបចំស្លៀកពាក់តាមបែបបុរាណ។ អាចារ្យអ្នកកាន់ពេលា ត្រូវនាំកូនប្រុសទៅថ្វាយបង្គំរានទេវតា ហើយត្រូវអង្គុយបែរមុខទៅទិសខាងកើត ចាំយកពេលានៅទីនោះ។លុះពេលាល្អហើយ (ពេលាដែលព្រះអាទិត្យរះ) អាចារ្យវាយឃ្មោះ ៣ដងហើយកូនកំលោះក៏ក្រាបថ្វាយបង្គំព្រះអាទិត្យ ៣ដងដែរ។
ក្រោយពេលរៀបការបាន ៣ថ្ងៃ គេនាំស្វាមីភរិយាថ្មីនេះដោយយកផ្កាស្លាច្បង ចំអាប បង្អែម ស្លា បារីទៅថ្វាយបង្គំសុំពរពីព្រះសង្ឃឯវត្ត ហើយឱ្យលោកបាចផ្កាស្លានេះ ដើម្បីប្រសិទ្ធពរឱ្យបានសុខចម្រើនតទៅ។