រឿងគូលីកំណែន ជាស្នាដៃអក្សរសិល្ប៍ប្រលោមលោកទំនើប មានទំនាក់ទំនងទៅនឹងរបបនយោបាយ និងជាស្នាដៃទី១ របស់លោក អ៊ឹម ថុក ដែលបានចាប់បដិសន្ធិឡើងក្នុងពេលដែលប្រទេសកម្ពុជាបានទទួលពន្លឺឯករាជ្យនៅឆ្នាំ១៩៥៣ ក្រោមព្រះរាជកិច្ចដឹកនាំរបស់អង្គសម្ដេចឪ។ រឿងគូលីកំណែនបានបំផុសកំហឹងឈឺចាប់ចំពោះរបបអាណានិគម និងចក្រពត្តិនិយមជប៉ុន បារាំង អាមេរិក។
✦ ចំណងជើង៖ គូលីកំណែន។
✦ ប្រភព៖
ប្រភពចេញពីជីវភាពរស់នៅរបស់ប្រជារាស្ដ្រខ្មែរក្រោមសម្ពាធជប៉ុន បារាំង អាមេរិក ដំណើររឿងកើតឡើងនៅឃុំគោកចំបក់
ស្រុកកណ្ដាលស្ទឹង ខេត្តកណ្ដាល ក្នុងប្រទេសកម្ពុជា។
✦ ប្រភេទ៖ ប្រលោមលោកបែបមនោសញ្ចេតនា។
✦ ចលនា៖ អក្សរសិល្ប៍ខេមរនិយម។
✦ កាលកំណត់តែង៖
រឿងនេះប្រហែលផ្ដើមនិពន្ធនៅខែសីហា ឆ្នាំ១៩៥៦ ។
✦ អ្នកនិពន្ធ៖ អ៊ឹម ថុក ចាងហ្វាងកាសែតវត្តភ្នំ។
នាឆ្នាំ១៩៣៥ នៅភូមិគោកចំបក់ ស្រុកកណ្តាលស្ទឹង ខេត្តកណ្តាលមានការដកហូតងារមេឃុំកឹមរួចហើយបានលើកបន្តុប ពូផាន់ជំនួសវិញ ព្រោះពូផាន់មានទ្រព្យសម្បត្តិច្រើនពូកែទារពន្ធ និងចេះផ្គាប់ផ្គុនលោកចៅហ្វាយនាយ។ ថ្ងៃអាទិត្យមេឃុំផាន់តែងនាំលោកចៅហ្វាយស្រុកទៅផឹកស៊ី រកស្រីញី ជាពិសេសជាមួយនាងខ្វែននៅភូមិដើមក្រសាំង។ ក្នុងពេលដែលកេណ្ឌពលករឱ្យជប៉ុនម្តងៗ មេឃុំផាន់បានច្រើនទាំងប្រាក់ និងសគុណ។ ក្នុងរយៈពេលធ្វើការ៥ឆ្នាំ មេឃុំផាន់ទទួលបានមេដាយដល់ទៅពីរ។ លឹមជាកូនប្រុសរបស់តាង៉ែតយាយម៉ុក ដែលត្រូវមេឃុំផាន់កេណ្ឌឱ្យទៅធ្វើព្រលានយន្តហោះពោធិ៍ចិនតុង ទោះបីនៅសល់ជាងមួយខែទៀតត្រូវរៀបការក៏ដោយ។ លឹមជាអ្នកបួសរៀនខាងផ្លូវពុទ្ធសាសនាគេមានគំនិតជឿនលឿន មានជំនឿសមហេតុផលទៅលើទស្សនៈកម្មផល។ ការយល់ដឹងការងាររាក់ជ្រៅក្នុងសង្គមលឹម ត្រូវបានយឹមដែលជាឧបាសកខើចជើងនៅបាសាក់ព្រះត្រពាំងជួយណែនាំ។
ពេលទៅកំណែននៅពោធិចិនតុង មេឃុំផាន់ និងលោកចៅហ្វាយស្រុកមានឧបាយកលអាក្រក់ចង់បាននាងហេងដោយឱ្យយាយចាន់ធ្វើជាមេអណ្តើក។ ការនេះមិនបានសម្រេច មេឃុំផាន់ក៏ប្រើវិធីគំរាមកំហែងថានឹងឱ្យប៉ូលីសមកចាប់នាងហេង ដោយយល់ហេតុការណ៍មិនស្រួល ពូស្វាយ មីងពតក៏នាំនាងហេងយកទៅលាក់ទុកនៅផ្ទះតាង៉ែត យាយម៉ុក ក៏ដាច់ចិត្តបររទេះនាំអនាគតកូនប្រសារគេចទៅលក់អង្ករនៅភ្នំពេញរង់ចាំថ្ងៃលឹមវិលមកវិញទើបរៀបការតែម្តង ជាគ្រោះកាច ពេលយន្តហោះអាមេរិកមកទម្លាក់គ្រាប់បែកលើមូលដ្ឋានទ័ពជប៉ុន ពិសេសត្រង់ចេតិយវត្តឧណ្ណលោម តាង៉ែតយាយម៉ុក និងនាងហេងក៏ត្រូវស្លាប់យ៉ាងអណោចអធមដោយគ្រាប់បែកនោះទៅ។
ពេលបញ្ចប់ការងារនៅឯពោធិចិនតុងហើយលឹមក៏វិលត្រឡប់មកភូមិកំណើតវិញ។ ពេលនោះលឹមត្រូវបាត់បង់នូវអ្វីៗទាំងអស់ ឪពុកម្តាយ គូសង្សារ ក៏ត្រូវស្លាប់ ជាមួយនោះអុងប៉ាងថាវក៏រឹបអូសដីស្រែ ផ្ទះសំបែង ដើម្បីកាត់សងបំណុលខ្មោចឪពុក។ ថ្ងៃមួយបន្ទាប់ពីបានទទួលសំបុត្រពីឧបាសក យឹម ដែលគ្រូសូត្រ ម៉ក់ យកមកប្រគល់ឱ្យលឹមៗក៏បានទៅជួបយឹមនៅផ្ទះនូដូងឯភ្នំពេញ។ លឹមត្រូវមានភារកិច្ចជូននូដូងដែលទើបរត់ចេញពីគុកទៅស្វាយដូនកែវដើម្បីបន្តចលនាតស៊ូជាមួយបារាំង។ ម៉ឹងត្រូវជាប្អូនបង្កើតរបស់នូដូងក្រោយពីបានរៀនចប់វិទ្យាល័យបានចូលទៅបម្រើការងារនៅខេត្តព្រៃវែង។ ម៉ឹងបានសម្រាកនៅផ្ទះអ្នកគ្រូពេជ្រណារី។ អ្នកគ្រូនេះមានប្អូនស្រីជីដូនមួយឈ្មោះអ្នកគ្រូ គូ រស់។ ម៉ឹង និងអ្នកគ្រូ គូ រស់ តែងនាំគ្នាដើរកម្សាន្ដនៅវាលស្រែប្រាំងហើយបានយល់ចិត្តថ្លើមគ្នាដោយស្មោះ។ ក្រោយមកម៉ឹងបានទទួលសំបុត្រពី នូ ដូង ជាបងឱ្យចូលព្រៃដើម្បីធ្វើការតស៊ូជាមួយគ្នា។ យប់នោះ ម៉ឹង ក៏សរសេរសំបុត្រជាពាក្យកាព្យដាក់ក្រោមពូកទុកឱ្យអ្នកគ្រូ គូ រស់ រួចក៏ចេញទៅតាមបង។ ឆ្នាំ១៩៥៤ សន្និសីទសឺណែវបានបង្ខំឱ្យបារាំងប្រគល់ឯករាជ្យឱ្យប្រទេសទាំងបីនៅឥណ្ឌូចិន។ ក្រោយពីបានជ័យជម្នះស្រុកក៏បានឯករាជ្យ លឹម ក៏ត្រឡប់មកភូមិកំណើតវិញជាមួយអ្នកតស៊ូឯទៀត។ ចំណែកម៉ឹងពិការដៃម្ខាងក្នុងពេលតស៊ូ ហើយក៏សុខចិត្តរស់នៅបង្កបង្កើនផលឯស្រុកលើ។ ដំណឹងនេះបានធ្វើឱ្យអ្នកគ្រូ គូ រស់ កាន់តែពេញចិត្ត។ អ្នកទាំងពីរនៅតែរក្សាភក្តីភាព នឹងគ្នាជានិច្ចហើយម៉ឹងក៏បានកំណត់ពេលវេលាផ្តាំមកអ្នកគ្រូ គូ រស់ ដើម្បីទៅរៀបចំទ្រនំសុភមង្គលជាមួយគ្នាទៀតផង។