(ជ៣) មេរៀនទី១៖ (សង្ខេបមេរៀន) ប្រភេទគ្រួសារ

ជំពូកទី៣               គ្រួសារ

មេរៀនទី១             ប្រភេទគ្រួសារ

សេចក្ដីផ្ដើម

- មនុស្សម្នាក់ៗសុទ្ធតែជាសមាជិករបស់គ្រួសារនិងមានភារកិច្ចចាំបាច់ ដើម្បីធ្វើខ្លួនឱ្យក្លាយទៅជាអ្នកមានទំនួលខុសត្រូវនិងមានតម្លៃ ។ គ្រួសារទទួលខុសត្រូវចំពោះការរីកចម្រើននិងជាមូលដ្ឋានធនធានមនុស្សរបស់ប្រទេសជាតិ ។

- សមាជិកគ្រួសារមានសិទ្ធិទទួលការថែទាំ ការពាររូបរាងកាយ និងការពារសិទ្ធិមនុស្សពីមេ គ្រួសារ ។ មនុស្សម្នាក់ៗត្រូវការអាហារ សម្លៀកបំពាក់ ការអប់រំ ការថែទាំសុខភាព និងសុវត្ថិភាពរូបរាងកាយ ។ ដើម្បីបំពេញបំណងទាំងនោះ មេគ្រួសារខិតខំប្រឹងប្រែងអស់ពីកម្លាំងកាយ កម្លាំង ចិត្តក្នុងការចិញ្ចឹមផ្គត់ផ្គង់ និងបំពេញតម្រូវការរបស់សមាជិកគ្រួសារគ្រប់រូប ។ គ្រួសារមានពីរប្រភេទ គឺគ្រួសារតូចនិងគ្រួសារធំ ។

ពាក្យគន្លឹះ

· សុខុមាលភាព៖ ភាពនៃបុគ្គលអ្នកមានសេចក្ដីសុខ, ការដែលធ្លាប់តែស្រណុក។

· សុភមង្គល៖ មង្គលល្អ, គ្រោះល្អ។

· កាតព្វកិច្ច៖ ដែលគួរធ្វើ, ដែលគប្បីឬត្រូវធ្វើ។

· ទំនុកបម្រុង៖ផ្គត់ផ្គង់, ផ្ចុងផ្ដើម ប្រុងនឹងឱ្យកើតកាលវាលគុម្ព, ជួយឧបត្ថម្ភ, គាំទ្រ។

១. គ្រួសារ

- មនុស្សគ្រប់រូបជាសមាជិកគ្រួសារ និងមានភារកិច្ច ដើម្បីក្លាយជាអ្នកមានទំនួលខុសត្រូវ និងមានតម្លៃ។ គ្រួសារទទួលខុសត្រូវចំពោះការរីកចម្រើន និងជាមូលដ្ឋានធនធានមនុស្សរបស់ប្រទេសជាតិ។ សមាជិកគ្រួសារមានសិទ្ធិទទួលការថែទាំ ការពាររូបរាងកាយ និងសិទ្ធិមនុស្សពីមេគ្រួសារ។ មេគ្រួសារខិតខំប្រឹងប្រែងចិញ្ចឹមផ្គត់ផ្គង់ និងបំពេញតម្រូវការរបស់សមាជិកគ្រួសារ (អាហារ សម្លៀកបំពាក់ ជម្រក ការអប់រំ ការថែទាំសុខភាព និងសុវត្ថិភាពរូបរាងកាយ)។ គ្រួសារជាកោសិកាសង្គម និងជាក្រុមមនុស្សដែលកើតចេញពីចំណងអាពាហ៍ពិពាហ៍តាមប្រពៃណី រស់នៅជាមួយគ្នា និងបន្តពូជពង្សជាខ្សែញាតិសន្តាន។ ឪពុកម្តាយមានកាតព្វកិច្ចចិញ្ចឹមរក្សា និងអប់រំកូនជាពលរដ្ឋល្អ រីឯកូនក៏មានករណីយកិច្ចចិញ្ចឹមបីបាច់ថែរក្សាមាតាបិតាដែលចាស់ជរាតាមទំនៀមទម្លាប់ខ្មែរ។ គ្រួសារមានពីរប្រភេទគឺ គ្រួសារតូច និងគ្រួសារធំ។

២. គ្រួសារតូច

- គ្រួសារតូច ជាគ្រួសារដែលមានម្តាយឪពុក និងកូនៗបង្កើតរស់នៅជាមួយគ្នា រួមមាន៖ គូស្វាមីភរិយា, ម្តាយឪពុក កូនប្រុស កូនស្រី, ម្តាយ កូនប្រុស កូនស្រី, ឬឪពុក កូនប្រុស កូនស្រី។

៣. សុខុមាលភាពនៃគ្រួសារតូច

- គ្រួសារតូចដែលមានកូនតិច មិនសូវជួបការលំបាក។ មេគ្រួសារងាយស្រួលក្នុងការផ្តល់តម្រូវការចាំបាច់គ្រប់គ្រាន់ (អាហារ សម្លៀកបំពាក់ ជម្រក ការអប់រំ ការថែទាំសុខភាព) និងមានសុភមង្គល។

v  គុណសម្បត្តិរបស់គ្រួសារតូចមានកូនតិច៖

• • • • ឪពុកម្តាយមានពេលវេលាសម្រាកលំហែ និងមានលទ្ធភាពបំពេញតម្រូវការកូន។

      • មានឱកាសច្រើនក្នុងការជួបជុំគ្នា និងកម្សាន្តផ្សេងៗ។

      • អាចផ្តល់ភាពកក់ក្តៅដល់កូន និងឪពុកម្តាយវ័យចាស់។

      • អាចបញ្ជូនកូនទៅរៀននៅសាលាល្អៗ និងទទួលបានការអប់រំខ្ពស់។

      • មានពេលវេលាគ្រប់គ្រាន់ក្នុងការថែរក្សាសុខភាពផ្ទាល់ខ្លួន។

      • អាចប្រើប្រាស់ប្រាក់ចំណូលប្រចាំថ្ងៃបានគ្រប់គ្រាន់សម្រាប់តម្រូវការគ្រួសារ និងអាចសន្សំប្រាក់បាន។

ប៉ុន្តែគ្រួសារតូចដែលមានកូនច្រើន អាចជួបការលំបាកក្នុងជីវភាព ប្រសិនបើប្រាក់ចំណូលតិច។

៤. គ្រួសារធំ

- គ្រួសារធំជាគ្រួសារដែលមានសមាជិកលើសពីម្តាយ ឪពុក និងកូនៗបង្កើត ដែលរស់នៅជាមួយគ្នាក្នុងបន្ទុកតែមួយ ឬក្រោមដំបូលផ្ទះតែមួយ។ អាចមានជីដូនជីតា ម្តាយឪពុក កូនប្រុសស្រី បងប្អូនប្រុសស្រី ពូ មីង ក្មួយប្រុសក្មួយស្រី។ល។

៥. សុខុមាលភាពនៃគ្រួសារធំ

- សុខភាព និងសុភមង្គលគ្រួសារអាស្រ័យលើចំនួនសមាជិក។ ឪពុកម្តាយខ្លះចង់បានកូនច្រើន ព្រោះគិតថាអាចទទួលបានការផ្គត់ផ្គង់ និងសេចក្តីសុខពេលចាស់។ គ្រួសារធំអាចមានកម្លាំងពលកម្មច្រើនសម្រាប់ធ្វើការងារផ្ទះ។ ការមានកូន ឬសមាជិកគ្រួសារច្រើនតែងជួបការលំបាកក្នុងការចិញ្ចឹមបីបាច់ថែរក្សា និងផ្តល់ចំណេះដឹង។

v  បញ្ហាដែលគ្រួសារធំអាចជួបប្រទះ (បើចំណូលតិច)

• • • • ចំណីអាហារមិនគ្រប់គ្រាន់ បណ្តាលឱ្យខ្វះខាតអាហារ និងជំងឺរាតត្បាត។

      • គ្មានលទ្ធភាពគ្រប់គ្រាន់ក្នុងការព្យាបាលអ្នកជំងឺ នៅពេលមានសមាជិកឈឺ។

      • មិនសូវមានលទ្ធភាពជួយកូនឱ្យសិក្សារៀនសូត្របានវែងឆ្ងាយ ដែលអាចបណ្តាលឱ្យកូនមានមុខរបរចំណូលទាបនៅពេលអនាគត។

      • សមាជិកគ្រួសារមានសុខភាពមិនល្អ ដោយសារខ្វះអាហារូបត្ថម្ភ និងខ្វះខាតថវិកាថែរក្សាសុខភាព។