(ជ៤) មេរៀនទី២៖ (សង្ខេបមេរៀន) តួនាទីនិងភារកិច្ចរបស់តំណាងសិស្ស

ជំពូកទី ៤              ការរស់នៅជាមួយសហគមន៍

មេរៀនទី២             តួនាទីនិងភារកិច្ចរបស់តំណាងសិស្ស

សេចក្ដីផ្ដើម

- ការដឹកនាំក្រុមជាសមត្ថភាពក្នុងការដឹកនាំប្រាប់ផ្លូវឱ្យសមាជិកក្រុមឈានទៅដល់ការសម្រេចគោលដៅរួមតាមពេលវេលាកំណត់មួយ ។ ជានិច្ចកាល ការដឹកនាំល្អរមែងមានទិសដៅមួយឆ្ពោះទៅរកភាពសុខសាន្ត ការអភិវឌ្ឍសម្រាប់ក្រុមទាំងមូល ។ ក្នុងនាមជាសិស្ស អ្នកអាចដឹងថា ខ្លួនអ្នកកំពុង ស្ថិតនៅក្នុងក្រុម ឬក្នុងថ្នាក់ នៅសាលារៀនមួយដែលតម្រូវឱ្យអ្នកចេះជួយគ្នាក្នុងការសិក្សា ចេះធ្វើការ ងារនិងបង្កើតស្នាដៃជាក្រុម ។ ដូចនេះ រាល់ភារកិច្ចរបស់អ្នកដឹកនាំក្រុម គឺត្រូវតែមានការចូលរួម របស់សិស្សដែលជាសមាជិកក្រុមគ្រប់ៗរូប ។

ពាក្យគន្លឹះ

• • • អភិវឌ្ឍ៖ចម្រើនក្រៃលែង, លូតលាស់ចម្រើន។

    • តំណាង៖ រូបតាង, រូបជំនួស។

    • គំរូ៖ បែប, សំណាក, តួយ៉ាង, ផែនទី។

    • វិន័យ៖ការដឹកនាំទៅរកផ្លូវល្អ; ច្បាប់, ច្បាប់បញ្ញត្តឬច្បាប់អនុញ្ញាត ច្បាប់ប្រដៅឱ្យប្រព្រឹត្តត្រឹមត្រូវ; ច្បាប់ប្រដៅឱ្យសង្រួមកាយវាចាឱ្យត្រឹមត្រូវ; ឱ្យចុះបែបបទ; ឱ្យមានសណ្ដាប់ធ្នាប់ល្អ។

១. តំណាងសិស្ស

- តំណាងសិស្ស ឬប្រធានថ្នាក់ គឺជាអ្នកតំណាងឱ្យសិស្សទាំងអស់នៅក្នុងថ្នាក់រៀន និងជាអ្នកជួយបំពេញការងារផ្សេងៗដល់លោកគ្រូ អ្នកគ្រូ ។ តំណាងសិស្សត្រូវបានជ្រើសរើសដោយការបោះឆ្នោតពីមិត្តរួមថ្នាក់ ។ តំណាងសិស្សត្រូវតែមានគំនិតផ្តួចផ្តើម និងការគិតគូរច្រើន ចំពោះការរីកចម្រើន និងការរួមសហការគ្នារបស់សមាជិកក្រុម ។

- តំណាងសិស្សត្រូវយកមតិយោបល់របស់សិស្សជាសមាជិកថ្នាក់រៀនមកពិចារណា មុននឹងសម្រេចចិត្តធ្វើអ្វីមួយ។ លក្ខណសម្បត្តិរបស់តំណាងសិស្សរួមមាន៖ មានគុណសម្បត្តិល្អ  ព្យាយាមរៀនសូត្រ មានចិត្តស្មោះត្រង់ រាក់ទាក់ បំពេញការងារផ្សេងៗ ដែលជាប្រយោជន៍រួមរបស់សិស្សទាំងអស់នៅក្នុងថ្នាក់រៀន អាចជាសិស្សស្រីឬសិស្សប្រុស ដែលត្រូវបានមិត្តភក្តិគោរពស្រឡាញ់ ។

២. តួនាទី និងភារកិច្ចរបស់តំណាងសិស្សនៅពេលជាប់ឆ្នោត

v  តួនាទី និងភារកិច្ចរបស់តំណាងសិស្សនៅពេលជាប់ឆ្នោតរួមាន:

·         ឧស្សាហ៍ព្យាយាមខិតខំធ្វើឱ្យមានការរីកចម្រើនក្នុងការសិក្សា ។

·         រក្សាអនាម័យបរិស្ថានក្នុងថ្នាក់រៀន និងសាលារៀន ។

·         រក្សាភាពសុខដុមរមនារបស់សិស្សនៅក្នុងថ្នាក់រៀនទាំងអស់ ។

·         ថែរក្សាឱ្យមានទំនាក់ទំនងល្អរវាងសិស្សនៅក្នុងថ្នាក់រៀនទាំងអស់ ។

·         ពិនិត្យតាមដានវត្តមាន អវត្តមានមិត្តរួមថ្នាក់ និងរកមូលហេតុនៃអវត្តមាន ។

·         លើកទឹកចិត្តមិត្តរួមថ្នាក់ឱ្យចូលរួមសម្អាតថ្នាក់រៀន និងសាលារៀន ។

·         ក្រើនរំលឹកចំពោះសិស្សណាដែលមិនគោរពវិន័យសាលារៀន ។

·         ធ្វើជាគំរូល្អដល់មិត្តរួមថ្នាក់ ។

·         ចេះផ្តួចផ្តើមគំនិតជួយសិស្សណាដែលជួបការលំបាកក្នុងការសិក្សា ។

·         ជំរុញ និងលើកទឹកចិត្តមិត្តរួមថ្នាក់ឱ្យចូលរួមក្នុងក្លឹបសិក្សា ។

·         បង្កបរិយាកាសឱ្យមានភាពរីករាយ មានទំនាក់ទំនងល្អ និងភាពស្និទ្ធស្នាលរវាងមិត្តរួមថ្នាក់ ។

ការដឹកនាំក្រុម៖គឺជាសមត្ថភាពក្នុងការដឹកនាំប្រាប់ផ្លូវឱ្យសមាជិកក្រុមឈានទៅដល់ការសម្រេចគោលដៅរួមតាមពេលវេលាកំណត់មួយ ។ ការដឹកនាំល្អរមែងមានទិសដៅមួយឆ្ពោះទៅរកភាពសុខសាន្ត និងការអភិវឌ្ឍសម្រាប់ក្រុមទាំងមូល ។ រាល់ភារកិច្ចរបស់អ្នកដឹកនាំក្រុម គឺត្រូវតែមានការចូលរួមរបស់សិស្សដែលជាសមាជិកក្រុមគ្រប់ៗរូប ។