(ជ៤) មេរៀនទី៣៖ (សង្ខេបមេរៀន) ដំណើរការនៃការបោះឆ្នោត

ជំពូកទី ៤ ការរស់នៅជាមួយសហគមន៍

មេរៀនទី៣ ដំណើរការនៃការបោះឆ្នោត

សេចក្ដីផ្ដើម

- ដំណើរការនៃការបោះឆ្នោតនៅក្នុងសង្គមប្រជាធិបតេយ្យ ត្រូវតែប្រព្រឹត្តទៅដោយសេរី ត្រឹម ត្រូវ និងស្មើភាព ។ ដើម្បីធានាដល់ដំណើរការនៃការបោះឆ្នោតនេះ គេត្រូវមានច្បាប់និងបទបញ្ញត្តិ ផ្សេងៗទៀត ដែលទាក់ទងទៅនឹងការបោះឆ្នោត ។ មធ្យោបាយមួយទៀតដែលអាចធានាឱ្យការបោះឆ្នោតប្រព្រឹត្តទៅបានត្រឹមត្រូវ គឺការអនុញ្ញាតឱ្យមានក្រុមអ្នកសង្កេតការណ៍អព្យាក្រឹតនិងមិនប្រកាន់ បក្សពួកចូលរួមសង្កេតមើលដំណើរការបោះឆ្នោត ។

ពាក្យគន្លឹះ

• • • អព្យាក្រឹត៖ ដែលមិនច្បាស់; ពុំប្រាកដ, មិនដាច់ស្រេច, មិនស្រេចជាទៅខាងណា; ដែលជាកណ្ដាល។

    • បញ្ញត្តិ៖ សេចក្ដីហាមប្រាម, បម្រាម, សេចក្ដីដែលគេតែងតាំង, រៀបចំ; ពាក្យដែលគេកំណត់ហៅ

    • យុត្តិធម៌៖ ធម៌ដែលគួរកាន់; សេចក្ដីទៀងត្រង់; ការប្រព្រឹត្តត្រឹមត្រូវ។

    • សុវត្ថិភាព៖ ការមានសួស្ដី, ការប្រកបដោយសេចក្ដីសុខ។

១. ការបោះឆ្នោតជាចំហ

- ការបោះឆ្នោតជាចំហឬការបញ្ចេញមតិតាមរយៈការលើកដៃ គឺជាការបោះឆ្នោតដោយចំហ ដោយអ្នកបោះឆ្នោតម្នាក់ៗសម្តែងការគាំទ្រដល់ការជ្រើសរើសបេក្ខជនតាមការសម្រេចចិត្តនិងតាម គោលបំណងរបស់ខ្លួនតាមរយៈការលើកដៃ ដោយមិនប្រើសន្លឹកឆ្នោតទេ ។ ការបោះឆ្នោតតាមវិធីនេះ គេអាចដឹងថា នរណាខ្លះគាំទ្រនិងនរណាខ្លះមិនគាំទ្រ។

v ការបោះឆ្នោតតាមរយៈការលើកដៃអាចមាន គុណវិបត្តិដូចខាងក្រោម៖

· គេអាចស្គាល់បានចំពោះអ្នកបោះឆ្នោតដែលបោះឆ្នោតគាំទ្រឬមិនគាំទ្រ ។

· ការសម្រេចចិត្តមិនស្របតាមបំណងរបស់ខ្លួន ព្រោះអ្នកបោះឆ្នោតខ្លះលើកដៃតាមអ្នកដទៃ ។

· ការព្រួយបារម្ភ ការភ័យខ្លាចពីសុវត្ថិភាពផ្ទាល់ខ្លួន ។

· អ្នកបោះឆ្នោតពុំមានសេរីភាពក្នុងការសម្រេចចិត្តតាមការពេញចិត្តរបស់ខ្លួន ។

២. ការបោះឆ្នោតជាសម្ងាត់

- ការបោះឆ្នោតជាសម្ងាត់តាមរយៈសន្លឹកឆ្នោត គឺជាការធានាអាថ៌កំបាំងនៃការសម្រេចចិត្តរបស់អ្នកបោះឆ្នោតម្នាក់ៗ នៅលើសន្លឹកឆ្នោត ។ អ្នកបោះឆ្នោតមានសិទ្ធិសម្រេចដោយសេរីតាមបំណងផ្ទាល់ខ្លួន ដោយគ្មានការព្រួយបារម្ភ ការបង្ខិតបង្ខំ ការគំរាមកំហែង ការភ័យខ្លាច ។ ពួកគេសម្រេចចិត្តគូសលើសន្លឹកឆ្នោតមួយសន្លឹក ដោយផ្អែកតាមបំណងប្រាថ្នារបស់ខ្លួន ហើយ មិនធ្វើតាមចំណង់ចំណូលចិត្ត ឬការគាបសង្កត់ពីអ្នកដទៃ ។ អ្នកបោះឆ្នោតបានដឹងយ៉ាងពិតប្រាកដ និងមានការជឿជាក់លើខ្លួនឯងថា គ្មានវិធីណាមួយដែលអាចដឹងបានពីការសម្រេចចិត្តរបស់ខ្លួនក្នុងការគូស លើសន្លឹកឆ្នោតនោះទេ ក្រៅពីសាមីខ្លួនតែប៉ុណ្ណោះ ។