ជំពូកទី២ មិត្តភាព
មេរៀនទី៣ សារៈសំខាន់នៃមិត្តភាពល្អ
សេចក្ដីផ្ដើម
- ទំនាក់ទំនងមិត្តភាពមានសារៈសំខាន់ណាស់ ។ មនុស្សដែលធ្លាប់មានចំណងមិត្តភាពតែងតែនឹក រលឹកគ្នាទៅវិញទៅមក ដោយមិនគិតថារស់នៅជិតឬឆ្ងាយពីគ្នាឡើយ ។ មិត្តល្អតែងតែស្រឡាញ់ គោរព រាប់អានគ្នា និងជួយទុក្ខធុរៈគ្នាគ្រប់ពេលវេលានិងគ្រប់ទីកន្លែង ។ តាមទស្សនៈអប់រំបែប សាសនាព្រះពុទ្ធ មិត្តមានពីរប្រភេទ គឺកល្យាណមិត្ត (មិត្តល្អ) និងបាបមិត្ត (មិត្តមិនល្អ) ។
ពាក្យគន្លឹះ
· ឧបការៈ៖ការទំនុកបម្រុង, ការផ្គត់ផ្គង់, ការផ្ចុងផ្ដើម; ការអនុលោមតាម; ប្រយោជន៍, គុណប្រយោជន៍។
· លទ្ធភាព៖ ភាពនៃអ្វីៗដែលបានសម្រេចហើយ។
· ទស្សនៈ៖ ការឃើញ, ដំណើរយល់ឃើញ; បញ្ញាសាមញ្ញ; លទ្ធិ; ភ្នែក; អាទិមគ្គ គឺសោតាបត្តិមគ្គ។
· គង់វង្ស៖គង់ពូជវង្សនៅមិនសូន្យ, គង់ដំណែល ឬប្រពៃណីនៅដូចដើម។
១. ការជ្រើសរើសមិត្តល្អ
- មិត្តល្អមានបួនប្រភេទដែលគួររាប់រក៖
១.១. មិត្តមានឧបការៈ
- មិត្តមានឧបការៈ គឺមិត្តមានការទំនុកបម្រុង មានអធ្យាស្រ័យល្អ ចេះលើកលែងកំហុស ចំពោះមិត្តដែលបានប្រព្រឹត្តខុស និងតែងជួយផ្គត់ផ្គង់ដល់មិត្តដែលមានជីវភាពខ្វះខាតតាមលទ្ធភាព ។
១.២. មិត្តចិត្តមួយថ្លើមមួយ
- មិត្តចិត្តមួយថ្លើមមួយគឺមិត្តចេះរួមសុខទុក្ខជាមួយគ្នា សម្តែងសេចក្តីស្មោះត្រង់ចំពោះមិត្ត គ្រប់កាលៈទេសៈ ហើយមិនបោះបង់ចោលមិត្តឡើយនៅពេលឃើញមិត្តមានអាសន្នឬមានទុក្ខ ។
១.៣. មិត្តណែនាំឱ្យធ្វើតែអំពើល្អ
- ណែនាំមិត្តឱ្យតាំងខ្លួននៅក្នុងអំពើល្អនិងរស់នៅដោយគន្លងធម៌ ហើយហាមប្រាមនៅពេលឃើញមិត្តបម្រុងនឹងធ្វើរឿងមិនល្អ ។
១.៤. មិត្តមានទឹកចិត្ត
- ពេលមិត្តមានទុក្ខ ជួយលួងលោមនិងរំលែកទុក្ខជាមួយមិត្ត ពេលមិត្តបានសុខ ជួយត្រេកអរនិងជួយសប្បាយរីករាយជាមួយមិត្ត និងជួយនិយាយបកស្រាយការពារមិត្តនៅពេលគេនិយាយបង្អួចកេរ្តិ៍ឈ្មោះមិត្ត ។
២. សារៈសំខាន់នៃមិត្តភាពល្អ
- ការជួយធុរៈគ្នាទៅវិញទៅមក ជាការចាំបាច់ចំពោះទំនាក់ទំនងមិត្តភាព ។ មិត្តភាពល្អ គឺជាវត្ថុដ៏មានតម្លៃកម្រនឹងរកបាន ហើយយើងត្រូវស្វែងរកមិត្តដែលចេះស្រឡាញ់ យល់ចិត្តថ្លើមគ្នា និងមានចិត្តដូចដែលយើងមានចំពោះគេដែរ ។ យើងមិនត្រូវគិតអ្វីសម្រាប់តែខ្លួនឯងម្នាក់នោះទេ តែយើងគិតចំពោះអ្នកដទៃ ដែលជាមិត្តរបស់យើងផងដែរ ពីព្រោះមិត្តគឺជាមនុស្សម្នាក់ដែលនៅចាំជួយយើងជានិច្ច ។ មានមិត្តល្អ ចេះយល់ចិត្តគ្នាគឺមានសេចក្តីសង្ឃឹមក្នុងការរស់នៅ ។ ដូច្នេះ មិត្តភាពល្អមានសារៈសំខាន់ណាស់ យើងត្រូវថែរក្សា និងការពារមិត្តភាពល្អនេះឱ្យបានស្ថិតស្ថេរយូរអង្វែង ។
បានកែប្រែចុងក្រោយ: ថ្ងៃពុធ ទី20 ខែសីហា ឆ្នាំ2025, 10:47 AM
