ជំពូកទី ១ យេនឌ័រ និងសិទ្ធិមនុស្ស
មេរៀនទី២ ផ្នត់គំនិត
សេចក្ដីផ្ដើម
- មនុស្សគ្រប់រូបទាំងស្រី ទាំងប្រុស តែងមានរូបរាងកាយនិងចិត្តគំនិត ។ល។ រូបរាងកាយរបស់ មនុស្សគ្រប់រូបមានការវិវឌ្ឍ ប្រែប្រួល និងផ្លាស់ប្តូរទៅតាមវ័យនិងតាមស្ថានភាពសុខភាព ។ ឯចិត្តគំនិត ក៏មានការប្រែប្រួលវិវត្តទៅតាមស្ថានភាពសុខភាព កម្រិតនៃការយល់ដឹង និងការពិចារណា ។
ពាក្យគន្លឹះ
· សុខភាព៖ ភាពមានសេចក្តីសុខពេញលេញផ្នែកកាយសម្បទា ផ្លូវចិត្ត និងផ្នែកសង្គម មិនមែនគ្រាន់តែជាភាពគ្មានជំងឺឬពិការឡើយ ។
· ចិត្តគំនិត៖ ការប្រែប្រួលវិវត្តទៅតាមស្ថានភាពសុខភាព កម្រិតនៃការយល់ដឹង និងការពិចារណា ។
· ផ្នត់គំនិត៖ ជាបុរេនិច្ឆ័យ ឬជំនឿតៗគ្នា ការឮដដែលៗ និងការយល់ឃើញ ដែលបានបង្កើតឡើងដោយសង្គមទៅតាមវប្បធម៌របស់ខ្លួន និងត្រូវបានអនុវត្តជាទូទៅលើក្រុមមនុស្សណាមួយ ។
· បទដ្ឋានសង្គម៖ កំណត់ថាជាទម្រង់នៃការយល់ឃើញដែលបានក្លាយទៅជាបទដ្ឋានសង្គមដែលពិបាកនឹងកែប្រែ ។
១. សុខភាព និងចិត្តគំនិត
- សុខភាព គឺជាភាពមានសេចក្តីសុខពេញលេញផ្នែកកាយសម្បទា ផ្លូវចិត្ត និងផ្នែកសង្គម មិនមែនគ្រាន់តែជាភាពគ្មានជំងឺ ឬពិការឡើយ ។ សុខភាពផ្លូវចិត្ត និងផ្លូវកាយ មាំមួនពុំមានជំងឺផ្សេងៗប្រចាំកាយ រមែងញ៉ាំងឱ្យជីវិតរស់នៅប្រចាំថ្ងៃប្រកបដោយសេចក្តីសុខ និងមានអារម្មណ៍ ចិត្តគំនិតស្រស់ថ្លាជាប្រចាំ ។ អ្នកឯកទេសខាងសុខភាពផ្លូវចិត្តបានឯកភាពគ្នាជាទូទៅថា អ្នកមានសុខភាពផ្លូវចិត្តល្អ តែងតែមានអារម្មណ៍ស្រស់ថ្លា មានអាកប្បកិរិយា និងទំនាក់ទំនងល្អជាមួយមនុស្សជុំវិញខ្លួន ហើយមានសមត្ថភាពអាចដោះស្រាយបញ្ហាផ្សេងៗ បានដោយអារម្មណ៍វិជ្ជមាន និងអាចបំពេញការងារក្នុងជីវិតរស់នៅបានយ៉ាងល្អប្រសើរ ។
២. ផ្នត់គំនិត
- ផ្នត់គំនិត ជាបុរេនិច្ឆ័យ ឬជំនឿតៗគ្នា ការឮដដែលៗ និងការយល់ឃើញ ដែលបានបង្កើតឡើងដោយសង្គមទៅតាមវប្បធម៌របស់ខ្លួន និងត្រូវបានអនុវត្តជាទូទៅលើក្រុមមនុស្សណាមួយ ដូចជាក្រុមជនជាតិ ជាតិសាសន៍ដទៃ ភេទ ។ ម្យ៉ាងទៀត គេអាចកំណត់ថា«ផ្នត់គំនិត» ជាទម្រង់នៃការយល់ឃើញដែលជាប់ដិតដាមនៅក្នុងគំនិតនិងអារម្មណ៍របស់មនុស្សនៅក្នុងសង្គមណាមួយ ហើយបានក្លាយទៅជាបទដ្ឋានសង្គមដែលពិបាកនឹងកែប្រែ ។
- ផ្នត់គំនិតមានពីរប្រភេទហើយប្រែប្រួលទៅតាមកាលៈទេសៈនិងការវិវត្តរបស់សង្គម គឺ៖
· ផ្នត់គំនិតវិជ្ជមាន៖ ជាផ្នត់គំនិតជឿនលឿន និងជាគំនិតមានការអភិវឌ្ឍ មានការពិចារណាសមហេតុផល ។ ឧទាហរណ៍៖ ស្រីក៏អាចរៀន និងធ្វើការងារដូចបុរសបានដែរ។
· ផ្នត់គំនិតអវិជ្ជមាន៖ គឺធ្វើតាមទម្លាប់និយម ។ ឧទាហរណ៍៖ ស្រីវិលចង្ក្រានមិនជុំ ។
បានកែប្រែចុងក្រោយ: ថ្ងៃច័ន្ទ ទី25 ខែសីហា ឆ្នាំ2025, 8:26 AM
