(ជ៣) មេរៀនទី២៖ (សង្ខេបមេរៀន) សុភមង្គលគ្រួសារ

ជំពូកទី ៣              គ្រួសារ

មេរៀនទី២            សុភមង្គលគ្រួសារ

សេចក្ដីផ្ដើម

- បន្ទាប់ពីរៀបមង្គលការតាមប្រពៃណីជាតិរួចស្វាមីភរិយាគ្រប់រូបតែងប្រាថ្នាចង់រស់នៅក្នុងសុភមង្គល ។ មង្គលការបានធ្វើឱ្យពួកគេក្លាយជាប្តីប្រពន្ធស្របច្បាប់ក្នុងសង្គម ។ ដូច្នេះ ស្វាមីភរិយាចាំ បាច់ត្រូវស្វែងយល់ឱ្យបានច្បាស់ពីសិទ្ធិ តួនាទី ភារកិច្ច និងការទទួលខុសត្រូវរបស់ពួកគេរៀងខ្លួន ដើម្បី សុភមង្គលគ្រួសារ ។

ពាក្យគន្លឹះ

• • • សិទ្ធិ៖ សេចក្ដីសម្រេច, សេចក្ដីសម្រេចផល ឬផលសម្រេច, ការសម្រេចប្រយោជន៍,ការដាច់ស្រេច, ការសមប្រកប, ការសមតាមបំណង, សេចក្ដីសុខ, សេចក្ដីចម្រើន, សេចក្ដីស័ក្ដិសិទ្ធិ, សេចក្ដីខ្លាំងពូកែ, សេចក្ដីសម្បូណ៌, សេចក្ដីសម្រេចតាមអំណាចច្បាប់, អំណាច, សេចក្ដីអង់អាច,មុខការដែលត្រូវសម្រេចលើខ្លួន។

    • សុភមង្គល៖ មង្គលល្អ, គ្រោះល្អ។

    • ភារកិច្ច៖ ដែលគួរធ្វើ, ដែលគប្បី ឬត្រូវធ្វើ។

    • សុខដុម៖ ការនៅផ្ដុំគ្នា ឬនៅមូលគ្នាជាសុខឥតមោះហ្មង ឬសេចក្ដីរីករាយសប្បាយ ដោយការនៅមូលគ្នាជាសុខស្រួល។     

១. និយមន័យនៃសុភមង្គលគ្រួសារ

- សុភមង្គលមានន័យថា មង្គលល្អ គ្រោះល្អ សេចក្តីសុខ និងសេចក្តីចម្រើន ។ ដូច្នេះសុភមង្គលគ្រួសារគឺសំដៅទៅលើគ្រួសារដែលមានសេចក្តីសុខ និងសេចក្តីចម្រើន ។ ជាធម្មតាសេចក្តីសុខមានពីរប្រការគឺសុខផ្លូវកាយ និងសុខផ្លូវចិត្ត ។ សុខផ្លូវកាយមានន័យថារាងកាយមានសុខភាពល្អ គ្មានអំពើហិង្សា គ្មានការរំលោភបំពាន ហើយលើសពីនេះ គឺមានទ្រព្យសម្បត្តិសម្រាប់បំពេញសេចក្តីត្រូវការ និងសម្រួលដល់ការរស់នៅបានប្រសើរ ។ ចំណែកសុខផ្លូវចិត្តវិញ គឺចិត្តបានស្ងប់ មានអារម្មណ៍ល្អ គ្មានការគំរាមកំហែង ឬធ្វើបាបផ្លូវចិត្ត និងមានគំនិតភ្លឺថ្លា ។ ខ្មែរយើងតែងពោលថា "សុខកាយ សប្បាយចិត្ត" ដែលមានន័យថា សុខទាំងផ្លូវកាយ និងសុខទាំងផ្លូវចិត្ត ទើបប្រសើរ ។ សរុបមក សុភមង្គលគ្រួសារគឺមានន័យថា សមាជិកគ្រួសារមានសេចក្តីសុខ សេចក្តីចម្រើនទាំងផ្លូវកាយ និងផ្លូវចិត្ត ។ គ្រួសារមួយដែលមានសុភមង្គល គឺគ្រួសារដែលមានភាពសុខដុមរមនា គ្មានអំពើហិង្សា និងគ្មានការរើសអើងចំពោះកូនប្រុសស្រី ។

២. ប្រភពនៃសុភមង្គលគ្រួសារ 

- ប្រភពនៃសុភមង្គលគ្រួសារ គឺជាអ្វីៗដែលធ្វើឱ្យគ្រួសារបានសេចក្តីសុខ និងសេចក្តីចម្រើន ។ តាមការសង្កេតជាទូទៅ ប្រភពនៃសុភមង្គលគ្រួសារមានកត្តាសំខាន់ៗមួយចំនួន ៖

២.១. ការប្រាស្រ័យទាក់ទងក្នុងក្រុមគ្រួសារ

- ភរិយា ស្វាមី ជាម្តាយឪពុក និងជាសមាជិកដ៏សំខាន់ក្នុងគ្រួសារ ត្រូវបង្ហាញអាកប្បកិរិយាជាគំរូល្អដល់កូន ។ ការរីកចម្រើន និងសុភមង្គលក្នុងគ្រួសារពឹងផ្អែកលើការយល់ដឹងច្បាស់លាស់របស់ស្វាមីភរិយាពីសិទ្ធិ និងភារកិច្ចរបស់ពួកគេ ។

២.២. សុខភាពជាទ្រព្យសម្បត្តិ

- សុខភាពផ្លូវកាយ និងផ្លូវចិត្ត គឺជាធនធានមួយដ៏មានតម្លៃបំផុត ព្រោះ "ការមិនមានរោគគឺជាលាភដ៏ប្រសើរ" ។ ក្រៅពីនេះ គេហដ្ឋានដែលស្អាត មានអនាម័យល្អ មានខ្យល់ និងពន្លឺថ្ងៃចេញចូលគ្រប់គ្រាន់ ក៏អាចផ្តល់ផាសុកភាពដល់គ្រួសារទាំងមូលបានដែរ ។

២.៣. សេដ្ឋកិច្ចគ្រួសារ

- គ្រួសារដែលមានជីវភាពធូរធារអាចនាំឱ្យមានបរិយាកាសរីករាយ ។ គ្រួសារដែលធូរធារមានលទ្ធភាពគ្រប់គ្រាន់ក្នុងការផ្តល់តម្រូវការចាំបាច់ឱ្យសមាជិកគ្រួសារ ដូចជាការចិញ្ចឹមបីបាច់ថែរក្សា និងការបញ្ជូនកូនឱ្យទៅសាលារៀនបានគ្រប់ៗគ្នាជាដើម ។