រឿងនេះនិយាយអំពីប្រវត្តិបុរស និងស្រ្តីពីរនាក់ លួចស្រឡាញ់គ្នា ហើយពេលប្រពន្ធដើមដឹងរឿងរ៉ាវក៏យដែកគោលដុំចោះត្រចៀកនាងប្រពន្ធចុងដើម្បីឱ្យរាងចាល។ តែក្រោយមកដើម្បីកុំឱ្យខ្មាសគេ ប្តីនាងយកឱ្យជាងធ្វើកញ្ចាំងដាំត្បូងពេជ្ររំលេចជាក្បាច់រចនាពាក់បិទបាំងឱ្យនាងកន្លែងចោះនោះ ក៏មានលម្អប្លែក នាំឱ្យស្រ្តីដទៃទៀត ដែលឃើញថាល្អស្អាតក៏នាំគ្នា ចោះត្រចៀកពាក់ក្រវិល ទុំហូ កាវ តាមនាងនោះមានជាតំណរៀងមក។ រឿងនេះកើតឡើងតាំងពីសម័យបុរាណ តាមទំនៀមពីបុរាណកាលមកក្មេងស្រីៗ សុទ្ធតែចោះត្រចៀកគ្រប់ៗគ្នាទាំងអស់។ រហូតមកដល់សម័យបច្ចុប្បន្ននេះក៏នៅតែធ្វើការចោះត្រចៀក។ គេចោះត្រចៀកទុក សម្រាប់ទុកពាក់គ្រឿងអលង្ការផ្សេងៗ មានដូចជា កាវ ទុំហូ ជាដើម។
