និយមន័យ៖ លក្ខណតថៈនៅក្នុងរឿង គឺជារឿងរ៉ាវ ហេតុការណ៍ ព្រឹត្តិការណ៍ ឈ្មោះ (តួអង្គ) ទីកន្លែង សកម្មភាព... ដែលមានពិតនៅក្នុងសង្គមជាក់ស្តែង ហើយត្រូវបានអ្នកនិពន្ធបញ្ចូល ឬផ្សារភ្ជាប់ទៅនឹងដំណើររឿងដោយរួមផ្សំ នឹងមនោគតិរបស់ខ្លួន ។ អក្សរសិល្ប៍ ដែលមានលក្ខណតថៈ គឺជាអក្សរសិល្ប៍ដែលបានបង្ហាញពីសច្ចភាព សង្គមនាសម័យកាលណាមួយ រួមផ្សំនឹងគំនិតច្នៃប្រឌិតរបស់អ្នកនិពន្ធបង្កើត បានជាស្នាដៃអក្សរសិល្ប៍។
- តាមរយៈ រឿង តាដុងយាយជ័យ អ្នកនិពន្ធបានផ្សារភ្ជាប់ដំណើររឿងទៅនឹងឈ្មោះទីកន្លែងពិតប្រាកដនៅក្នុងប្រវត្តិសាស្រ្តប្រទេសកម្ពុជាយើង ហើយឈ្មោះទាំងនោះនៅស្ថិតស្ថេររហូតមកដល់បច្ចុប្បន្ន ដូចជាផ្ទះនាងទែននៅក្នុងភូមិស្រែរនោង ពាក្យអ្នកស្រុក សរសើរនាង ត្រចើល ដោះក្រាល នៅពេលនាងកាន់ក្អមដងទឹកដើរញ៉ែងញ៉ង ទីកន្លែងដែលដើរនោះ ជាប់ឈ្មោះជា ភូមិ ញ៉ែងញ៉ង និងឃុំ ញ៉ែងញ៉ង។ កន្លែង អណ្តូងទឹក ដែលអ្នកស្រុកសរសើរនាងថាសស្គុស ជាប់ឈ្មោះមកដល់សព្វថ្ងៃថា ឃុំគុស។ ភូមិឃុំទាំងអស់នេះ សព្វថ្ងៃស្ថិតក្នុងស្រុក ត្រាំកក់ ខេត្ត តាកែវ។
- តាមរយៈ រឿង ភូមិតិរច្ឆាន អ្នកនិពន្ធបានផ្សារភ្ជាប់ដំណើររឿងទៅនឹងព្រឹត្តិការណ៍ប្រវត្តិសាស្រ្តប្រទេសកម្ពុជាយើង ដែលស្ថិតក្រោមអាណានិគមបារាំង។ វគ្គទី៩ នេះបង្ហាញពីទុក្ខវេទនារបស់ប្រជាជនកម្ពុជា ដែលត្រូវបានបារាំងជំរិតឱ្យបង់ពន្ធគ្រប់ប្រភេទ តាំងពីដីស្រែ ចម្ការ មុខរបរ រហូតដល់អត្តសញ្ញាណប័ណ្ណថែមទៀត។
