ព័ត៌មានជំនួយ
យើងធ្លាប់សិក្សារួចមកហើយអំពីសំណេរពន្យល់ សំណេរបំពេញលិខិតផ្លូវការ កិច្ចសន្យាជួល លក់ សំណេរវិភាគអត្ថបទ សំណេរសំយោគលើទស្សនៈ មតិ យោបល់ និងអ្វីមួយ។ នេះជាសំណេររឿងប្រឌិតដែលមានភាពសាំញ៉ាំដែលខុសប្លែកពីសំណេរមុន៖
គម្រោងតែង
១. ការផ្តើមរឿង៖ ដោយការប្រើពាក្យពេចន៍ ឃ្លា ល្បះ ៖
- កាលពីព្រេងនាយ...
- កាលដើមឡើយ...
- តាំងពីយូរលង់ណាស់មកហើយ...។
២. តួរឿង៖
ផ្អែកលើគោលសំខាន់ៗ៖
- តួរឿង៖ ចំនួនតួអង្គ.តួអង្គឯក.តួអង្គរង.តួអង្គបន្ទាប់បន្សំ...
- ប្រភេទតួអង្គ៖ មនុស្ស.សត្វ.ទេវតា.យក្ស.អារក្ស.អ្នកតា...
- រចនាសម្ព័ន្ធតួអង្គ៖ បងប្អូន.មិត្តភក្តិ.បុព្វបុរស.វីរបុរស...
- សកម្មភាពតួអង្គ៖ តួអង្គនីមួយៗធ្វើអ្វីខ្លះ។
- កាលអាកាស៖
+ ទីកន្លែង៖ តួអង្គធ្វើសកម្មភាព (ភូមិ ស្រុក ស្ថានមនុស្ស ស្ថានសួគ៌...)
+ ពេលវេលា៖ ថ្ងៃ យប់ រដូវណាមួយ ឆ្នាំណាមួយ រយៈពេលប៉ុន្មាន
+ ទំនាស់៖ សរសេរបង្ហាញពីទំនាស់មិនចុះសម្រុងនឹងគ្នា
+ តួអង្គមានទំនាស់ជាមួយនឹង៖ អ្នកដទៃ ធម្មជាតិ ខ្លួនឯង...
+ សរសេរ ឬកំណត់ទំនាស់៖ ដែលបង្កើតឲ្យមានក្នុងរឿងចំនួនប៉ុន្មាន មានប៉ុន្មានព្រឹត្តិការណ៍ធំ ព្រឹត្តិការណ៍តូច...។
- ចំណោទបញ្ហា៖ សរសេរបង្ហាញពីបញ្ហាដែលកើតទំនាស់ ហើយបង្កើតបានជាព្រឹត្តិការណ៍មានជាបន្តបន្ទាប់គ្នាចំណោទបញ្ហា ៤ដំណាក់៖
+ ស្ថានភាពដើម៖ ដោយបង្កើតនូវបុព្វហេតុនៃទំនាស់ ពេលកើតឡើងនៃទំនាស់ ទីកន្លែងនៃទំនាស់ ទំនាស់ជាមួយតួអង្គណាខ្លះ និងសរសេរពង្រីកលក្ខណៈនៃទំនាស់របស់រឿងឲ្យកាន់តែមានភាពស្មុគស្មាញសាំញ៉ាំ។
+ ភាពសាំញ៉ាំ៖ សរសេរបង្ហាញពីតួអង្គណាខ្លះដែលជាអ្នកចូលរួមពាក់ព័ន្ធក្នុងបញ្ហាទំនាស់នោះ។
+ ចំណងបញ្ហា៖ បញ្ហាទំនាស់ឈានដល់ខ្ពស់ ឬទំនាស់ស្រួចស្រាល។
+ ដំណោះស្រាយ៖ ដោយវិធីផ្សេងៗដូចជាសន្តិវិធី មានអន្តរាគមន៍ពីតួអង្គណាខ្លះ អន្តរាគមន៍យ៉ាងដូចម្តេច...។
៣. ការបញ្ចប់រឿង៖
ជាដំណោះស្រាយចុងក្រោយបំផុតនៃរឿង៖
- ឱ្យតួអង្គណាខ្លះជាអ្នកទទួលជ័យជម្នះ
- ឱ្យតួអង្គណាជាអ្នកចាញ់
- អំពើល្អឈ្នះអំពើអាក្រក់
- យុត្តិធម៌ឈ្នះអយុត្តធម៌។ល។