តើកាព្យរូបារម្មណ៍ជាអ្វី ?
១. និយមន័យ
កាព្យរូបារម្មណ៍ គឺជារូបារម្មណ៍ដែលមានក្នុងអត្ថបទកាព្យ។ កាព្យរូបារម្មណ៍ គឺអារម្មណ៍ដែលហាក់ដូចជាមើលឃើញរូប ស្ដាប់ឮ ប៉ះពាល់ទៅដឹង តាមរយៈឃ្លោងឃ្លា ឬការព៌ណនារបស់កវី ក្នុងអត្ថបទកាព្យ។
ដើម្បីឱ្យអត្ថបទកាព្យរបស់ខ្លួនមានអត្ថន័យល្អប្រកបដោយកាព្យរូបារម្មណ៍ កវីត្រូវចេះជ្រើសរើស សំនួនសេចក្ដី សំនួនសម្ដី ពាក្យពេចន៍ផ្សេងៗ មកផ្សំជាឃ្លាល្បះ និងប្រើសំនួនគំនិត ធ្វើយ៉ាងណាដើម្បីតុបតែងពាក្យជួនឱ្យមានលក្ខណៈប្លែកពិសស មានសម្ផស្ស មានភាពពីរោះ និងភាពរស់រវើករំញោចសរីរាង្គ ឥន្ទ្រីអ្នកអាន អ្នកស្ដាប់ ឱ្យរំភើបញាប់ញ័រ សប្បាយជក់ចិត្ត ដិតអារម្មណ៍ ចង់អាន ចង់ស្ដាប់។
តើកាព្យរូបារម្មណ៍មានអ្វីខ្លះ ?
២. កាព្យរូបារម្មណ៍មានច្រើនយ៉ាងដូចជា៖
បំរៀបន័យរូបារម្មណ៍ ជាវិធីសមានកម្មវត្ថុ ឬគំនិតទៅនឹងវត្ថុ ហើយនឹងបាតុភូតនៅក្នុងឥន្រ្ទីយ៍ភាព ឬសិល្ប៍ឧបមានទៅលើបាតុភូតពីរដែលមានលក្ខណៈក្រៅដូចគ្នា ដើម្បីបំភ្លឺសារៈខាងក្នុងនៃបាតុភូតមួយតាមរយៈបាតុភូតមួយទៀត។
រូបារូប្យារម្មណ៍ ជាអារម្មណ៍ដែលបង្កើតឡើងដោយកវីចេះប្រើពាក្យពេចន៍ទាក់ទងនឹងការបង្ហាញពីប្រព័ន្ធនៃជីវរូបារម្មណ៍ ដូចជា៖
ក. ចក្ខុរូបារម្មណ៍៖ កវីប្រើពាក្យពេចន៍ទាក់ទាញហាក់ឃើញផ្ទាល់ភ្នែក។
ខ. សោតរូបារម្មណ៍៖ កវីប្រើពាក្យពេចន៍ទាក់ទងការបង្ហាញពីសូរសំឡេងរណ្តំ ស្រៈ រណ្តំព្យញ្ជនៈទាក់ទងនឹងសូរសំឡេងធម្មជាតិ ដែលធ្វើឱ្យយើងស្តាប់ឮមានចិត្តរំភើប...។
គ. ឃានជីវ្ហារូបារម្មណ៍៖ គឺជារូបារម្មណ៍ដែលកើតឡើងដោយការប៉ះទង្គិចរវាងក្លិនក្រអូប ស្អុយ ឆ្អេះឆ្អាប រសផ្អែម ជូរចត់... ទៅនឹងឃានច្រមុះនិងជីវ្ហា (ការដឹងដោយអណ្តាត)។
