១. និយមន័យ
- គុណកិរិយា ឬកិរិយាវិសេសន៍ គឺជាធាតុមិនចាំបាច់ខាងផ្នែកវេយ្យាករណ៍
ដែលគេប្រើដើម្បីបញ្ជាក់ន័យឱ្យ កិរិយាសព្ទ គុណនាម និងគុណកិរិយា។
- គុណកិរិយា គឺជាពាក្យសម្រាប់សម្គាល់លក្ខណៈរបស់កិរិយាសព្ទ គុណនាម។
២. ប្រភេទគុណកិរិយា
គុណកិរិយាមានច្រើនប្រភេទ ដូចជា៖ គុណកិរិយាបំណែប, គុណកិរិយាកាល, គុណកិរិយាកន្លែង, គុណកិរិយាសំណួរ និងគុណកិរិយាបរិមាណ។
+ គុណកិរិយាកាល គឺជាពាក្យសម្រាប់សម្ដែងនូវលក្ខណៈរបស់កិរិយា ដូចជា ៖ ស្អែក ពេលនេះឆ្នាំនេះ យប់មុន ហើយបញ្ជាក់ពីកាល។
- ស្អែកបុប្ផា នឹងទៅប្រឡងនៅមណ្ឌលវិទ្យាល័យសាមគ្គី។
- បងខ្ញុំទៅចម្ការនៅព្រឹកស្អែក។
- ខ្ញុំបោសថ្នាក់រួចហើយអំបាញ់មិញនេះ។
- លោកគ្រូដាក់លំហាត់ឱ្យធ្វើរៀងរាល់ថ្ងៃ។
+ គុណកិរិយាកន្លែង ជាពាក្យ ឬកន្សោមពាក្យសម្រាប់បញ្ជាក់ទីកន្លែងរបស់កិរិយានៅក្នុងល្បះ។
- សំចេញទៅខាងក្រៅហើយ។
- ឯងមកទីនេះ ខ្ញុំទៅទីនោះ។
- បុប្ផាប្រឡងនៅមណ្ឌលវិទ្យាល័យសាមគ្គី។
+ គុណកិរិយាសំណួរ គឺជាគុណកិរិយាសម្រាប់សួរទីកន្លែង កាល ហេតុ បែបបទ បំណងរបស់កិរិយា។
- ហេតុអ្វីបានជាសុខាសរសេរចម្លើយយឺត?
- តើបងប្រុសរបស់ឯង គាត់នៅទីណា?
+ គុណកិរិយាបរិមាណ គុណកិរិយាបរិមាណ គឺជាពាក្យដែលបង្ហាញពី ចំនួន ទំហំ ប្រវែង។
- គាត់មកដល់យឺតពេក។
- សិស្សនេះឆ្លាតណាស់។
- សុខាធ្វើវិញ្ញាសាគណិតវិទ្យាបានពិន្ទុយ៉ាងច្រើន។
+ គុណកិរិយាបំណែប គឺជាពាក្យដែលសម្ដែងលក្ខណៈ ឬបែបបទផ្សេងៗ របស់កិរិយា។
- សំធ្វើកិច្ចការយ៉ាងផ្ចិតផ្ចង់។
- ក្តាមវារគើមៗ។
