|
ជម្រាបសួរប្អូនៗសិស្សានុសិស្សទាំងអស់គ្នា សូមស្វាគមន៍មកកាន់ថ្នាក់រៀនអក្សរសាស្រ្ដខ្មែរ សម្រាប់ថ្នាក់ទី ១១ |
|
|
គ្រូឈ្មោះ |
|
|
លេខទំនាក់ទំនង |
|
|
អ៊ីមែល |
|
ជាតិសាសន៍នីមួយៗតែតែមានអត្តសញ្ញាណជាតិរបស់ខ្លួន ។ រីឯជនជាតិខ្មែរក៏ជាជនជាតិមួយ ដែលមានផ្នត់គំនិត ជំនឿ ទំនៀមទម្លាប់ ប្រពៃណី ហើយបានចារ និងចងក្រងទុកជាសម្បត្តិអរិយធម៌ដ៏ចំណាស់របស់ជាតិខ្លួនដែរ ។ ផ្នត់គំនិត គឺជាគំនិតដែលគេតែងជឿជាក់ហើយប្រកាន់និងអនុវត្តក្នុងទំនៀមទម្លាប់ ប្រពៃណី ជំនឿ ក្នុងជីវភាពរស់នៅ ឬតាមទម្លាប់ពូជពង្សជារៀងរហូតមក ។
ជនជាតិខ្មែរ ជាជនជាតិមួយដែលមានវប្បធម៌ អរិយធម៌ ទំនៀមទម្លាប់ ប្រពៃណីតាំងពីសម័យបុរេប្រវត្តិមកម្ល៉េះ ហើយបន្តរក្សានូវតម្លៃអត្តសញ្ញាណជាតិជាដើមដ៏ផូរផង់នោះ បានរហូតដល់សព្វថ្ងៃ ។ អ្វីៗដែលយើងបានដឹងនិងកំពុងប្រតិបត្តិតាំងពីដើមរៀងមកសុទ្ធតែជាផ្លែផ្កានៃប្រពៃណី ទំនៀមទម្លាប់របស់ដូនតាខ្មែរយើង។ ក្នុងមេរៀននេះ អ្នកនឹងបានសិក្សាពីអរិយធម៌ វប្បធម៌ ប្រពៃណី ទំនៀមទម្លាប់មួយចំនួនរបស់យើង ។ លើសពីនេះ អ្នកនឹងបានសិក្សាបន្ថែមទៀតអំពីកំណាព្យទ្វេមាត្រ កាព្យរូបារម្មណ៍ កម្លាយដោយផ្នត់ជែក ការបញ្ចេញមតិផ្ទាល់ខ្លួនចំពោះជំនឿ និងការតែងកំណាព្យ ។
ការហ៊ានពុះពារ តស៊ូ ជម្នះគ្រប់ឧបសគ្គ មិនខ្លាចគ្រោះថ្នាក់កើតចេញពីសេចក្តីក្លាហាន ។ សេចក្តីក្លាហានកើតចេញពីឧត្តមគតិផ្ទាល់របស់បុគ្គលម្នាក់ៗ ហើយជំរុញឱ្យមានការលះបង់ដើម្បីឧត្តមប្រយោជន៍ផ្សេងៗ ។ សេចក្តីក្លាហាន ជាកត្តាជំរុញឱ្យមានជ័យជម្នះ ។
ការលះបង់ គឺជាការធ្វើពលិកម្មប្រកបដោយគុណធម៌ ដើម្បីសម្រេចកិច្ចការអ្វីមួយ ។ ការលះបង់មានទំហំខុសៗគ្នា។ ការលះបង់ខ្លះមានដូចជា ការលះបង់ពេលវេលា ការលះបង់កម្លាំងកាយ កម្លាំងចិត្ត។ល។ ការលះបង់អាយុជីវិត ការលះបង់ប្រពន្ធកូនជាដើម គឺជាការលះបង់មានទំហំធំ ព្រោះគេច្រើនធ្វើឡើងដើម្បីបម្រើឧត្តមគតិស្នេហាជាតិដូចជា ការការពារទឹកដី ការជួយសង្រ្គោះមនុស្សជាតិពេលជួបគ្រោះមហន្តរាយផ្សេងៗ ។ បុគ្គលដែលហ៊ានលះបង់គ្រប់បែបយ៉ាង ដើម្បីបុព្វហេតុជាតិត្រូវបានគេចាត់ទុកជាវីរជន ។ ក្នុងប្រទេសមួយ ប្រសិនបើមានពលរដ្ឋជាច្រើនហ៊ានលះបង់ ដើម្បីជាតិខ្លួននោះនឹងធ្វើឱ្យប្រទេសជាតិស្ថិតស្ថេរគង់វង្ស និងមានការរីកចម្រើនឆាប់រហ័សជាក់ជាមិនខាន ។
អតីតកាល ជាពេលវេលាដែលកន្លងផុតទៅ ។ ការសិក្សាពីអតីតកាលជាមធ្យោបាយដ៏ល្អសម្រាប់ជាមេរៀន ឬជាបទពិសោធក្នុងការដោះស្រាយបញ្ហាផ្សេងៗ នាពេលបច្ចុប្បន្ន និងអនាគត ។ ជោគជ័យធំៗ មួយចំនួនអាចកើតឡើងអាស្រ័យដោយបទពិសោធពីអតីតកាល ។
ប្រទេសកម្ពុជា ជាប្រទេសមួយដែលបានទទួលឥទ្ធិពលពីសាសនាធំៗពីរ គឺព្រាហ្មណ៍សាសនា និងព្រះសាសនា ។ ឥទ្ធិពលនៃសាសនាទាំងពីរនេះបានជ្រៀតចូលទៅក្នុងផ្នត់គំនិតរបស់ប្រជាជនកម្ពុជាស្ទើរគ្រប់វណ្ណៈតាំងពីយូរយារណាស់មកហើយ ។ ជំនឿទាំងនេះបានក្លាយទៅជាប្រពៃណី ទំនៀមទម្លាប់ និងការគោរពបូជា ការប្រតិបត្តិរបស់ប្រជាជនខ្មែរទៅហើយដូចជា ការគោរពមាតាបិតា គ្រូអាចារ្យ គោរពព្រះពុទ្ធ ព្រះឥន្រ្ទ ព្រះព្រហ្មជាដើម ។ល។
ប្រវត្តិសាស្រ្តបានបង្ហាញថាខ្មែរយើងមានវប្បធម៌រុងរឿងល្បីល្បាយពេញពិភពលោក ។ បុព្វបុរសជាតិយើងបានបន្សល់ទុកកេរដំណែលជាច្រើនរហូតដល់សព្វថ្ងៃដូចជា អក្សរសាស្រ្ត អក្សរសិល្ប៍ សិលាចារឹក ចម្លាក់ រូបបដិមា ប្រព័ន្ធធារាសាស្រ្ត ប្រាសាទបុរាណនានា ពិសេសគឺប្រាសាទអង្គវត្ត ។ អក្សរសាស្រ្ត អក្សរសិល្ប៍ជាមរតកដ៏សំខាន់មួយដែលបន្សល់ទុកឱ្យកូនចៅជំនាន់ក្រោយរហូតដល់បច្ចុប្បន្ន ។ នេះជាមោទនភាពរបស់ជាតិយើង ។ ខ្មែរគ្រប់រូបត្រូវមានស្មារតីស្នេហាជាតិ ថែរក្សាការពារលើកតម្កើងវប្បធម៌ អរិយធម៌ជាតិឱ្យបានស្ថិតស្ថេរគង់វង្ស និងធ្វើឱ្យមានការអភិវឌ្ឍ ។
អតីតកាលបានបន្សល់ទុកនូវមរតកជាច្រើនស្តីពីមនុស្ស និងសង្គម សម្រាប់ស្រាវជ្រាវជំនាន់ក្រោយៗ ព្រឹត្តការណ៍ទាំងអស់នេះត្រូវបានគេយកមករៀបចំតាក់តែងទៅតាមជំនាញឯកទេសនីមួយៗ ដើម្បីអ្នកសិក្សារៀនសូត្រជំនាន់ក្រោយគ្រប់កម្រិតសិក្សា ។ រឿងរ៉ាវនេះ ជាតថភាពសង្គមដែលអ្នកនិពន្ធបានយកមករៀបចំធ្វើខ្លឹមសារ ឬអត្ថន័យនៃស្នាដៃក្នុងរឿង ក្នុងទិសដៅឱ្យអ្នកសិក្សាចេះឆ្លុះបញ្ចាំង វិភាគ ពិចារណា រកហេតុផល ដើម្បីជាបទពិសោធសម្រាប់ជីវិត ក្នុងការរស់នៅប្រចាំថ្ងៃក៏ដូចជាបទពិសោធក្នុងការរៀបចំសង្គមផងដែរ ។
ប្រជាជាតិទាំងអស់នៅលើពិភពលោកនេះ សុទ្ធតែបានរស់នៅលើពិភពផែនដីក្នុងបរិយាកាសមួយឯកភាពគ្នាក្រោមមេឃតែមួយ ក្រោមពន្លឺព្រះអាទិត្យតែមួយ ។ ដូចនេះយើងទាំងអស់គ្នាតែងបានទទួលឥទ្ធិពល ក្រឹត្យ ក្រមមួយពីធម្មជាតិ និងសង្គមផងដែរ ។ សកម្មភាពការងារ ការប្រកបរបរចិញ្ចឹមជីវិត ជំនឿសាសនា ទំនៀមទម្លាប់ ប្រពៃណីវប្បធម៌ សឹងមានទំនាក់ទំនងគ្នាជាដរាបរវាងជាតិសាសន៍ ឬប្រទេសនានាលើពិភពលោក ។
ការយល់ឃើញប្រសើរសុខស្រួល ការប្រកាន់យកតែអំពើល្អសុចរិត ដែលជាមាគ៌ានាំទៅរកសេចក្តីសុខចម្រើន ឬជាសេចក្តីសង្ឃឹមទៅលើកិច្ចការទាំងឡាយឆ្ពោះទៅរកតែអំពើល្អប្រសើរ គឺផុសចេញពីសុទិដ្ឋិនិយម ។ អ្នកដែលប្រកបទៅដោយសុទិដ្ឋិនិយម តែងមានសេចក្តីសង្ឃឹមនិងទទួលជោគជ័យក្នុងឆាកជីវិតជានិច្ច ។ ដូច្នេះមនុស្សគ្រប់រូប គប្បីប្រកាន់ខ្ជាប់នូវសុទិដ្ឋនិយម ដើម្បីធ្វើឱ្យសម្រេចបំណងប្រាថ្នាក្នុងជីវិត ។
