មេរៀនទី៩៖ (សង្ខេបមេរៀន) ការនិយាយ ៖ ការនិយាយសម្របសម្រួបក្នុងពិធីសំខាន់ៗ

        ការនិយាយសម្របសម្រួល គឺជាការនិយាយឱ្យបានស្របស្រួលចិត្តគំនិតឱ្យអែបស្របគ្នាប្រកបដោយភាពរលូន ។ អ្នកសម្របសម្រួល គឺជាអ្នកនិយាយដោយធ្វើយ៉ាងណា ឱ្យពិធីប្រព្រឹត្តទៅប្រកបដោយភាពស្របស្រួល និងទទួលបានលទ្ធផលល្អប្រសើរតាមការរំពឹងទុក ។
  ការសម្របសម្រួលគេសង្កេតឃើញមានសកម្មភាពពីរ ៖
  o   ការចូលរួមស្តាប់នៃសមាជិកម្នាក់ៗក្នុងក្រុម
  o   ការចូលរួម ដោយមានសមាជិកប្តូរមតិ បទពិសោធ ចំណេះដឹងជាមួយសមាជិកក្នុងក្រុម ។
  ការសម្របសម្រួលបានទទួលជោគជ័យ គឺអាស្រ័យលើគុណសម្បត្តិរបស់អ្នកសម្របសម្រួល អ្នកសម្របសម្រួលត្រូវមានសមត្ថភាពដូចជា ៖
១. ផ្នែកចំណេះដឹង គឺចេះធ្វើផែនការ ចាត់ចែងកម្មវិធី ប៉ិនប្រសប់ខាងការទាក់ទង និងចេះធ្វើយ៉ាងណាឱ្យការងារក្រុមមានប្រសិទ្ធិភាព ។
២. ផ្នែកឥរិយាបថ គឺមានអធ្យាស្រ័យនិងគោរពសិទ្ធិសមាជិក ដោយចាត់ទុកថាការខុសឆ្គង ជាបទពិសោធសម្រាប់កែលម្អ ។ មិនតក់ក្រហល់ ព្រមទាំងគោរពពេលវេលាដោយភាពហ្មត់ចត់ ។
៣. បំណិន គឺមានភាពប៉ិនប្រសប់ក្នុងការគ្រប់គ្រងក្រុមបង្កើតបរិយាកាសរីករាយ សិទ្ធស្នាល ព្រមទាំងមានសមត្ថភាពបញ្ចប់ការងារដោយជោគជ័យ ។ បំណិនសម្របសម្រួលមួយចំនួន ៖

ក. ការប្រើពាក្យសម្តី

  o   សំនួនទូទៅ
     -    សូមអធ្យាស្រ័យ ខ្ញុំបាទ/នាងខ្ញុំសូមជួយបន្ថែមត្រង់ចំណុចនេះ............
     -     ក្នុងនាមអ្នកសម្របសម្រួល ខ្ញុំបាទ/នាងខ្ញុំសូមរំឮកថា.......................
     -     ជាការសមស្របហើយ!ប្រសិនបើយើង(អស់លោក...)ធ្វើការពិចារណាតទៅទៀត....
     -     មិនថ្វីទេត្រង់ចំណុចនេះ! ព្រោះបើតាមរបៀបវារៈអង្គប្រជុំថ្ងៃនេះ............................
     -     ក្នុងនាមអ្នកសម្របសម្រួល ខ្ញុំបាទ/នាងខ្ញុំ សូមឱ្យអង្គពិធី(អង្គប្រជុំ...)មេត្តាងាកមក
រកប្រធានបទខាងដើម ហើយសូមមេត្តាសមាជិកឡើងបញ្ចេញយិបល់................
  o   សំនួនយល់ព្រម
     -    គំនិតនេះពិតជាត្រឹមត្រូវ...........
     -     ជាការពិតណាស់ បើសិនជា...........
     -     មែនហើយ ការពិតនៅតែជាការពិត ព្រោះ.........
     -     ខ្ញុំសូមគាំទ្រ.........
     -     ត្រឹមត្រូវហើយ...........
  o   សំនួនមិនយល់ព្រម
     -    ប្រសើរណាស់ប៉ុន្តែ.....................................
     -     យើងគួរពិចារណាលើចំណុចផ្សេងវិញ.............
     -     យើងគួរងាកមករកប្រធានបទយើងវិញ............
     -     តាមគំនិតអស់លោក លោកស្រី ខាងលើនេះក៏សមម្យ៉ាងដែរ តែ...........
     -     តាមគំនិតអស់លោក លោកស្រី ខាងលើនេះក៏ត្រឹមត្រូវដែរ តែគំនិតលោក លោកស្រីខាងនេះច្បាស់លាស់ជាង.............។

ខ. ការប្រើប្រាស់ពេលវេលា គឺមានការបែងចែកឱ្យបានសមស្របទៅតាម ៖

     -    ទំហំខ្លឹមសារប្រធានបទ
     -    កាលវេលានៃការបកស្រាយ
     -    ការសាកសួរខ្លឹមសារ ឬបន្ថែមលើខ្លឹមសារប្រធានបទ ពីសំណាក់អ្នកចូលរួម....។

គ. សំយោគ គឺជាការប្រមូលខ្លឹមសារពិភាក្សាដោយ ៖

     -    បញ្ចូលគោលនូវគំនិត ឬទស្សវិជ្ជមានរបស់ប្រធានបទ
     -    បង្ហាញពីមូលហេតុនៃការទទួលយក ឬមិនទទួលយកគំនិតណាមួយ។

ឃ. សន្និដ្ឋាននិងសរុប

     -    ទាញយកអត្ថន័យសំខាន់ៗពីកិច្ចពិភាក្សាលើប្រធានបទនោះ(ក្នុងសង្គម សហគមន៍ គ្រួសារ)
លើកទឹកចិត្តនិងថ្លែងអំណរគុណអ្នកចូលរួមនិងការផ្តល់យោបល់(ទាំងគំនិតគាំទ្រនិងមិនគាំទ្រ) ។