(ជ២) មេរៀនទី១៖ (មេរៀនសង្ខេប) ការខូចខាត និងកិច្ចការពារព្រៃឈើ

១. តួនាទីចម្បងនៃព្រៃឈើ 

តួនាទីចម្បងនៃព្រៃឈើមានដូចជា៖
-   រក្សាលំនឹងប្រព័ន្ធអេកូឡូស៊ី ឬស្ថានប្រព័ន្ធមានដូចជា ការធ្វើនិយតកម្មអាកាសធាតុ ដោយរក្សាសំណើមអាកាសចូលរួមក្នុងវដ្ដទឹកនិងរក្សាទឹកទុកក្នុងដី
-   ផ្ដល់ជម្រកដល់គ្រប់មនុស្ស សត្វ
-   ផ្ដល់ឈើសម្រាប់សំណង់ទូទៅ
-   ឈើសម្រាប់សិប្បកម្ម ឧស្សាហកម្ម និងពាណិជ្ជកម្ម
-   ជាភ្នាក់ងារសំអាតបរិយាកាស ផលិតអុកស៊ីសែន  
-   ស្រូបយកឧស្ម័នកាបូនិច ធូលី និងសូរសំឡេង
-   រក្សាគុណភាពដី និងទប់ទល់សំណឹក
-   ជារបាំងការពារទឹកជំនន់ និងខ្យល់ព្យុះ។

២. ភ្លើងឆេះព្រៃ

ភ្លើងឆេះព្រៃបណ្ដាលមកពី៖
កត្តាមនុស្ស
-   ការកាប់បំផ្លាញព្រៃឈើយកទៅធ្វើ អុស ធ្យូង
-   យកដីធ្វើកសិកម្ម (ដំណាំវិលជុំ កសិកម្មពនេចរ កសិកម្មព្រៃដុត...)
-   សំណង់ហេដ្ឋារចនាសម្ព័ន្ធ
-   ការធ្វើអាជីវកម្មរ៉ែយកឈើផ្គត់ផ្គង់សិប្បកម្ម ឧស្សាហកម្ម ពាណិជ្ជកម្ម
-   ការចោលកន្ទុយបារី នៅពេលដើរកាត់ព្រៃ
-   សង្គ្រាមរ៉ាំរ៉ៃជាដើម។

កត្តាធម្មជាតិ
-   អាកាសធាតុរាំងស្ងួត
-   កំណើនកម្ដៅផែនដី
-   កំារន្ទះ...។

៣. ការកាប់ព្រៃឈើ

នៅកម្ពុជាយើងបច្ចុប្បន្ននេះគេកាប់ព្រៃឈើក្នុងបំណង៖
-   វាតយកដីធ្វើដំណាំចម្ការធំៗដូចជា កៅស៊ូ ដូងប្រេង ម្រេច កាហ្វេ...
-   យកឈើសម្រាប់ប្រើប្រាស់ទូទៅ (សំណង់លំនៅឋាន គ្រឿងសង្ហារឹម...)
-   សម្រាប់ឧស្សាហកម្ម (ក្ដារបន្ទះ ក្រដាស...)
-   សម្រាប់ថាមពល (អុស ធ្យូង...) និងសម្រាប់នាំចេញ
-   ធ្វើអាជីវកម្មរ៉ែ សាងសង់ផ្លូវគមនាគមន៍និងហេដ្ឋារចនាសម្ព័ន្ធផ្សេងៗទៀត។

៤. ផលប៉ះពាល់ដល់អាកាសធាតុដោយសារការកាប់ព្រៃឈើ

ការបាត់បង់ព្រៃឈើ នាំមកនូវផលវិបាកដូចជា៖
-   បាត់បង់ភ្នាក់ងារសំអាតបរិយាកាស ជម្រកសត្វព្រៃ និងត្រី
-   បាត់បង់របាំងការពារទឹកជំនន់ និងខ្យល់ព្យុះ
-   បាត់បង់ភ្នាក់ងាររក្សាគុណភាពដី និងទប់ទល់សំណឹក
-   បាត់បង់ប្រភពចំណូលថវិកា (ខ្វះឈើសម្រាប់នាំចេញ)
-   នាំឱ្យមានកំណើនកម្ដៅផែនដី ប៉ះពាល់ដល់សុខភាពមនុស្ស សត្វ
-   ប៉ះពាល់ដល់ផលិតកម្មកសិកម្ម
-   កំណើនល្បឿននៃសំណឹកដី និងកំណល្បាប់នៅបាតបឹង
-   បម្រែបម្រួលអាកាសធាតុ (ភ្លៀងធ្លាក់មិនទៀងទាត់...)
-   បង្កើតបាតុភូតរង្វាតសមុទ្រ (កំណើននីវ៉ូទឹកសមុទ្រ)
-   បាត់បង់ស្ថិរភាព និរន្តរភាព នៃការអភិវឌ្ឍន៍សង្គម-សេដ្ឋកិច្ច។

៥. ការត្រួតពិនិត្យអាជីវកម្មព្រៃឈើ

កិច្ចព្រមព្រៀងស្ដីពីព្រៃឈើក្នុងពិភពលោកមានដូចជា៖
-   អនុសញ្ញាស្ដីពីជីវចម្រុះដែលនិយាយពីប្រភេទរុក្ខជាតិ និងសត្វកំពុងផុតពូជ និងកំពុងរងការគំរាមកំហែង
-   អនុសញ្ញាស្ដីពីតំបន់ដីសើមពិភពលោក RAMSAR ដែលក្នុងនោះក៏មាននិយាយពីព្រៃលិចទឹកសាប និងប្រៃផងដែរ
-   សេចក្ដីថ្លែងការណ៍ស្ដីពីគោលការណ៍ការពារព្រៃឈើពិភពលោក។

       ព្រោះព្រៃឈើក្នុងពិភពលោកត្រូវបានគេកាប់បំផ្លាញអស់យ៉ាងច្រើន ពិសេសនៅបណ្ដាប្រទេសលោកខាងត្បូង ដើម្បីបានដីធ្វើអាជីវកម្មផ្សេងៗ សាងសង់ហេដ្ឋារចនាសម្ព័ន្ធ បានឈើប្រើប្រាស់ទូទៅ និងនាំចេញ...។ ការបាត់បង់ព្រៃឈើក្នុងពិភពលោកជាកត្តានាំមកនូវផលប៉ះពាល់យ៉ាងខ្លាំងដល់បរិស្ថានពិភពលោក។