របាំងរូប គឺជាឧបសគ្គធម្មជាតិ
មានដូចជាជួរភ្នំធំៗលំហដ៏ធំល្វឹងល្វើយនៃផ្ទាំងទ្វីប មហាសមុទ្រ រួមទាំងលំហអាកាសផង។ មនុស្សអាចជំនះរបាំងរូបបាន
ដោយប្រើបច្ចេកវិទ្យាទំនើប និងបច្ចេកវិទ្យាជឿនលឿន មានសំណង់ រថយន្ត រថភ្លើង យន្តបថ
ផ្លូវរូងក្រោមសមុទ្រ ស្ពានធំៗ ព្រែកជីក យន្តហោះ យានអាវកាសជាដើម។
ចំពោះវឌ្ឍនភាពនៃការជម្នះរបាំងភ្នំ៖
- ដើមឡើយដោយសាររបាំងភ្នំ មនុស្សរស់នៅក្នុងបរិព័ទ្ធភាព (ភាពបិទជិត) មិនអាចទាក់ទងគ្នាពីជ្រលងមួយទៅជ្រលងមួយបានទេ
- ក្រោយមកទើបមនុស្សចេះធ្វើផ្លូវពត់ពេន
បត់បែនតាមចង្កេះភ្នំ និងចេះធ្វើផ្លូវរូងកាត់ភ្នំ ដែលនាំឱ្យចំណេញពេលវេលាច្រើន
- មនុស្សអាចធ្វើផ្លូវដែកកាត់ទ្វីបជាច្រើនខ្សែកាត់ទម្លុះភ្នំជាច្រើនស្រទាប់ដូចជានៅសហព័ន្ធរុស្ស៊ី សហរដ្ឋអាមេរិកជាដើម។
ឧបសគ្គនៃដីគោក មានលំហក្រុងដែលមានដង់ស៊ីតេប្រជាជនខ្ពស់ ដីសន្ទះ និងរបាំងភ្នំ។
ដើម្បីជម្នះឧបសគ្គទាំងនោះ៖
- ចំពោះលំហក្រុងដែលមានមនុស្សរស់នៅកកកុញដូចជា ញូយ៉ក តូក្យូ ឡុងដ៍ ប៉ារីស សិង្ហបុរី...វិស្វករបានស្ថាបនាផ្លូវដែកក្រោមដីហៅថាមេត្រូ
ដើម្បីសម្រួលដល់ការធ្វើដំណើរ និងបញ្ចៀសការកកស្ទះចរាចរណ៍។
- ចំពោះដីសន្ទះដូចជាដីសន្ទះកូរ៉ាំង ស៊ុយអេ ប៉ាណាម៉ា...វិស្វករបានជីកព្រែកផ្ដាច់ដីសន្ទះទាំងនោះដោយជោគជ័យដើម្បីបញ្ចៀសការធ្វើដំណើរដ៏វែងឆ្ងាយ។
- ចំណែករបាំងភ្នំ
មនុស្សបានសង់ផ្លូវដែកក្រោមភ្នំដោយចោះភ្នំ។
របាំងទឹក មានច្រើនរូបភាពដូចជា មហាសមុទ្រ សមុទ្រ ទន្លេ ស្ទឹង បឹង និងទឹកធ្លាក់។ ដើម្បីជម្នះរបាំងរូបដែលពាក់ព័ន្ធនឹងទឹកយើងមានមធ្យោបាយដូចជា សំណង់ទូក កាណូត សាឡាង និងស្ពានតូចធំជាច្រើន។ ស្នាដៃពិសេសរបស់ប្រទេសជប៉ុនក្នុងការជម្នះរបាំងទឹកមាន ការស្ថាបនាស្ពាន និងផ្លូវរូងក្រោមសមុទ្រភ្ជាប់កោះជាច្រើនដូចជា ផ្លូវរូងសីកាន់ ភ្ជាប់កោះហុងស៊្យូ ទៅកោះហុកកៃដូ ដែលវែងជាងគេក្នុងពិភពលោក។ ចំណែកនៅទ្វីបអឺរ៉ុបឯណោះវិញក៏មានស្ពាន និងផ្លូវរូងដូចគ្នានេះដែរ ដូចជាផ្លូវរូងក្រោមសមុទ្រម៉ង់ ភ្ជាប់ទីក្រុងឡុងដ៍ មកទីក្រុងប៉ារីសនាំឱ្យចំណេញពេលពាក់កណ្ដាលពី៧ម៉ោង (តាមសាឡាង) មកត្រឹម ៣ម៉ោង ៣០នាទី (ឆ្លងផ្លូវរូងអស់រយៈពេល ៣៥នាទី)។
ស្នាដៃពិសេសៗរបស់មនុស្សក្នុងការជម្នះរបាំងលំហអាកាស មាន សំណង់យន្តហោះ យានអាវកាស និងបណ្ដាញទូរគមនាគមន៍ទំនើបៗ។ មនុស្សអាចទាក់ទងគ្នាទៅវិញទៅមកដោយមិនគិតពីរបាំងរូបលែងចោទជាបញ្ហាដូចអតីតកាលទៀតហើយ ព្រោះថាបច្ចុប្បន្ននេះទូរគមនាគមន៍ទំនើបមាន វិទ្យុ ទូរទស្សន៍ ទូរសព្ទ ទូរសារ តេឡេម៉ាទិច កាន់តែសម្បូរបែប... មនុស្សលោក ទោះបីរស់នៅឆ្ងាយពីគ្នារាប់សិបយោជន៍ក៏ដោយ ក៏ហាក់ដូចជានៅជិតបង្កើយ។
