គុណកិរិយា មានដូចជា គុណកិរិយា កាល កន្លែង និង បំណែប។ តើគុណកិរិយាទាំងនេះមានន័យដូចម្តេចខ្លះ?
១. គុណកិរិយាកាល
- បងខ្ញុំទៅចម្ការនៅព្រឹកស្អែក។
- ខ្ញុំទើបតែបោសថ្នាក់រួចអំបាញ់មិញនេះ។
- ពួកយើងប្រឡងនៅសប្តាហ៍ក្រោយ។
គុណកិរិយាកាល ជាពាក្យ ឬ កន្សោមពាក្យសម្រាប់បញ្ជាប់ពេលវេលារបស់កិរិយានៅក្នុងល្បះ។ គុណកិរិយាកាលមានដូចជា៖ សព្វថ្ងៃ ព្រឹកនេះ ស្អែក ខានស្អែក ឥឡូវនេះ...។
២. គុណកិរិយាកន្លែង
- សុខឈរខាងក្រោយសុភី។
- ខ្ញុំបោសសំរាមក្នុងថ្នាក់ ចំណែកមិត្តខ្ញុំបោសសំរាមក្រៅថ្នាក់។
- សំអង្គុយនៅលើគ្រែ។
គុណកិរិយា ជាពាក្យ ឬ កន្សោមពាក្យសម្រាប់បញ្ជាក់ទីកន្លែងរបស់កិរិយានៅក្នុងល្បះ។ គុណកិរិយាកន្លែងមានដូចជា៖ នេះ នោះ លើ ក្រោម ខាងក្នុង ខាងក្រៅ មុខ ក្រោយ ជិត ឆ្ងាយ ក្បែរ...។
៣. គុណកិរិយាបំណែប
- រថយន្តបរទៅមុខយ៉ាងសន្សឹមៗ។
- សុភីអង្គុយយ៉ាងស្ងៀមស្ងាត់។
- សោភានិយាយបូរបាច់ពីការងាររបស់ខ្លួន។
គុណកិរិយាបំណែប ជាពាក្យ ឬ កន្សោមពាក្យសម្រាប់បញ្ជាក់បែបបទរបស់កិរិយានៅក្នុងល្បះ។ គុណកិរិយាបំណែបមានដូចជា យ៉ាងសន្សឹមៗ យ៉ាងស្ងៀមស្ងាត់ បូរបាច់។
