បុព្វបុរសខ្មែរយើងបានបង្កើននូវរឿងព្រេងជាច្រើន ប្រជាជនខ្មែរលើកយកមកនិយាយតៗគ្នាពីមួយជំនាន់ទៅមួយជំនាន់ ហើយបានស្ថិតនៅក្នុងផ្នត់គំនិតប្រជាជនខ្មែរគ្រប់ស្រទាប់វណ្ណៈ។ រឿង ប្រាសាទស្វាយអង្គ ជាប្រភេទរឿងព្រេងកថាមួយដែលបានកើតឡើង នៅឃុំស្វាយអង្គ ស្រុកស្វាយរៀង ខេត្តស្វាយរៀង ហើយអ្នកស្រុកបាននិទានតៗគ្នាពីយូរណាស់មកហើយ។
- ព្យុហយាត្រា (ន) ដំណើរលើកជាក្បួនហែរចេញទៅ ដើម្បីគោលបំណងអ្វីមួយ។
- រេហ៍ពល (ន) កងទ័ព។
- សំពាយ (ន) បង្វិចដែលវេចស្ពាយ។
- ឈ្លានពាន (គុ) ដែលមានអាការឃ្លើន, បំពានលើ។
- អំពាវនាវ (កិ) ស្រែកហៅឮខ្លាំងៗ ឬស្រែកប្រកាសឱ្យឮរាល់គ្នាក្នុងកិច្ចការណាមួយ។
កាលដើមឡើយមានបុរសម្នាក់ឈ្មោះសំរិទ្ធរួម និង ភរិយាបានរស់នៅទីទូលមួយ។ បុរសនោះ ជាមនុស្សខ្លាំងពូកែ នៅពេលនោះកងទ័ពសៀមបានចូលលុបលុយ នៅតាមព្រំដែនខេត្តបាត់ដំបង និង សៀបរាម។ បុរសសំរិទ្ធ បានស្ម័គ្រចិត្តចូលបំរើជាតិ និង បានក្លាយជាមេទ័ពធំ។ កងទ័ពខ្មែរក៏ទទួលបានជ័យជំនះលើកងទ័ពសៀម។ បុរសសំរិទ្ធ ក៏បានសុំលាព្រះរាជាត្រឡប់មក ស្រុកកំណើតនៅស្វាយរៀងវិញ។ ពេលគាត់ស្រាយបង្វិចបានឃើញសំពត់មួយ និង ស្វាយពីរបីផ្លែទើបដឹងថាគាត់បានច្រឡំបង្វិចគ្នា កាលស្នាក់នៅអង្វរ។ ប្រពន្ធគាត់ បានយកផ្លែស្វាយនោះទៅកប់ដាំ។ ក្រោយមក ដើមស្វាយដុះបែកមែកត្រឈឹងត្រឈៃ។ អ្នកស្រុកឱ្យឈ្មោះថា “ស្វាយអង្គរ” ព្រោះបានពូជមកពីអង្គរ។
ចំណេរកាលក្រោយមក គេហៅកាត់ថាស្វាយអង្គ ហើយក្រោយមកទៀតអ្នកស្រុកបានកសាងវត្តមួយឈ្មោះថា “វត្តស្វាយអង្គរ”។ ដើមស្វាយនោះ មានបារមីខ្លាំងពូកែណាស់ ភិក្ខុសាមណេរក៏រត់ចោលអស់ទៅ។ សព្វថ្ងៃនេះគេបានកសាងវត្តមួយនៅក្បែរនោះឈ្មោះថា “វត្តស្វាយផ្អែម”។ ឯវត្តចាស់សព្វថ្ងៃ មានដើមស្វាយធំៗ ក្រោយមកមានដើមឈើទាល និងកូនឈើឯទៀតដុះស៊ុបទ្រុបជាច្រើន។