ខ្មែរជាប្រទេសមួយដែលមានអរិយធម៌ចំណាស់ជាងគេនៅក្នុងតំបន់។ ខ្មែរមានសម្បត្តិវប្បធម៌រុងរឿងល្បីល្បាញពាសពេញតំបន់ និង ទូទាំងពិភពលោក។ រីឯសម្បត្តិធម្មជាតិ ខ្មែរក៏សម្បូរទៅដោយព្រៃ ទឹកជ្រោះ បឹងបួរ ស្ទឹង សមុទ្រ និងទន្លេ។ល។ ខ្មែរមានអត្តសញ្ញាណជាតិ ជាច្រើនក្នុងនោះទង់ជាតិ គឺជាអត្តសញ្ញាណជាតិមួយទង់ដ៏មានសារៈសំខាន់មិនអាចខ្វះបានផងដែរ។
ទង់ជាតិខ្មែរ ជានិមិត្តរូបនៃដួងវិញ្ញាណក្ខន្ធរបស់ប្រជាជនខ្មែរយើងគ្រប់ជំនាន់មានរាងបួនជ្រុងទ្រវែង ហើយមានបីពណ៌នៅផ្ទៃសងពណ៌ខៀវជាំនិមិត្តរូបទឹកដីដ៏ទូលំទូលាយ និងសម្បូរស្តុកស្តម្ភទៅដោយសម្បត្តិ និងសម្បត្តិវប្បធម៌។ ផ្ទៃកណ្តាលមានពណ៌ក្រហមឈាម ជានិមិត្តរូបនៃសេចក្តីអង់អាចក្លាហានរបស់ជាតិខ្មែរក្នុងកិច្ចការពារ និងកសាងមាតុភូមិ។ នៅកណ្តាលមានរូបប្រាសាទត្រីសាល៍(ប្រាសាទកំពូលបី) ពណ៌ស ដែលមានក្បាច់រចនាល្អវិចិត្រជានិមិត្តរូបនៃសម្បត្តិវប្បធម៌កេតនភណ្ឌជាតិ និង សេចក្តីរុងរឿងល្បីល្បាញរបស់ជាតិខ្មែរតាំងពីសម័យបុរាណកាលមកម្ល៉េះ។
ទង់ជាតិបណ្តុំដួងវិញ្ញាណក្ខន្ធរបស់បុព្វបុរសខ្មែរគ្រប់ជំនាន់ដែលបានធ្វើពលិក្មគ្រប់បែបយ៉ាង ដើម្បីបំរើបុព្វហេតុប្រទេសជាតិ។ យើងម្នាក់ៗជាខេមរបុត្រ មិនត្រូវមើលស្រាលព្រលឹងរបស់ជាតិខ្លួនទេ។ ប្រសិនបើយើងមើលស្រាលទង់ជាតិមិនគោរពជាតិ ជាបុព្វហេតុធ្វើឱ្យបរទេសមើលងាយជាតិខ្មែរ។
ដូច្នេះ យើងជាកូនខ្មែរត្រូវការគោរពជាតិ ដែលជាព្រលឹងរបស់ជាតិ ហើយបញ្ចេញថាមពលហ៊ានលះបង់គ្រប់យ៉ាង រួមសាមគ្គី ដើម្បីការពារទង់ជាតិ និង ទឹកដីដ៏ប្រសើររបស់យើង។