នៅក្នុងសំណេរ យើងឃើញមានចំណុចរាយ [...] នៅក្នុងល្បះមួយចំនួន ដែលពេលខ្លះគេដាក់នៅខាងដើមពេលខ្លះខាងចុង និងជួនកាលគេដាក់នៅខាងដើម ឬខាងក្រោយអត្ថបទ។ល។ សញ្ញាបែបនេះ [...] ហៅថា ចំណុចរាយ។
- [...] ដាក់នៅខាងដើម ឬខាងចុងកថាខណ្ឌ ដើម្បីបញ្ជាក់ថាមានសម្តី ឬសេចក្តីផ្សេងទៀត ដែលគេមិនលើកយកមកនិយាយ។
- (...) ដាក់នៅខាងចុង បង្ហាញសម្តី ឬសេចក្តីដែលមានបន្តទៀត ឬដាក់នៅកន្លែងចន្លោះត្រូវបំពេញ ឬបង្រ្គប់ និងដាក់មិនចំពោះទីកន្លែងណាមួយទេ។
- បកស្រាយការភ័យខ្លាច តក់ស្លុត ញាប់ញ័រ រន្ធត់...ទៅតាមស្ថានភាពតម្រូវ។
+ឧទាហរណ៍ទី១
នៅឯបណ្ណាល័យមានសៀវភៅច្រើនណាស់ដូចជា រឿងនិទាន សៀវភៅលំហាត់ សៀវភៅអង់គ្លេស...។
- បកស្រាយឧទាហរណ៍ទី១
នៅក្នុងឧទាហរណ៍នេះមានន័យថា សញ្ញាចុចរាយ(...) សម្រាប់បញ្ជាក់សេចក្តីមិនទាន់ចប់ ឬនៅមានតទៅទៀតដែលសេចក្តីត្រូវបង្រ្គប់ ឬបំពេញ។
+ ឧទាហរណ៍ទី២
- [...] ពួកប្រេតស្តាប់សំណើររបស់នាយឈ្មួញ ដូចនេះក៏គិតគ្នាមួយសន្ទុះទើបព្រមដោះលែងពួកឈ្មួញហើយផ្តាំថា៖
“ កាលបើពួកអ្នកបានទៅដល់ស្រុកទេសខ្លួនហើយ កាលណាមានខ្យល់ជំនោរធ្លាក់មកពីទិសខាងជើងអ្នកទាំងអស់គ្នា ត្រូវធ្វើក្បួនផ្ទុកគ្រាប់ធញ្ញជាតិ និងអាហារគ្រប់យ៉ាង មានដូចជា លាជ សណ្តែក ដូង ល្ង អំបុក ចេក ជាដើមបណ្តែតតាមខ្សែទឹកមកឱ្យយើងចុះមិនបាច់យកមកផ្ទាល់ទេ។ ជំនោរខ្យល់ នឹងជញ្ជូនរបស់ទាំងនេះមកដល់យើងហើយ”។ [...]
- បកស្រាយឧទាហរណ៍ទី២
កាលណាគេប្រើប្រាស់សញ្ញាចំណុចរាយ[...] បែបនេះគឺចង់បញ្ជាក់ថា ខ្លឹមសារនៅត្រង់ចំណុចនេះគេមិនលើកយកមកនិយាយ ទោះជានៅខាងដើម ឬចុងកថាខណ្ឌក្តី។
+ឧទាហរណ៍ទី៣
- ម៉ែ!...មកហើយ!...ស្ទុងៗនោះ...។ កុំមាត់!...កុំមាត់!...“ ម្តាយឆ្លើយកាត់ដោយយកដៃខ្ទប់មាតត់កូន ”។
បកស្រាយឧទាហរណ៍ទី៣
ចំណុចរាយនេះ (...) បង្ហាញពីភាពភ័យខ្លាច ឬការភ្ញាក់ផ្អើលរបស់ក្មេង នៅក្នុងស្ថានភាពមួយ។