មេរៀនទី៧ (សង្ខេបមេរៀន) វេយ្យាករណ៍៖ ប្រភេទគុណកិរិយាវិសេស

     គុណកិរិយាទាំងនោះមាន គុណកិរិយាបំណែប គុណកិរិយាកន្លែង គុណកិរិយាកាល គុណកិរិយាសំណួរ និងគុណកិរិយាបរិមាណ។
ឧទាហរណ៍ វិរៈញ៉ាំបាយច្រើន។ ពាក្យ ច្រើន ជាគុណកិរិយា។
១. គុណកិរិយាបំណែប គឺជាគុណកិរិយាប្រាប់ពីបែបបទនៃអំពើរបស់កិរិយា។ គុណកិរិយាបំណែបមានដូចជា លឿន យឺត ឆាប់ រហ័ស រឿយៗ ...។
ឧទាហរណ៍៖
- រថយន្ដដឹកអ្នកដំណើរនៅតាមផ្លូវជាតិនានា ធ្វើដំណើរ លឿន ណាស់។
- កុំព្យូទ័ររបស់មិត្តភក្តិខ្ញុំដើរ យឺត។
២. គុណកិរិយាកន្លែង គឺជាគុណកិរិយាប្រាប់ទីកន្លែងនៃអំពើរបស់កិរិយា។ គុណកិរិយាកន្លែងមានទាំងនោះមានដូចជា៖ ខាងលើ ខាងក្រោម ខាងក្នុង ខាងក្រៅ ឆ្ងាយ ជិត អាយ ទីនេះ ក្បែទីនោះ ...។
ឧទាហរណ៍៖
- លីដាចេញទៅខាងក្រៅហើយ។
- គាត់បានទៅឆ្ងាយហើយ។
៣. គុណកិរិយាកាល គឺជាគុណកិរិយាប្រាប់ពេលវេលា នៃអំពើរបស់កិរយា។ គុណកិរិយាកាលមានដូចជា ស្អែក ម្សិលមិញ ឆ្នាំទៅ ខានស្អែក អំបាញ់មិញ ...។
ឧទាហរណ៍៖
- ស្អែក ដានីនឹងមកដល់។
- ម្សិលមិញ ភ្លៀងធ្លាក់មួយមេធំ។
៤. គុណកិរិយាសំណួរ គឺជាគុណកិរិយាសម្រាប់សួររកទីកន្លែង កាលហេតុ បែបបទ និងបំណង របស់កិរិយា។ គុណកិរិយាសំនួរមាន៖
- សម្រាប់សួរទីកន្លែង ណា កន្លែងណា កន្លែងណាខ្លះ ឯណា ទីណា ...។
- សម្រាប់សួររកកាល ពេលវេលា គ្រាណា នៅពេលណា ពេលណាខ្លះ កាលណា ពីអង្កាល់ ម៉ោងប៉ុន្មាន ថ្មើរម៉ាន ...។
- សម្រាប់សួរហេតុ ហេតុអ្វី មូលហេតុអ្វី ហេតុដូចម្តេច ...។
- សម្រាប់សួររកបែបបទ ដូចម្តេច យ៉ាងដូចម្តេច ដូចម្តេចខ្លះ ...។
- សម្រាប់សួររកបំណង ដើម្បីអ្វី ក្នុងបំណងអ្វី ...។
ឧទាហរណ៍៖
- តើអ្នកកំពុងស្ថិតនៅទីណា?
- ពេលណាដែលអ្នកមកដល់?
- ហេតុអ្វីបានជាអ្នកមិនទៅរៀន?
- តើនៅក្នុងសង្គមយុវជនត្រូវធ្វើដូចម្តេចខ្លះ?
- តើអ្នកមកទីនេះក្នុងបំនងអ្វី?
៥. គុណកិរិយាបរិមាណគឺជាគុណកិរិយាបញ្ជាក់ន័យឱ្យកិរិយា គុណនាមឬគុណកិរិយា។ គុណកិរិយាបរិមាណមាន៖ ណាស់ ពេក ច្រើន តិច ហួស ល្មម ...។
ឧទាហរណ៍៖ សិស្សឆ្លាត ណាស់។