ខ្មែរ ជាប្រទេសចំណាស់មួយនៅក្នុងភូមិភាគអាស៊ីអាគ្នេយ៍យើងនេះ។ ខ្មែរមានខឿនអរិយធម៌ដ៏ចំណាស់បុព្វបុរសខ្មែរ បានបន្សល់ទុកស្នាដៃជាច្រើនសម្រាប់កូនចៅជំនាន់ក្រោយ ក្នុងចំណផមស្នាដៃទាំងនោះមានប្រាសាទសិលាជាច្រើនដែលសុទ្ធមានក្បូរក្បាច់រចនាយ៉ាងល្អឯក និង កំពុងតែបង្ហាញរាងយ៉ាងសង្ហាទោះបីជាមានអាយុកាលរាប់រយឆ្នាំដ៏ដោយ។
- សាវតា (ន) ប្រវត្តិវង្សត្រកូល តំណខ្សែវង្សត្រកូល។
- កេរ (ន) អ្វីៗដែលឪពុកម្តាយ បុព្វបុរស ឬ នរណាម្នាក់បន្សល់ទុកឱ្យ។
ប្រាសាទសិលាបាំងគងព្រៃ វត្ថុតម្លៃបុរាណកេរ
ជាវិស្វកម្មជាប់ចាំចេរ សិល្បៈឈ្នះគេក្នុងលោកា។
ប្រាសាទនគរវត្តបញ្ចង់ ល្អទ្រង់សក្តិសមដូចសួរគ៌ា់
កំពូលប្រាំដូចបទុមា បូជាថ្វាយអង្គព្រះវិស្ណុ។
បាកានកំពូលខ្ពស់ស្កឹមស្កៃ វិស័យសុមេរុឥតមានគូ
ជាវិស្វកម្មពួកវិទូ ជាអ្នកតស៊ូស្ថាបនា។
ប្រាសាទភ្នំបាខែង ជាទីស្ងប់ស្ញែងជននានា
បក្សីចាំក្រុងសាងក្នុងគ្រា សម័យខេមរាមានរិទ្ធី។
បក្សីចាំក្រុងធំភ្នំទ្រង់យស សង់លើលានខ្ពស់ក្នុងរាជធានី
ហៅថាយសោធរគិរី ជាទីក្សេមក្សាន្តសំរាន្តចិត្ត។
បាពួនប្រាសាទល្អសោភី ជាអនុស្សារីយ៍ខ្មែរពិតៗ
វិមានអាកាសជាឋានឋិត ទុកជាទីក្រឹត្យស្បថសច្ចា។
ប្រាសាទទាំងឡាយនៃខេមរា សោភ័ណអស្ចារ្យជាសំអាង
ជំនាន់បុរាណជាតំណាង ផ្នែកខាងសិល្បៈអ្នកសាសនា។
គឺជាពូជពង្សស្ថាបនិក ទុកជាចារឹកក្នុងសាវតា
ជាគោលសំខាន់ក្នុងខេមរា ឥតមានជាតិណាប្រោមបាន។
បុព្វបុរសខ្មែរបានបន្សល់ទុកនូវប្រាសាទសិលាយ៉ាងច្រើនអនេក។ ប្រាសាទអង្គរវត្តមានកំពូលប្រាំហាក់បីដូចជាឋានសួគ៌ដែលកសាងឡើង ដើម្បីឧទ្ទិសថ្វាយដល់ព្រះវិស្ណុ។ ប្រាសាទទាំងអស់ត្រូវបានកសាងក្នុងពេល ដែលប្រទេសខ្មែរមានភាពរីកចម្រើន និង ខ្លាំងពូកែ។ ទីកន្លែងទាំងនោះជារាជធានីចាស់របស់ខ្មែរ និង ជាស្នាដៃដ៏ពិសិដ្ឋ ដែលគ្មានជាតិសាសន៍ណាមួយអាចធ្វើបានឡើយ។ ភ្ញៀងទេសចរ អាចសម្រាកលំហែនៅទីនោះប្រកបដោយភាពសប្បាយរីករាយ
ក្រៃលែង។
