នៅក្នុងមេរៀននេះ អ្នកនឹងសិក្សាអំពី៖
◊ ផ្នែកទាំងបីនៃការរៀបចំរចនាសម្ព័ន្ធបទបង្ហាញ (សេចក្ដីណែនាំ តួសេចក្ដី សេចក្ដីសន្និដ្ឋាន)
◊ ការរៀបចំខ្លួន ដើម្បីផ្ដល់បទបង្ហាញ
◊ ការកំណត់ចលនាដំណើរផ្លាស់ប្ដូរស្លាយ អន្តរកម្ម និងការប្រើទិន្នភាពគ្រោង
◊ ការរៀបចំ និងផ្ដល់បទបង្ហាញប្រកបដោយប្រសិទ្ធភាព។
រចនាសម្ព័ន្ធរបស់បទបង្ហាញដែលល្អ ចែកចេញជាបីផ្នែកគឺ៖ សេចក្ដីណែនាំ ដើម្បីប្រុងប្រៀបអ្នកចូលរួមស្ដាប់ទុកជាមុន។ តួសេចក្ដី ដើម្បីផ្ដល់នូវបរិបទ និងគំនិតសំខាន់។ សេចក្ដីសន្និដ្ឋាន ដើម្បីបញ្ជាក់ និងពង្រឹងគំនិតរបស់បទបង្ហាញ។
វិធីសាស្ត្រល្អបំផុតដើម្បីឱ្យប្រាកដថាអ្នកស្ដាប់យល់ច្បាស់អំពីគំនិតនិងព័ត៌មាននោះគឺតាមរយៈការផ្ដល់ជាឧទាហរណ៍ ដោយសង្កត់ធ្ងន់ទៅលើទំនាក់ទំនងរវាងឧទាហរណ៍ និងប្រធានបទដែលអ្នកកំពុងតែពន្យល់។
ចំណុចខាងក្រោមនេះទាមទារសម្រាប់ការធ្វើបទបង្ហាញ៖
◊
ចំណេះដឹង៖
អ្នកនិយាយត្រូវតែដឹងច្បាស់ពីប្រធានបទរបស់បទបង្ហាញ ហើយយល់ច្បាស់អំពីព័ត៌មាននិងលំដាប់លំដោយនៃព័ត៌មានដែលត្រូវបង្ហាញទៅកាន់អ្នកស្ដាប់ណាមួយក្នុងការធ្វើបទបង្ហាញនេះ។
◊ រៀបចំស្លាយឱ្យបានពេញលេញ៖ ដោយមានព័ត៌មាននៅក្នុងសេចក្ដីណែនាំ និងសេចក្ដីសន្និដ្ឋាន។
◊ ជូនដំណឹងពីពេលវេលា និងទីកន្លែងនៃការចូលរួមស្ដាប់នូវបទបង្ហាញ បន្ទាប់មកធ្វើការរំលឹកឬបញ្ជាក់បន្ថែមពីការចូលរួម នៅពេលដែលការធ្វើបទបង្ហាញជិតឈានមកដល់។
◊ ជ្រើសរើសទីតាំងធ្វើបទបង្ហាញឱ្យបានសមរម្យ និងរៀបរយ។
◊ អ្នកធ្វើបទបង្ហាញចេះលើកដាក់សំឡេងឬរបៀបរបបនិយាយបានត្រឹមត្រូវ ហើយអាកប្បកិរិយាត្រូវបើកចំហក្នុងការសម្របសម្រួលទំនាក់ទំនងមិនចំណាយពេលវេលាច្រើនជាងពេលវេលាដែលកំណត់។
◊ យល់ដឹងអំពីសំលៀកបំពាក់ក្នុងការធ្វើបទបង្ហាញ។
មេស្លាយជាមុខងារមួយរបស់កម្មវិធីបង្កើតបទបង្ហាញដែលអនុញ្ញាតឱ្យអ្នកប្រើបង្កើតទំព័រមេផ្ទាល់ខ្លួនរបស់ពួកគេ។ តាមរយៈលក្ខណៈពិសេសនេះ អ្នកប្រើអាចកំណត់រចនាបថផ្ទាល់ខ្លួនរបស់ពួកគេសម្រាប់បទបង្ហាញបាន។ ពួកគេអាចរៀបចំទំព័រដោយប្រើផ្ទៃខាងក្រោយ ប្រអប់អត្ថបទ និងរូបភាពណាមួយដែលពួកគេពេញចិត្ត(ដូចជារូបសញ្ញា ដែលគួរបង្ហាញក្នុងស្លាយទាំងអស់)។ នៅពេលបានរួមបញ្ចូលនៅក្នុងទំព័រមេ ធាតុទាំងនេះនឹងបង្ហាញក្នុងស្លាយទាំងអស់ដែលទំព័រមេនេះត្រូវបានអនុវត្ត។
នៅពេលប្រើទំព័រមេ យើងអាចធ្វើការផ្លាស់ប្តូរចំណុចណាមួយទៅកាន់ស្លាយទាំងអស់បាន ដោយគ្រាន់តែធ្វើការកែប្រែចំណុចនោះនៅក្នុងមេស្លាយប្រសើរជាងកែចំណុចនោះក្នុងស្លាយនីមួយៗ។
វាលគឺជាសញ្ញាសម្គាល់ ដែលប្រាប់ពីព័ត៌មានផ្សេងៗមួយចំនួនដែលត្រូវបញ្ចូលនៅពេលបង្ហាញឬបោះពុម្ពស្លាយ។វាលអាចឱ្យយើងបញ្ចូល លេខទំព័រ បាតកថា កាលបរិច្ឆេទ ចំណងជើង។ល។
ដំណើរផ្លាស់ប្ដូរស្លាយគឺជាចលនាដែលនឹងកើតឡើងអំឡុងពេលបញ្ចាំងស្លាយ នៅពេលដែលស្លាយមួយបាត់ត្រូវបានជំនួសដោយស្លាយបន្ទាប់មួយទៀត។ ការបញ្ចូលដំណើរផ្លាស់ប្ដូរស្លាយក្នុងបទបង្ហាញ ធ្វើឱ្យបទបង្ហាញកាន់តែមានលក្ខណៈវិជ្ជាជីវៈ។ ដំណើរផ្លាស់ប្តូរស្លាយ មានលក្ខណៈខុសគ្នាពីចលនាផ្ទាល់ខ្លួន ចំពោះចលនាផ្ទាល់ខ្លួន គឺជាការផ្លាស់ទីរបស់វត្ថុ ដែលស្ថិតនៅខាងក្នុងស្លាយមួយ។ កម្មវិធីបទបង្ហាញភាគច្រើន ផ្ដល់នូវបែបផែនដំណើរផ្លាស់ប្ដូរស្លាយផ្សេងគ្នាជាច្រើនដែលអ្នកអាចប្រើដើម្បីធ្វើឱ្យការបញ្ចាំងស្លាយកាន់តែរស់រវើក។
អន្តរកម្ម មានអំពើដោយកំណត់វត្ថុណាមួយ(រូបភាព ឬអត្ថបទ)ដែលបទបង្ហាញនឹងលោតទៅនៅពេលអ្នកធ្វើបទបង្ហាញចុចលើវត្ថុនោះ។ ការចុចលើវត្ថុ អាចធ្វើឱ្យបទបង្ហាញលោតទៅទំព័រមុន ទំព័របន្ទាប់ ទំព័រដំបូង ទំព័រចុងក្រោយ ឬទំព័រជាក់លាក់ណាមួយ។
អំឡុងពេលរៀបចំបទបង្ហាញ យើងអាចមើលគ្រោងរបស់បទបង្ហាញនៅពេលណាមួយក៏បាន ហើយយើងក៏អាចបង្កើតគ្រោងរបស់ឯកសារបទបង្ហាញជាមុន ដែលកម្មវិធីបង្កើតបទបង្ហាញនឹងបង្កើតស្លាយដែលចាំបាច់ដោយស្វ័យប្រវត្តិ ដោយផ្អែកលើប្លង់ និងទំព័រមេដែលបានជ្រើសរើស។
គ្រោងគឺជាទិដ្ឋភាពបន្ថែមមួយផ្សេងទៀតរបស់បទបង្ហាញ ហើយការផ្លាស់ប្ដូរពីទិដ្ឋភាពធម្មតា ទៅទិដ្ឋភាពគ្រោងមានលក្ខណៈងាយស្រួល និងរហ័ស។
ដើម្បីសន្សំសំចៃក្រដាស កម្មវិធីពិព័រណ៍មានភាពបត់បែនគ្រប់គ្រាន់ ដែលអាចឱ្យយើងបោះពុម្ពស្លាយច្រើនក្នុងមួយទំព័រ ឬតាមទ្រង់ទ្រាយដែលមាននៅក្នុងទិដ្ឋភាពប្លង់បោះពុម្ព។
នៅពេលប្រើឧបករណ៍បញ្ចាំងស្លាយ ពណ៌របស់ស្លាយជាជំនួយល្អបំផុត ប៉ុន្តែសម្រាប់ធ្វើជាឯកសារ យកល្អត្រូវធ្វើច្បាប់ចម្លងដែលមានពណ៌សខ្មៅ ឬជម្រើសបោះពុម្ពពណ៌សខ្មៅ ដែលនឹងមិនបង្ហាញផ្ទៃខាងក្រោយរបស់ស្លាយដែលកាត់បន្ថយការចំណាយក្នុងការបោះពុម្ព និងអាចអានបានច្បាស់ជាងគេ។
