(ជ២) មេរៀនទី៤៖ (មេរៀនសង្ខេប) ការស្វែងរកការងារ

នៅក្នុងមេរៀននេះ អ្នកនឹងសិក្សាអំពី៖

◊ យល់ដឹងពីឱកាសការងារ និងគិតទុកជាមុន តើនិយោជកនឹងទទួលយកយើងដើម្បីធ្វើការដែរឬទេ។

◊ ការផ្ដល់ព័ត៌មានបានច្បាស់លាស់តាមរយៈប្រវត្តិរូបសង្ខេប។

◊ ការធ្វើទ្រង់ទ្រាយកថាខណ្ឌ បឋមកថា បាតកថា និងវាលបានត្រឹមត្រូវ។

◊ លទ្ធភាពបង្កើតឯកសារជាទ្រង់ទ្រាយ PDF ។

មេរៀនសង្ខេប

1. ទីផ្សារការងារ

     ឱកាសការងារកើតឡើង នៅពេលស្ថាប័នចាប់ផ្ដើមគម្រោងថ្មី ដែលនឹងត្រូវការជ្រើសរើសបុគ្គលិកថ្មី ឬត្រូវការជំនួសបុគ្គលិកដែលបានចាកចេញ។មុនពេលដែលស្ថាប័នចាប់ផ្ដើមជ្រើសរើសបុគ្គលិក ស្ថាប័ននឹងកំណត់នូវបញ្ហាសំខាន់ចំនួនពីរយ៉ាងគឺ៖

◊ តើនិយោជិតថ្មីនឹងត្រូវធ្វើការងារអ្វីខ្លះ?

◊ តើលក្ខណសម្បត្តិអ្វីខ្លះរបស់បេក្ខជន ដែលត្រូវការដើម្បីធ្វើការងារនេះឱ្យបានត្រឹមត្រូវ?

     ចំពោះចម្លើយវិញគឺថាសំណួរដំបូង នឹងត្រូវបានឆ្លើយដោយការសរសេរសេចក្ដីពណ៌នាការងារ ដូចជា រៀបរាប់ពីភារកិច្ចការងារ និងការទទួលខុសត្រូវ ដែលបុគ្គលិកថ្មីនឹងត្រូវអនុវត្ត។ រីឯចម្លើយសម្រាប់សំណួរបន្ទាប់គឺជាការរៀបរាប់ពីតម្រូវការឬលក្ខខណ្ឌការងារដែលបេក្ខជននឹងត្រូវបំពេញ។

2. សេចក្ដីប្រកាសជ្រើសរើសបុគ្គលិក

   សេចក្ដីប្រកាសបុគ្គលិកគួរតែមាន៤ផ្នែកគឺ៖

◊ សេចក្ដីណែនាំ

◊ សេចក្ដីពិពណ៌នាការងារ (មុខតំណែង និងភារកិច្ចការងារតែប៉ុណ្ណោះ)

◊ តម្រូវការឬលក្ខខណ្ឌជ្រើសរើស

◊ ព័ត៌មានអំពីពាក្យសុំធ្វើការ។

3.  ដំណើរការជ្រើសរើសបុគ្គលិក

     និយោជកនឹងធ្វើការជ្រើសរើសដំបូងចំពោះបេក្ខជនដែលមានលក្ខណៈសម្បត្តិត្រូវគ្នា និងលក្ខខណ្ឌការងារ។ បេក្ខជនដែលត្រូវបានជ្រើសរើសនឹងហៅមកប្រឡងឬហៅឱ្យមកធ្វើការសម្ភាស។ និយោជកនឹងជ្រើសរើសយកបេក្ខជនដែលបានប្រុងប្រៀបខ្លួនបានល្អប្រសើរ និងមានលក្ខណៈសម្បត្តិល្អជាងគេ។ ចុងក្រោយនឹងមានការចរចាមួយ ពីប្រាក់បៀវត្ស និងលក្ខខណ្ឌដែលក្រុមហ៊ុនផ្ដល់ឱ្យ។ ពេលនោះបេក្ខជនមានជម្រើសក្នុងការទទួល ឬមិនទទួលទៅតាមលក្ខខណ្ឌទាំងនេះ។

4.  ប្រវត្តិរូបសង្ខេប (CV)

     សុំធ្វើប្រវត្តិរូបសង្ខេប (Curriculum Vitae) ជាឯកសារដែលបញ្ជាក់អំពីប្រវត្តិនៃការសិក្សា ចំណេះដឹង (កម្រិតវប្បធម៌) និងបទពិសោធន៍នៃការងាររបស់នរណាម្នាក់ ដោយផ្ដល់នូវសេចក្ដីពណ៌នាអំពីជំនាញរបស់ពួកគេ និងការត្រៀមរៀបចំខ្លួនសម្រាប់មុខតំណែងការងារ។ ជាទូទៅប្រវត្តិរូបសង្ខេបរួមមាន៖

◊ ព័ត៌មានផ្ទាល់ខ្លួន និងទំនាក់ទំនង

◊ កម្រិតវប្បធម៌

◊ បទពិសោធន៍ការងារ

◊ សញ្ញាប័ត្រជំនាញផ្សេងៗ

◊ ចំណាប់អារម្មណ៍

◊  អ្នកធានា។

5. ការស្វែងរកការងារ

     ជំហានដំបូងក្នុងការស្វែងរកការងារគឺត្រូវសរសេរប្រវត្តិរូបសង្ខេប ជំហានទី២ ចាប់ផ្ដើមមើលសេចក្ដីប្រកាសជ្រើសរើសបុគ្គលិក (តាមសារព័ត៌មាន​ ឬកាសែត)។ ជំហានទី៣ មើលលក្ខខណ្ឌនៃការជ្រើសរើសដែលបានកំណត់ដោយនិយោជកហើយចុងក្រោយយើងត្រូវធ្វើការសម្រេចចិត្តថាយើងអាចធ្វើបាន ឬមិនបាន។

6.  បំណិនរឹង និងបំណិនទន់

◊  បំណិនរឹង (Hard skill) គឺជាចំណេះដឹងជាក់លាក់ ដែលយើងប្រើនៅក្នុងការងារដូចជាការសិក្សារៀនសូត្ររបស់យើង ការនិយាយភាសាអង់គ្លេស ឬចំណេះដឹងពីរបៀបប្រើប្រាស់កុំព្យូទ័រ។ ជំនាញរឹងអាចរៀនតាមរយៈការសិក្សារៀនសូត្រ។

◊ បំណិនទន់ (Soft skill) សំដៅលើសមត្ថភាពប្រែប្រួលទៅតាមស្ថានភាពថ្មី ដោយអាចយល់បានពីមនុស្ស​និងរៀនពីបទពិសោធន៍។

7.  បឋមកថា បាតកថា និងវាល

     យើងអាចធ្វើទ្រង់ទ្រាយឯកសារល្អបានយ៉ាងងាយតាមរយៈលទ្ធភាព ដែលអាចធ្វើបាននៃទ្រង់​ទ្រាយ​​កថាខណ្ឌ ក៏ដូចជាការប្រើប្រាស់បឋមកថា និងបាតកថា។ រីឯ វាលត្រូវបានគេប្រើញឹកញយនៅក្នុងបឋមកថា និងបាតកថា ឧទាហរណ៍ លេខទំព័រ និងចំនួនទំព័រ។

◊ ដើម្បីដាក់បឋមកថា (Header) ត្រូវចុចម៉ឺនុយ Insert => Header

 

◊ ដើម្បីដាក់បាតកថា (Footer) ត្រូវចុចម៉ឺនុយ Insert => Footer

◊  របៀបកំណត់វាល

8.  ការប្រើថេប និងបន្ទាត់

     ចំណុចសំខាន់មួយ ដែលធ្វើឱ្យឯកសារស្អាតសមសួន គឺតម្រឹមកថាខណ្ឌផ្សេងៗ និងប្រយោគដើម្បីឱ្យចាប់ផ្ដើមឬបញ្ចប់នៅទីតាំងតែមួយ។ ទំព័រដែលមានកថាខណ្ឌចាប់ផ្ដើមនៅទីតាំងផ្សេងគ្នាមើលទៅគ្មានរបៀបរៀបរយ ខណៈដែលកថាខណ្ឌត្រូវបានគេតម្រឹមធ្វើឱ្យមានចំណាប់អារម្មណ៍ល្អ។

9. ការបង្កើតឯកសារជាទ្រង់ទ្រាយPDF

     ទ្រង់ទ្រាយពេញនិយមបំផុត ដែលបង្ហាញឯកសារជាទ្រង់ទ្រាយមួយដែលកំណត់ដោយអ្នកនិពន្ធមិនអនុញ្ញាតឱ្យកែប្រែខ្លឹមសារនៅក្នុងឯកសារគឺទ្រង់ទ្រាយឯកសារជា PDF (Portable Document Format)។ ទម្រង់ឯកសារជា PDF អាចបង្កើតបានយ៉ាងងាយស្រួល ដោយប្រើកម្មវិធីវាយអត្ថបទ។ ដើម្បីអានឯកសារ PDF បានចាំបាច់ត្រូវមានកម្មវិធីដែលអាចអានប្រភេទឯកសារ PDF ដែលមាននៅក្នុងកុំព្យូទ័រភាគច្រើន។