នៅក្នុងមេរៀននេះ អ្នកនឹងសិក្សាអំពី៖
◊ តើអ្វីទៅជាបទបង្ហាញ?
◊ ការប្រើរបៀបរបបនិយាយ និងកាយវិការត្រឹមត្រូវ
◊ របៀបរៀបចំស្លាយសម្រាប់ធ្វើបទបង្ហាញ ដោយប្រើកម្មវិធីបទបង្ហាញ និងប្លង់ស្លាយ។
◊ សិក្សាអំពីរបៀបផ្ដល់បទបង្ហាញបានត្រឹមត្រូវ។
◊ ស្គាល់ពីបុគ្គលិកលក្ខណៈរបស់អ្នកនិយាយឫអ្នកធ្វើបទបង្ហាញល្អ។
◊ ចេះប្រើមុខងាររបស់កម្មវិធីបទបង្ហាញដូចជាគោលគំនិតនៃការប្រើប្លង់ស្លាយ អត្ថបទ រូបភាព និងវត្ថុនៅក្នុងស្លាយដើម្បីរៀបចំនិងរចនាស្លាយមានលក្ខណៈងាយស្រួលយល់។
បទបង្ហាញ គឺជាទម្រង់នៃទំនាក់ទំនងដែលអ្នកនិយាយ(អ្នកផ្ដល់) ធ្វើការប្រាស្រ័យទាក់ទងគ្នាដោយផ្ទាល់មាត់អំពីប្រធានបទណាមួយទៅកាន់អ្នកស្ដាប់ ឬសមាជិកច្រើននាក់ផ្សេងទៀត។ គោលបំណងក្នុងការធ្វើបទបង្ហាញគឺដើម្បីចែករំលែកព័ត៌មានឬដើម្បីបញ្ចុះបញ្ចូលអ្នកស្ដាប់អំពីអត្ថប្រយោជន៍នៃផលិតផល ឬគំនិតរបស់ខ្លួន។
ដើម្បីរៀបចំបទបង្ហាញឱ្យបានល្អ អ្នកធ្វើបទបង្ហាញត្រូវតែយល់ឱ្យបានច្បាស់ពីអ្នកស្ដាប់ជានរណា តើពួកគេដឹងកម្រិតណាចំពោះប្រធានបទនៃបទបង្ហាញនិងថាតើគេយល់ស្របចំពោះប្រធានបទនៃបទបង្ហាញនេះដែរឬទេ។ ជាមួយនឹងព័ត៌មានទាំងអស់នេះ អ្នកនិយាយអាចសម្រេចចិត្តបានថា ព័ត៌មានណាត្រូវបង្ហាញនិងធ្វើយ៉ាងណារៀបចំវាតាមលំដាប់លំដោយដើម្បីបំពេញតាមគោលបំណងនៃបទបង្ហាញ ដើម្បីឱ្យអ្នកស្ដាប់ងាយយល់។
ព័ត៌មានផ្ដល់ឱ្យច្រើនហួសប្រមាណពេក ក៏ធ្វើឱ្យអ្នកស្ដាប់មានការធុញទ្រាន់ និងមិនសូវយកចិត្តទុកដាក់ដែលធ្វើឱ្យអ្នកស្ដាប់មិនយល់ពីខ្លឹមសារផងដែរ។
បទបង្ហាញត្រូវតែអនុវត្តតាមរបៀបដែលអាចធ្វើឱ្យអ្នកស្ដាប់យល់កាន់តែច្បាស់ពីគំនិតពាក់ព័ន្ធនឹងប្រធានបទនេះ។ ដើម្បីធ្វើដូច្នេះបានអ្នកធ្វើបទបង្ហាញត្រូវតែប្រាកដក្នុងចិត្តថា ព័ត៌មានដែលបានផ្ដល់ឱ្យបានរៀបតាមលំដាប់លំដោយត្រឹមត្រូវមួយជំហានម្ដងៗ ដែលស្ថាបនាយឺតៗនៅក្នុងគំនិតរបស់អ្នកស្ដាប់នូវរូបភាពដែលអ្នកនិយាយចង់ផ្ដល់ឱ្យ។
អ្នកនិយាយត្រូវតែមានទំនុកចិត្ត ផ្ដោតសំខាន់លើសំឡេង និងកាយវិការរបស់ពួកគេដើម្បីធ្វើឱ្យអ្នកស្ដាប់នៅតែចាប់អារម្មណ៍លើប្រធានបទនៃបទបង្ហាញរបស់ពួកគេ។
ទំនុកចិត្ត គឺបង្ហាញឡើងនៅពេលដែលអ្នកនិយាយជឿជាក់លើខ្លួនឯង និងសមត្ថភាពរបស់ពួកគេក្នុងការផ្ដល់ខ្លឹមសារ។
ស្លាយ គឺជារូបភាពដែលគេប្រើសម្រាប់ជាជំនួយដល់អ្នកធ្វើបទបង្ហាញក្នុងការពន្យល់អំពីគំនិតព័ត៌មានណាមួយទៅកាន់អ្នកស្ដាប់។ ស្លាយរួមមាន អត្ថបទ រូបភាព ឬប្រភេទព័ត៌មានផ្សេងទៀត។ គោលបំណងនៃការប្រើស្លាយ គឺដើម្បីជួយឱ្យអ្នកស្ដាប់ងាយយល់ពីអ្វីដែលអ្នកនិយាយចង់ថ្លែងប្រាប់។
កម្មវិធីធ្វើបទបង្ហាញ គឺជាកម្មវិធីកុំព្យូទ័រដែលជួយសម្រួលដល់អ្នកនិយាយក្នុងការបង្កើត រៀបចំ និងបញ្ចាំងស្លាយសម្រាប់ការធ្វើបទបង្ហាញ។ កម្មវិធីធ្វើបទបង្ហាញអនុញ្ញាត្តឱ្យអ្នកធ្វើបទបង្ហាញបង្កើតស្លាយតាមតម្រូវការ ព្រមទាំងអាចឱ្យពួកគេរួមបញ្ចូលអត្ថបទ រូបភាព វីដេអូ និងសំឡេងនៅក្នុងស្លាយបានទៀតផង។ ឯកសារដែលបានបង្កើត និងគ្រប់គ្រងដោយកម្មវិធីធ្វើបទបង្ហាញ ហៅថា ឯកសារបទបង្ហាញ។ ឯកសារបទបង្ហាញមានស្លាយទាំងអស់នៃបទបង្ហាញ។
នៅក្នុងស្លាយ អ្នកប្រើអាចដាក់អត្ថបទ និងរូបភាពនៅត្រង់ទីតាំងណាមួយ ដែលអ្នកប្រើចង់បានប៉ុន្តែរឿងសំខាន់ គឺត្រូវដាក់ពួកវាតាមរបៀប ដែលជួយឱ្យអ្នកស្ដាប់ងាយយល់ពីខ្លឹមសារនៃបទបង្ហាញ។ បើសិនជាស្លាយមានចំណងជើងឬឃ្លាប្រយោគដែលសំខាន់គេត្រូវដាក់នៅផ្នែកខាងលើនៃស្លាយ ហើយអត្ថបទនិងរូបភាពផ្សេងទៀតអាចរៀបចំនៅផ្នែកខាងក្រោម តាមរបៀបដែលងាយស្រួលក្នុងការអាននិងស្រួលមើល ដែលផ្សារភ្ជាប់ទៅនឹងខ្លឹមសារអត្ថបទ។
របៀបរបបនៃការដាក់អត្ថបទ និងរូបភាពនៅក្នុងស្លាយត្រូវបានគេហៅថា ប្លង់ស្លាយ។ ប្លង់ស្លាយអាចរួមមានប្រអប់អត្ថបទពីរប្រភេទផ្សេងទៀតផងដែរ គឺ៖
◊ ប្រអប់អត្ថបទដែលមានបញ្ជីចំណុច នឹងត្រូវប្រើនៅពេលដែលធ្វើបទបង្ហាញចង់រាយបញ្ជីជារចនាសម្ព័ន្ធចំណុចអំពីប្រធានបទ ដែលនឹងត្រូវបង្ហាញនៅក្នុងបទបង្ហាញ។
◊ ប្រអប់អត្ថបទធម្មតា នឹងត្រូវប្រើនៅពេលដែលស្លាយបង្ហាញអំពីគំនិតដែលមិនមែនជាផ្នែកនៃបញ្ជី ឬដើម្បីបញ្ជាក់អំពីព័ត៌មានដែលទាក់ទងនឹងរូបភាពដែលជាផ្នែករបស់ស្លាយ។
