នៅក្នុងមេរៀននេះ អ្នកនឹងសិក្សាអំពី៖
- ភាពខុសគ្នារវាងទំនាក់ទំនងដោយផ្ទាល់មាត់
ឬជាលាយលក្ខណ៍អក្សរ និងដោយកាយវិការ ព្រមទាំងលក្ខណៈនៃប្រភេទនីមួយៗ។
- លក្ខណៈនៃការស្ដាប់
និងទំនាក់ទំនងដែលល្អ ឬមានប្រសិទ្ធភាព រួមទាំងសារៈសំខាន់នៃភាសាកាយវិការ។
- ផ្នែកនៃកុំព្យូទ័រ និងការយល់ដឹងជាមូលដ្ឋានគ្រឹះអំពីរបៀបប្រើប្រាស់កុំព្យូទ័រសម្រាប់ធ្វើកិច្ចការអ្វីមួយ។
- របៀបរៀបចំឯកសារ និងថតនៅក្នុងកុំព្យូទ័រ។
ព័ត៌មានជាបណ្ដុំទិន្នន័យដែលមានអត្ថន័យគ្រប់គ្រាន់អំពីហេតុការណ៍ ព្រឹត្តិការណ៍ ឬស្ថានភាពជាក់លាក់នៅក្នុងបរិបទណាមួយ ដែលមានអត្ថន័យសម្រាប់អ្នកទទួល និងជួយបង្កើនចំណេះដឹង។ ចំណេះដឹង គឺជាអ្វីដែលបានទទួល បានរកឃើញ ឬរៀនអំពីប្រធានបទជាក់លាក់តាមរយៈជំនាញ ការអភិវឌ្ឍបំណិន ការយល់ដឹងឬភាពច្បាស់លាស់ជាមួយប្រធានបទ ដែលមនុស្សទទួលបានតាមរយៈបទពិសោធន៍ ឬការសិក្សា។ គតិបណ្ឌិត គឺជាលទ្ធភាពក្នុងការអនុវត្តការយល់ដឹង និងចំណេះដឹងដ៏ប្រសើរបំផុត ដើម្បីបង្កើតលទ្ធផលតាមការចង់បាន។
ទំនាក់ទំនង គឺជាដំណើរការផ្ទេរ ព័ត៌មានពីអង្គភាពមួយទៅអង្គភាពមួយផ្សេងទៀត។ព័ត៌មានដែលបានផ្ទេរអាចរួមមានទិន្នន័យ គំនិតនិងអារម្មណ៍។
ពាក្យថា បច្ចេកវិទ្យាព័ត៌មាន និងសារគមនាគមន៍ ត្រូវបានប្រើដើម្បីដាក់ឈ្មោះក្រុមបច្ចេកវិទ្យាដែលប្រើប្រាស់ឧបករណ៍អេឡិចត្រូនិក ដើម្បីផ្ទុកដំណើរការ និងទាក់ទងព័ត៌មាន។ បច្ចេកវិទ្យាព័ត៌មានរួមមាន កុំព្យូទ័រ ទូរសព្ទ វិទ្យុ ទូរទស្សន៍ ម៉ាស៊ីនថតរូបឌីជីថល ឧបករណ៍ថតសំឡេង វីដេអូ និងឧបករណ៍ផ្សេងៗទៀត។
កុំព្យូទ័រ គឺជាម៉ាស៊ីនអេឡិចត្រូនិក ដែលអាចប្រើសម្រាប់ជំនួយក្នុងការប្រមូល រៀបចំ គណនា និងផ្ដល់ព័ត៌មានយ៉ាងមានប្រសិទ្ធភាព។ កុំព្យូទ័រអាចប្រើសម្រាប់ធ្វើការងាររួមគ្នា ជាមួយអ្នកប្រើប្រាស់ផ្សេងទៀត ដើម្បីចែករំលែកព័ត៌មាន និងការកម្សាន្ត។ លើសពីនេះកុំព្យូទ័របានក្លាយជាឧបករណ៍ចាំបាច់សម្រាប់កិច្ចការការិយាល័យនាសម័យទំនើប និងជួយធ្វើឱ្យប្រសើរនូវទំនាក់ទំនង និងចំណេះដឹងផ្ទាល់ខ្លួន។
កម្មវិធីកុំព្យូទ័រ
ជាកម្មវិធីផ្នែកទន់ដែលត្រូវបានប្រើប្រាស់ដើម្បីធ្វើការងារផ្សេងៗ។
ឯកសារអត្ថបទ
ជាបណ្ដុំព័ត៌មានដែលបានបង្កើតនៅក្នុងកុំព្យូទ័រ ដែលមានដូចជា អត្ថបទ រូបភាព វីដេអូ
បទចម្រៀងឬប្រភេទព័ត៌មានផ្សេងៗទៀត។ ឯកសារជាសំណុំធាតុនៅក្នុងកុំព្យូទ័រដែលមានឈ្មោះផ្ទាល់ខ្លួនរបស់វា(ហៅថាឈ្មោះឯកសារ)។
ថតឯកសារ គឺប្រៀបដូចជាទូរ ដែលមាននាទីសម្រាប់ផ្ទុកឯកសារ និងថតរងផ្សេងៗមួយចំនួនទៀត។ ឯកសារនិងថតមានឈ្មោះផ្ទាល់ខ្លួនរបស់វា។
ការចុចកណ្ដុរ មានដូចជា ការចុចកណ្ដុរស្ដាំ កណ្ដុរឆ្វេង ការចុចកណ្ដុរទ្វេដង។ ផ្ទៃតុរបស់កុំព្យូទ័រ គឺជារូបភាពដំបូងដែលប្អូនៗឃើញលើអេក្រង់របស់កុំព្យូទ័រ (ម៉ូនីទ័រ) នៅពេលដែលកុំព្យូទ័របានបើក។ ធាតុនៅលើផ្ទៃតុ ឬរូបភាពតូចៗ ដែលតំណាងឱ្យវត្ថុឬកម្មវិធីហៅថារូបតំណាង។ បង្អួចកម្មវិធី គឺជាប្រអប់មួយនៅលើអេក្រង់ដែលបង្ហាញមាតិការរបស់ថត។ ប្អូនៗអាចបើកបង្អួចជាច្រើននៅលើផ្ទៃតុក្នុងពេលតែមួយបាន ប៉ុន្តែមិនអាចមើលឃើញពេញលេញទាំងអស់ក្នុងពេលតែមួយបានទេ។
