នៅក្នុងមេរៀននេះ អ្នកនឹងសិក្សាអំពី៖
- ការញែកឱ្យឃើញភាពខុសគ្នារវាងបរិបទ និងគំនិតសំខាន់ៗនៃខ្លឹមសារ និងការយល់ដឹងពីសារៈសំខាន់នៃរបៀបរបបសរសេរឬនិយាយនៅក្នុងការប្រាស្រ័យទាក់ទង។
- មធ្យោបាយ និងកូដនៃទំនាក់ទំនង។
- កម្មវិធីវាយអត្ថបទ ការវាយអត្ថបទ ប្រភេទពុម្ពអក្សរ និងអត្ថប្រយោជន៍នៃការប្រើប្រាស់កម្មវិធីវាយអត្ថបទ ដូចជាការពិនិត្យអក្ខរាវិរុទ្ធនៃពាក្យខ្មែរ។
- របៀបវាយអត្ថបទជាភាសាខ្មែរ
ដោយប្រើកម្មវិធីវាយអត្ថបទ។
បរិបទ ជាព័ត៌មានដែលអ្នកនិយាយបញ្ចូលក្នុងខ្លឹមសារដែលធ្វើឱ្យខ្លឹមសារកាន់តែច្បាស់លាស់ថែមទៀត ឬបញ្ជាក់ថាហេតុអ្វីបានជាត្រូវផ្ដល់ខ្លឹមសារនេះ។ វាមានសារៈសំខាន់ត្រូវផ្ដល់បរិបទគ្រប់គ្រាន់នៅក្នុងការប្រាស្រ័យទាក់ទង។ នៅពេលបរិបទមិនគ្រប់គ្រាន់ធ្វើឱ្យខ្លឹមសារពិបាកយល់ និងកាន់តែពិបាកសម្រាប់អ្នកស្ដាប់ទទួលយកខ្លឹមសារនោះ។
របៀបរបបនិយាយ ឬសរសេរត្រូវបានកំណត់ដោយលំនាំនៃការលើកដាក់សំឡេងឡើងចុះ(សូរសំឡេងឬពាក្យសម្ដី) និងតាមរយៈការជ្រើសរើសពាក្យឬវេយ្យាករណ៍មកប្រើ។ របៀបរបបនិយាយ ត្រូវបានគាំទ្រយ៉ាងខ្លាំងតាមរយៈភាសាកាយវិការក្នុងការប្រាស្រ័យទាក់ទង។ អាប្បកិរិយាបើកទូលាយ និងភាសាកាយវិការរស់រវើកបញ្ជាក់ពីរបៀបរបបដែលគួរឲ្យទុកចិត្ត និងចាប់អារម្មណ៍ខ្លាំងចំពោះអ្នកនិយាយ និងជួយបង្កើតអារម្មណ៍វិជ្ជមានចំពោះអ្នកស្ដាប់។ ការនិយាយ ឬសរសេរដោយមានរបៀបរបប និងភាសាកាយវិការជួយបង្កើនឱ្យអ្នកស្ដាប់មានការចាប់អារម្មណ៍និងការទទួលយកនូវខ្លឹមសារ។
មធ្យោបាយគឺជាឧបករណ៍ ឬមេឌៀដែលយើងអាចប្រើ ដើម្បីបញ្ជូនព័ត៌មានពីអ្នកផ្ញើទៅកាន់អ្នកទទួលដូចជា លិខិត ការផ្ញើសារខ្លីៗ សៀវភៅ កាសែត អ៊ីមែល បទបង្ហាញ ការសន្ទនា ទូរទស្សន៍ វិទ្យុ វីដេអូ ស្គរ ឬរគាំង សញ្ញាផ្សែង ការនិទានរឿង ចម្រៀង។ល។
ទំនាក់ទំនងអាចធ្វើទៅបាន បើសិនអ្នកផ្ញើ និងអ្នកទទួលចែករំលែកព័ត៌មានដែលមានកូដដូចគ្នា។ សព្វថ្ងៃនេះ ទំនាក់ទំនងដោយប្រើកូដយើងមិនអាចយល់បាន(ប្រើកូដសម្ងាត់)ត្រូវបានប្រើកាន់តែច្រើនក្នុងការប្រាស្រ័យទាក់ទងបែបអេឡិចត្រូនិក។
កម្មវិធីវាយអត្ថបទ គឺជាកម្មវិធីដែលអនុញ្ញាតឱ្យអ្នកប្រើបង្កើត ឯកសារអត្ថបទ កែសម្រួល ធ្វើទ្រង់ទ្រាយ និងរក្សាទុកបានយ៉ាងងាយព្រមទាំងអាចបោះពុម្ពតាមតម្រូវការបានទៀតផង។ និយាយរួមទៅអត្ថបទវិធីវាយអត្ថបទអាចត្រូវបានប្រើដើម្បីរៀបចំប្រភេទផ្សេងៗនៃឯកសារអត្ថបទ។ ឯកសារអត្ថបទត្រូវតែរក្សាទុកក្នុងថាសរឹង ឬនៅក្នុងCloud ដើម្បីរក្សាទុកបានយូរសម្រាប់ប្រើប្រាស់ពេលក្រោយទៀត។
ដើម្បីវាយដោយចងចាំប្អូនត្រូវតែដាក់ដៃតាមវិធីត្រឹមត្រូវលើប្លង់ក្ដារចុច ដើម្បីប្រាកដថា ប្អូនអាចចុចគ្រប់គ្រាប់ចុចទាំងអស់បានយ៉ាងងាយស្រួលលើប្លង់ក្ដារចុចដោយប្រើម្រាមដៃខុសៗគ្នាសម្រាប់អក្សរនីមួយៗដោយមិនចាំបាច់ប្ដូរដៃឡើយឬមើលនៅលើក្ដារចុចនោះឡើយ។
ដើម្បីបញ្ចូលតួអក្សរពិសេស ប្អូនត្រូវចុចម៉ឺនុយ Insert បន្ទាប់មកយកពាក្យ Symbol រួចជ្រើសរើសយកពាក្យ Windings or Webdings ដើម្បីរើសម៉ូត បន្ទាប់មកចុចប៊ូតុង យល់ព្រម។ ការដាក់តួអក្សរពិសេសជួយរំលេចន័យពាក្យឬឃ្លាឱ្យកាន់តែមានភាពទាក់ទាញ និងចាប់អារម្មណ៍បន្ថែមទៀត។
កម្មវិធីរៀនវាយយូនីកូដខ្មែរបង្កើតឡើង ដើម្បីជួយអ្នកប្រើឱ្យចងចាំទីតាំងគ្រាប់ចុចនៅលើប្លង់ក្ដារចុច និងដើម្បីហ្វឹកហាត់ការដាក់ម្រាមដៃលើប្លង់ក្ដារចុចឱ្យបានស្ទាត់ជំនាញ ដើម្បីវាយអត្ថបទបានលឿន និងត្រឹមត្រូវ។ដើម្បីរៀនវាយអត្ថបទឱ្យបានស្ទាត់ជំនាញ គឺត្រូវចំណាយពេលហ្វឹកហាត់ជារៀងរាល់ថ្ងៃ។
កម្មវិធីពិនិត្យអក្ខរាវិរុទ្ធ គឺជាមុខងារដែលមាននៅក្នុងកម្មវិធីវាយអត្ថបទ ដែលជួយអ្នកប្រើពិនិត្យលើពាក្យដែលគេវាយនោះប្រកបបានត្រឹមត្រូវដែរឬទេ។ បើមានបន្ទាត់អង្កាញ់ៗពណ៌ក្រហមនៅពីក្រោមពាក្យដែលវាយនោះ បញ្ជាក់ថា ពាក្យនោះយើងវាយមិនទាន់បានត្រឹមត្រូវទេ។ វាជាមុខងារមួយយ៉ាងសំខាន់បំផុតនៅក្នុងកម្មវិធីវាយអត្ថបទ។