(ជ២) មេរៀនទី១១៖ (សង្ខេបមេរៀន) គុណវិបត្តិនៃសុរា និងបារី

១. ចំណេះដឹងទូទៅអំពីសុរា និងបារី

         សុរាជាប្រភេទគ្រឿងស្រវឹងម្យ៉ាងដែលជះឥទ្ធិពលអាក្រក់ ដល់សុខភាពអ្នកប្រព្រឹត្តសមាជិកគ្រួសារនិងដល់សង្គមទាំងមូល ។ បារី និងសុរាជាគ្រឿងញៀនដែលបណ្តាលឱ្យអ្នកប្រព្រឹត្ត មានជំងឺពិការភាព និងមរណភាព មុនអាយុកាលប៉ុន្តែមនុស្ស គ្រប់រូបនឹងចៀសវាងបានដោយ មិនប្រើថ្នាំជក់ និងសេពសុរា។

  +   លទ្ធផលនៃការប្រើប្រាស់គ្រឿងស្រវឹងនិងបារីគឺ៖
        -   ការចំណាយថវិកាផ្ទាល់ខ្លួនទៅលើការបំផ្លាញ
        -   សុខភាព ជីវិត ព្រមទាំងផ្ដល់នូវផលអាក្រក់ធ្ងន់ធ្ងរចំពោះខ្លួនឯង និងគ្រួសារទៀតផង។
        -   ការផឹកសុរាបណ្ដាលឱ្យខូចសកម្មភាពធម្មតារបស់ខួរក្បាលធ្វើឱ្យមនុស្សមិនអាចគ្រប់គ្រងខ្លួនឯងបាន។
        -   ម្យ៉ាងទៀត ឥទ្ធិពលស្រាអាចធ្វើអ្នកផឹកមានជំងឺធ្ងន់ធ្ងរ ដល់ក្រពះ ពោះវៀន ថ្លើម ប្រមាត់ បំពង់ក និងសរសៃប្រសាទ។

         នៅក្នុងពិភពលោកពេលបច្ចុប្បន្ន គេប៉ាន់ប្រមាណថា មនុស្សច្រើនជាង បីលាននាក់ស្លាប់ជារៀងរាល់ឆ្នាំដោយ សារការប្រើប្រាស់ថ្នាំជក់។ ប្រសិនបើគេចាប់ផ្ដើមញៀនបារីនៅវ័យក្មេងនោះគេនឹង ឆាប់ក្លាយជាជនរងគ្រោះ ដោយសារជំងឺរហូតដល់ស្លាប់ ព្រោះបារីមានផ្ទុកសារធាតុគីមីជាច្រើនប្រភេទ ដែលសារជាតិទាំងនោះបណ្ដាលឱ្យអ្នកជក់កើតជំងឺមហារីក ជំងឺបេះដូង ប្រព័ន្ធដកដង្ហើម។
          តាមការស្រាវជ្រាវបានបង្ហាញថា ថ្នាំជក់ និងបារីផ្ទុកទៅដោយសារជាតិពុលជាង ៤០០០ ប្រភេទ ពីធម្មជាតិដែល ក្នុងនោះ ៦៩ ប្រភេទបណ្តាលឱ្យកើតជំងឺមហារីក។

   +  នៅក្នុងផ្សែងបារីគេសង្កេតឃើញ សារធាតុពុលទាំងនោះមានគឺ ៖ 
        -   អ៊ីដ្រូសែនស្យានីត ៖ ជាតិគីមីដែលគេប្រើសម្រាប់ធ្វើគ្រាប់បែកផ្សែងពុល។ 
        -   ហ្វ័រម៉ុលដេអ៊ីត ៖ ជាតិគីមីប្រើសម្រាប់ដាក់សរីរៈមនុស្ស សត្វស្លាប់កុំឱ្យស្អុយ។
        -   អាសេនិក ៖ ជាតិគីមីដែលគេប្រើសម្រាប់សម្លាប់ស្រមោច។
        -   ដេដេតេ ៖ ជាតិថ្នាំសម្លាប់សត្វល្អិត។
        -   នីកូទីន ៖ ជាតិគីមីដែលបណ្តាលឱ្យញៀន។
        -   ណាប់តាឡែន ៖ ជាថ្នាំសម្លាប់ខ្មូត។
        -   ប៊ុយតាន ៖ ជាធាតុគីមីប្រើសម្រាប់ចង្ក្រានឧស្ម័ន។

២. មូលហេតុនៃការសេពសុរានិងការជក់បារី

         តាមការស្រាវជ្រាវរបស់អ្នកវិទ្យាសាស្ត្របានដឹងថាការញៀនសុរាមានច្រើនប្រភេទដែលក្នុងនោះមានការញៀនសុរាតាមតំណពូជ គឺពីមនុស្សជំនាន់មួយទៅជំនាន់មួយទៀត។ ពោលគឺពីឪពុកម្ដាយទៅកូន ហើយការញៀនសុរាខ្លះ បណ្តាលមកពីគេមានការតានតឹងចិត្ត ការខូចចិត្ត ការព្រួយបារម្ភ ការតូចចិត្ត និងអ្នកញៀនស្រាខ្លះទៀតដោយសារការសេពគប់មិត្តភក្កិមិនល្អ ការយកតម្រាប់តាមឪពុកម្ដាយជា អ្នកផឹកស្រា និងសង្គមអូសទាញ។

   +   មូលហេតុនៃការជក់បារី សេពសុរាមានដូចជា៖
         -   ការបង្ខំពីមិត្តភក្កិឬការយកតម្រាប់តាមមិត្តភក្កិ។
         -   មនុស្សចាស់ដែលជាអ្នកជក់បារីឬសេពសុរាមានដូចជាឪពុកម្ដាយ ជីដូនជីតា អ្នកជិតខាង។
         -   ការអផ្សុកនិងការកាត់បន្ថយការពិបាកចិត្ត។
         -   ការផឹកសុរាបណ្ដាលឱ្យខូចសកម្មភាពធម្មតារបស់ខួរក្បាលធ្វើឱ្យ មនុស្សមិនអាចគ្រប់គ្រងខ្លួនឯងបាន។ ម្យ៉ាងទៀត ឥទ្ធិពលស្រាអាចធ្វើ           
         -   អ្នកផឹកមានជំងឺធ្ងន់ធ្ងរ ដល់ក្រពះ ពោះវៀន ថ្លើម ប្រមាត់បំពង់ក និង សរសៃ ប្រសាទ។
         -   ជាទូទៅអ្នកញៀនស្រា និងបារីតែងតែនិយាយកុហកចំពោះខ្លួនឯង និងអ្នកដទៃដោយសន្យាថាឈប់ផឹកនឹងជក់ទៀតហើយ តែជាការពិតមិនអាចធ្វើបានឡើយ។ អ្នកញៀនស្រានិងបារីមិនអាចកាត់ផ្ដាច់ឬបញ្ឈប់ការផឹកសុរានិងជក់បារីបានទេប្រសិនបើពួកគេគ្មានការតាំងចិត្តឱ្យបានមុតមាំ។

៣. ផលប៉ះពាល់នៃសុរានិងបារី

   +   ផលប៉ះពាល់នៃសុរា និងបារីចំពោះផ្លូវកាយ៖
        -   ការសេពសុរាច្រើនហួសហេតុមិនត្រឹមតែធ្វើឱ្យប៉ះពាល់ ធ្វើឬបំផ្លាញសុខភាពអ្នកផឹកប៉ុណ្ណោះទេ ប៉ុន្តែថែមទាំងបង្ក ឱ្យមានបញ្ហាដល់គ្រួសារ និងសង្គមថែមទៀតផង។
        -   ឥទ្ធិពលនៃសុរានឹងធ្វើឱ្យអ្នកផឹកមានជំងឺធ្ងន់ធ្ងរដូចជា ជំងឺសួត ក្រពះ ពោះវៀន ថ្លើម បេះដូងប្រម៉ាត់ បំពង់ក ។ល។
        -   នៅប្រទេសកម្ពុជាតាមការអង្កេតជាទូទៅ អ្នកជក់បារី ភាគច្រើនបំផុតជាបុរស។ ការជក់បារីមិនគ្រាន់ តែប៉ះពាល់ ឬធ្វើឱ្យគ្រោះថ្នាក់ដល់អ្នកជក់ប៉ុណ្ណោះទេតែអ្នកនៅជុំវិញ ពួកគេជាពិសេសកុមារ ស្ត្រីមានផ្ទៃពោះក៏ទទួលផលប៉ះពាល់ក៏ដូចគ្នាដែរ ព្រោះបារីមួយដើមមួយដើមសុទ្ធតែមានជាតិពុល ដែលមានឥទ្ធិពលអាក្រក់ទៅលើសុខភាពអ្នកជក់និងអ្នកនៅជុំវិញខ្លួន។

   +   ឥទ្ធិពលដែលគេបានស្គាល់ច្បាស់កើតមានចំពោះអ្នកជក់បារីគឺ៖
        -   សុខភាពមិនល្អ៖ សក់មានក្លិនអាក្រក់ ធ្មេញលឿង ស្បែកឡើងស្ងួតខូចពណ៌និងជ្រួញ ក្រចកដៃពណ៌លឿង ធំក្លិនអាក្រក់នៅពេលដែលនៅជិតអ្នកដទៃ។
        -    ជំងឺធ្ងន់ធ្ងរ៖ ជំងឺមហារីកស្បែក ថ្លើមបេះដូង មាត់ បំពង់ក បំពង់អាហារខួរក្បាល និងជំងឺដាច់សរសៃឈាមក្នុងខួរក្បាល ជំងឺរលាកទងសួតរ៉ាំរ៉ៃជំងឺហើមសួត ប្លោកនោម តម្រងនោម ដំបៅក្រពះ ជំងឺកើនសម្ពាធឈាម។
        -   ជំងឺរ៉ាំរ៉ៃដូចជា៖ រោគមហារីកនិងជំងឺសួត បង្កឱ្យមនុស្សស្លាប់ជារៀងរាល់ថ្ងៃ។

  +   ផលប៉ះពាល់ចំពោះគ្រួសារ និងសង្គម ៖
        -   ការផឹកស្រា និងការជក់បារី មិនគ្រាន់តែមានផលប៉ះពាល់ ធ្វើឱ្យគ្រោះថ្នាក់ដល់អ្នកប្រព្រឹត្តប៉ុណ្ណោះទេតែវាបានធ្វើឱ្យអ្នកនៅជុំវិញខ្លួនទាំងស្ត្រី ទាំងកុមារគ្រប់វ័យ ក៏ទទួលផលប៉ះពាល់ដូចគ្នាដែរ។
        -   ការផឹកស្រា និងការជក់បារី មិនគ្រាន់តែមានផលប៉ះពាល់ ធ្វើឱ្យគ្រោះថ្នាក់ដល់អ្នកប្រព្រឹត្តប៉ុណ្ណោះទេ តែវាបានធ្វើឱ្យអ្នកនៅជុំវិញខ្លួនទាំងស្ត្រី ទាំងកុមារគ្រប់វ័យ ក៏ទទួលផលប៉ះពាល់ដូចគ្នាដែរ។
        -   អ្នកផឹកសុរា ពេលផឹកស្រវឹងបង្ករឱ្យ មានគ្រោះថ្នាក់ ចរាចរណ៍ប្រើហិង្សានិងជម្លោះជាមួយគ្រួសារអ្នកដទៃ និងជួនកាលបង្កឱ្យមានការវាយដំគ្នាទៀតផង។
        -   ពួកអ្នកទាំងនោះគេហៅថាអ្នកជក់ប្រយោល ដែលស្រូបផ្សែងបារីពីអ្នកជក់ ហើយក៏មានគ្រោះថ្នាក់ដល់សុខភាព ដូចអ្នកជក់បារីដែរដូចជាពួកគេនឹងកើតជំងឺមហារីកសួត ជំងឺគាំងបេះដូង និងជំងឺដល់ប្រព័ន្ធដកដង្ហើម។
        -   ការផឹកសុរាការជក់បារី មិនត្រឹមតែខាតបង់ប្រាក់កាសសម្រាប់ចំណាយទិញបារី និងស្រាប៉ុណ្ណោះទេតែវាថែមទាំង ខាតបង់ប្រាក់កាសសម្រាប់ចំណាយយកទៅ  ព្យាបាលជំងឺ ពួកគេនឹងបោះបង់ចោលការងារ គ្មានការងារធ្វើ បោះបង់ចោលការរៀនសូត្រ ធ្វើឱ្យអាប់អោនកិត្តិយស ជួបភាពក្រីក្រ មានជម្លោះបែកបាក់គ្នា បណ្តាលឱ្យមានកូនកំព្រា និងស្រ្តីមេម៉ាយ។

   +   ផល​អាក្រក់ដោយការផឹកស្រា ៖
        -   កាត់បន្ថយ​ការ​ឈប់គិត អាច​ភ្លេចភ្លាំង បាត់បង់ការ​ចងចាំ។
        -   ប្រព្រឹត្ត​អំពើ​មិន​គប្បី គ្មាន​ការ​ពិចារណានិយាយ​ផ្ដេសផ្ដាស។
        -   ឡូឡា​មិន​ខ្មាសអៀនកើត​មាន​គ្រោះថ្នាក់​ចរាចរណ៍ បង្ក​ចលាចល បាត់​បង់​មនសិការ​ការងារ។
        -   ប្រព្រឹត្ត​អំពើ​ហិង្សា​ក្នុង​គ្រួសារ បង្ក​ជម្លោះ វាយដំបែកបាក់​គ្រួសារ គ្រួសារក្រីក្រ គ្រួសារ​គ្មាន​សុភមង្គល។
        -   ពិការភាព ស្លាប់ បាត់បង់​ធនធានមនុស្ស ធនធាន ចំណាយ​ប្រាក់​ព្យាបាល​ជំងឺ។

៤. វិធីសំខាន់ៗក្នុងការចៀសវាងការផឹកសុរា និងការជក់បារី

        ការផឹកសុរានិងការជក់បារីត្រូវបានគេទទួលស្គាល់ថា ដែលបណ្ដាលឱ្យមានគ្រោះថ្នាក់ដល់សុខភាពព្រមទាំងខាតបង់ថវិកាជាច្រើន ។

   +   វិធីមួយចំនួនដើម្បីជៀសវាងពីការផឹកស្រានិងការជក់បារីមាន៖                                                                     
        -   ការបដិសេធ និងភ្លក្សសាកល្បងផឹកស្រាជក់បារី ព្រោះវា អាចធ្វើឱ្យអ្នកភ្លក្សញៀនបាន។
        -   ការបោះបង់ចោលទម្លាប់ដែលទទួលភ្ញៀវដោយសុរា និងបារី។
        -   ការគេចចេញពីកន្លែងដែលមានផ្សែងបារី ឬនៅជិតអ្នកផឹកសុរា ជក់បារី។
        -   ការបង្ហាញជាគំរូល្អៗដល់មិត្តភក្កិបងប្អូន។
        -   ឪពុកម្ដាយធ្វើជាគំរូល្អដល់កូន ព្រោះកូនដែលមានឪពុកម្ដាយផឹកស្រា ជក់បារីភាគច្រើនតែងតែ រៀនផឹកស្រាជក់ បារីដូចពុកម្ដាយ​គេដែរ។
        -   ការបង្កើតចំណងទាក់ទងឱ្យបានច្រើនជាមួយមិត្តភ័ក្កិ ដែលមិនចេះផឹកស្រានិងការជក់បារី ។                                    
        -   ការបញ្ឈប់ផ្សាយពាណិជ្ជកម្មស្រា បារីតាមប្រព័ន្ធផ្សព្វផ្សាយ គ្រប់ប្រភេទ។