ជំពូកទី ១ មនុស្សជាច្រើនរស់នៅមជ្ឈដ្ឋានក្ដៅ
មេរៀនទី ៥ កសិករនៅអាស៊ីម៉ូសុង
ពន្យល់ពាក្យ
· ដំណាំច្បារ ៖ ដំណាំដែលគេដាំក្នុងសួនជុំវិញផ្ទះមានការថែទាំយ៉ាងមត់ចត់។
· អាស៊ីមូសុង ៖ ជាតំបន់មួយក្នុងពិភពលោកដែលទទួលឥទ្ធិពលខ្យល់ម៉ូសុងរួមមាន អាស៊ីអាគ្នេយ៍ អាស៊ីទក្សិណ អាស៊ីបូព៌ា។
· មូសុងវស្សា ៖ ជាខ្យល់រដូវបកមកពីមហាសមុទ្រឥណ្ឌា ពីខែ ឧសភា ដល់ខែ តុលា វាជាខ្យល់សមុទ្រផ្ទុកដោយចំហាយទឹកច្រើន នាំមកនូវទឹកភ្លៀងដ៏ច្រើនសន្ធឹកសន្ធាប់។
· ក្រឡាចកត្រង្គ ៖ ក្រឡាបួនៗជ្រុង ដូចក្រឡារែក ឬក្រឡាអុក។
· ស្រែថ្នាក់ ៖ រាងធរណីមាត្រដីស្រែចម្ការ នៅតាមជម្រាលភ្នំ មានសណ្ឋានដូចកាំជណ្តើរជាថ្នាក់ៗ។
· ទុរ្ភិក្ស ៖ ដំណើរក្របាយ, ដំណើរអត់បាយ ឬអត់ឃ្លាន, ស្រុកកើតទុរ្ភិក្ស, ច្រើនសរសេរក្លាយជា ទុរភិក្ស។
១. ភ្លៀងមូសុងអនុគ្រោះដល់ជីវភាព
- ភ្លៀងមូសុងវស្សាចាប់ផ្តើមធ្លាក់ស្រោចស្រពមកលើអាស៊ីអាគ្នេយ៍ចាប់ពីខែឧសភា ដល់ខែ តុលា។ ខ្យល់ពីទិសនិរតីបក់មកពីមហាសមុទ្រឥណ្ឌា ផ្ទុកដោយចំហាយទឹកច្រើននាំមកនូវទឹកភ្លៀងដ៏ច្រើនសន្ធឹកសន្ធាប់ អាចចញ្ចឹម
- ប្រជាជនបានច្រើនរាប់មិនអស់ និងធ្វើឱ្យដំណាំស្រូវដុះលូតលាស់បានល្អ និងទទួលបានផលច្រើន។
២. ការងារស្រែចម្ការដ៏លំបាកលំបិន
- ដើម្បីទទួលបានផលស្រូវហូបគ្រប់គ្រាន់ កសិករត្រូវតែខិតខំធ្វើស្រែយ៉ាងលំបាកបំផុត។ នៅចុងរដូវប្រាំង កសិកររៀបចំដីធ្លី។ ភ្លៀងដំបូងដែលចាប់ផ្តើមធ្លាក់ ហើយពូជស្រូវដែលសាប ព្រោះក៏ចេញពន្លកមក។ កសិករភ្ជួររាស់ដី សម្អាតដីជាបណ្តើរៗ។ ពេលមានភ្លៀងធ្លាក់ទឹកដក់ក្នុងស្រែ កសិករដកសំណាប់យកទៅស្ទូង។ កសិករត្រូវធ្វើដីឱ្យរាបស្មើ និងធ្វើភ្លឺឱ្យជិតល្អ ហើយរឹងមាំ ដើម្បីរក្សាទឹកទុកតាមតម្រូវការព្រោះដំណាំស្រូវត្រូវការទឹកជាប្រចាំ។ នៅតំបន់វាលរាប ស្រែមានរាងជាក្រឡាចត្រង្គ។ ពេលស្រូវទុំកសិករនាំគ្នាច្រូតកាត់ដោយកណ្តៀវចងជាកណ្តាប់រួចនាំយកទៅបោក ឬបញ្ជាន់។ នៅតំបន់ភ្នំ កសិកររៀបចំដីធ្លីតាមជម្រាលភ្នំតាមថ្នាក់ៗ ហៅថាស្រែថ្នាក់។ តំបន់ខ្លះមានបំណាចដើម្បីបន្សាចបញ្ចូលទឹកក្នុងស្រែ ហើយគេអាចធ្វើស្រែបានពីរ ឬបីដងក្នុងមួយឆ្នាំ។ ដំណាំស្រូវបានផលច្រើន បើយើងមើលថែទាំបានល្អ ដូចជាការប្រើប្រាស់ដីបានត្រឹមត្រូវចាញ់ថ្នាំសម្លាប់សត្វល្អិត ជ្រើសរើសពូជការបញ្ចូលទឹកតាមតម្រូវការ។
៣. ស្រូវចិញ្ចឹមប្រជាជនបានមួយភាគបីនៅលើផែនដី
- ស្រូវជាដំណាំស្បៀងចាំបាច់នៅអាស៊ីមូសុង។ ប្រជាជនជាង ២០០០លាននាក់យកស្រូវធ្វើជាអាហារប្រចាំថ្ងៃ។ កាលពីមុនប្រជានអាស៊ីមូសុង ជួបប្រទះ និងការបរិភោគមិនគ្រប់គ្រាន់ ។ តែបច្ចុប្បន្ននេះអាស៊ីមូសុងលែងជួបនឹង
- គ្រោះទុរិ្ហក្សទៀតហើយ ព្រោះកសិករយល់ដឹងពីបច្ចេកទេសធ្វើដំណាំកសិកម្ម ដើម្បីទទួលបានទិន្នផលខ្ពស់ ដោយត្រូវធ្វើប្រព័ន្ធធារាសាស្រ្ត ការជ្រើសរើសពូជ ការប្រើប្រាស់ដី ថ្នាំសម្លាប់សត្វល្អិត ធ្វើដីឱ្យបានរាបស្មើ និងធ្វើភ្លឺសម្រាប់ទប់ទឹក។ ការដាំដុះបែបនេះទើបអាចចិញ្ចឹមប្រជាពលរដ្ឋដ៏ច្រើនសន្ធឹកសន្ធាប់ និងបានគ្រប់គ្រាន់។