ជំពូកទី ១ មនុស្សជាច្រើនរស់នៅមជ្ឈដ្ឋានក្ដៅ
មេរៀនទី ៣ ទីក្រុងធំៗក្នុងតំបន់ចន្លោះត្រូពិច
ពន្យល់ពាក្យ
· ចំណោលស្រុកស្រែ ៖ ចលនាបំលាស់លំនៅនៃប្រជាជនមកកាន់ទីក្រុង ទីប្រជុំជនដោយមិនវិលត្រឡប់វិញ។
· នគរូបនីយកម្ម ៖ ការរៀបចំ និងពង្រីកក្រុង ដើម្បីតម្រូវតាមភាពចាំបាច់នៃដំណើរការរីកចម្រើនផ្នែកសង្គម សេដ្ឋកិច្ច ។
· តតិយលោក ៖ លោកទីបី ប្រើសម្រាប់សម្គាល់ក្រុមប្រទេសដែលជាអតីតទឹកដីអាណានិគមដែលបានទទួលឯករាជ្យក្រោយសង្រ្គាមលោកលើកទី២ ហើយបច្ចុប្បន្ននៅមានខឿនសេដ្ឋកិច្ចអន់ថយនៅឡើយ ។
១. ទីក្រុងកាន់តែរីកធំ
- នៅតំបន់ក្ដៅ ការរីកធំនៃទីក្រុងជាបាតុភូតថ្មីដែលទើបកើតឡើងនៅរវាងឆ្នាំ១៩៥០ 
ក្នុងសន្ទុះមួយខ្លាំងក្លាបំផុត។ ជារៀងរាល់ថ្ងៃទីក្រុងកាន់តែរីកធំ ពោពេញដោយមនុស្សមកពីជនបទ ដើម្បីស្វែងរកការងារធ្វើ។
- នគរូបនីយកម្មនៅមជ្ឈដ្ឋានក្ដៅមានសន្ទុះគ្រប់ទីកន្លែង។ នៅឆ្នាំ២០០០ទីក្រុងកាន់តែរីកធំស្ទើរតែទាំងអស់និងបានលេចឡើងនៅក្នុងតំបន់ចន្លោះត្រូពិច ។
២. សង្កាត់អ្នកមាន និងសង្កាត់អ្នកក្រ
- នៅទីក្រុងរីយ៉ូដឺសានេរ៉ូ ប្រទេសប្រេស៊ីលមានទិដ្ឋភាពពីរផ្ទុយគ្នា នៅកណ្ដាល
ក្រុងគេឃើញមាន អគារទំនើប ខ្ពស់ៗ ស្អាតៗ មានហាងទំនិញប្រណិតៗ ។ ទន្ទឹមនឹងនេះគេក៏ឃើញមានតំបន់សំណង់អនាធិបតេយ្យមាន ខ្ទមតូចៗធ្វើអំពី ឈើប្រក់សង្ក័សី ច្រែះស៊ី រខេករខាក រើសពីកន្លែងចាក់សំរាម ពួកគាត់រស់នៅយ៉ាងលំបាក ។
- ដោយគ្មានបណ្ដាញទឹក ស្អាត អគ្គិសនី បង្គន់ លូទឹក និងផ្លូវដើរស្រួលទេ។ ជនខ្លះប្រកបរមុខរបរកំប៉ិកំប៉ុកចិញ្ចឹមពោះ ហើយកុមារៗតែងភ្ញាក់ពីព្រលឹមទៅរើសកាកសំណល់បន្តិចបន្ទួចពីកន្លែងចាក់សំរាមធ្វើជាអាហារ ។
៣. បញ្ហាធ្ងន់ធ្ងររបស់ទីក្រុងនៃប្រទេសកំពុងអភិវឌ្ឍន៍
- ការធ្វើចំណោលស្រុកស្រែដ៏ច្រើនសន្ធឹកសន្ធាប់មកនៅទីក្រុង បានបង្កភាពស្មុក
ស្មាញដល់ទីក្រុង ពួកគេរស់នៅគ្មានអនាម័យតាមចន្លោះខ្ទម មានទឹកកខ្វក់ សំរាម ខ្យល់រងនូវការបំពុល ធ្វើឱ្យប៉ះពាល់បរិស្ថាន ធ្វើឱ្យបាត់បង់សោភណ្ឌភាពទីក្រុង និងបង្កររោគផ្សេងៗ ប៉ះពាលដល់សុខភាពប្រជាជន។ លើសពីនេះទៅទៀតគេឃើញមានអំពើហិង្សា ពេស្យាចារផងដែរ។
