ជំពូកទី ១ មនុស្សជាច្រើនរស់នៅមជ្ឈដ្ឋានក្ដៅ
មេរៀនទី ៤ ប្រជាជនកាប់គាស់រានព្រៃអេក្វាទ័រ
ពន្យល់ពាក្យ
· កសិកម្មព្រៃដុត ៖ វិធីដាំដុះតាមបែបប្រពៃណីម្យ៉ាង ដោយដុតព្រៃយកដីដាំដំណាំ ។ ម្យ៉ាងទៀតហៅថាកសិកម្មពនេចរ ព្រោះកសិកម្មនេះត្រូវប្ដូរទីតាំងជានិច្ចពេលដីខ្សោះអស់ជីជាតិ ។
· កសិកម្មពនេចរ ៖ ជាកសិកម្មដែលផ្លាស់ប្ដូរទីតាំងនៅពេលដីខ្សោះអស់ជីជាតិក្នុងរយៈពេលពី ៣ ទៅ៤ឆ្នាំដែលអនុវត្តដោយប្រជាជនព្រៃស្ដុក ឬព្រៃរបោះ ។
· អាម៉ាសូនី ៖ ឈ្មោះតបន់មួយនៅអាមេរិកខាងត្បូងដែលគ្របដណ្ដប់ដោយព្រែស្ដុក(ព្រៃអេក្វាទ័រជាមហាវាលទំនាបមួយនៅទ្វីបអាមេរិកខាងត្បូង លាតសន្ធឹងលើប្រទេសជាច្រើន ជាពិសេសនៅលើប្រេទេសប្រេស៊ីល ។
· អាម៉ាសូន ៖ ឈ្មោះទន្លេមួយនៅតំបន់អាម៉ាសូនី ។
១. ការគាស់រាន់ដីតាមបែបប្រពៃណី
- កសិករនៅតំបន់អេក្វាទ័រនាំគ្នាកាប់គាស់រានដី និងព្រៃដុត ដើម្បីវាតទីតាំង
ធ្វើលំនៅ និងសម្រាប់ដាំដំណាំ ក្នុងមជ្ឈដ្ឋានមួយដ៏លំបាក។ ដីព្រៃដុតផ្ដល់ផេះមានជីជាតិសម្រាប់កសិករធ្វើចម្ការដាំដំណាំយកមើម ដំឡូង ត្រាវ និងធញ្ញជាតិ ពោត សណ្ដែក ស្រូវ... ។ ការដាំដុះលើដីព្រៃដុតពីរបីឆ្នាំក្រោយមកដីរេចរិលខ្សោះអស់ជីជាតិ កសិករបោះបង់ដីចាស់ចោល រើទៅនៅកន្លែងថ្មីដោយប្រើវិធីដុតព្រៃដដែល ។ គេទុកឱ្យព្រៃដុះឡើងវិញលើដីដែលបោះបង់ កសិកម្មបែបនេះហៅថា កសិកម្មព្រៃដុត ឬកសិកម្មពនេចរ ។ កសិកម្មបែបនេះមិនអាចចិញ្ចឹមប្រជាជនបានច្រើនឡើយ ។
២. ការដ្ឋានកាប់ព្រៃផ្ដល់ក្ដីបារម្ភ
- សហគ្រាសធំៗមួយចំនួន គាប់ឈើលក់ឱ្យរោងចក្រ ដោយកាប់តែឈើល្អៗ ដូចជា
អាកាស៊ូ អូគូមេ ជាឈើសម្រាប់ធ្វើក្ដារបន្ទះ។ នៅទ្វីបអាព្រិចការកាប់ឈើមានការប្រុងប្រយ័ត្នណាស់ ។ ក្នុងមួយហិតាគេកាប់តែ ២ ឬ ៣ ដើមប៉ុណ្ណោះ។ នៅអាស៊ីអាគ្នេយ៍ ព្រៃឈើត្រូវបានកាប់បំផ្លាញក្នុងទ្រុងទ្រាយធំ ដែលធ្វើឱ្យបាត់បង់យ៉ាងឆាប់រហ័ស។
៣. ការកាប់គាស់រានដីតាមបែបទំនើប
- ការស្ថាបនាផ្លូវគមនាគមន៍ថ្មីធ្វើឱ្យមនុស្សមានភាពងាយស្រួលចូលទៅរុករានព្រៃឈើ។ ថ្មីៗនេះមានការកាប់បំផ្លាញព្រៃឈើអស់ជាច្រើនលានហិតា។
- នៅអាម៉ាសូនី កសិករដុតព្រៃនៅតាមអមសងខាងផ្លូដើម្បីយកដីដាំដំណាំ និងចិញ្ចឹមសត្វ ។ 
ការធ្វើសំណង់វារីអគ្គិសនី និងអាជីវកម្មរ៉ែ ធ្វើឱ្យព្រៃឈើវិនាសហិនហោចបន្តិចម្ដងៗ។ ការធ្វើអាជីវកម្មឈើ និងរ៉ែរួមទាំងការស្ថាបនាផ្លូវគមនាគមន៍ និងការដុតព្រៃយកដីដំាដំណាំ និងចិញ្ចឹមសត្វ បានធ្វើឱ្យបាត់បង់ព្រៃឈើជាច្រើនលានហិចតា ។ ការធ្វើបែបនេះធ្វើឱ្យមានការព្រួយបារម្ភយ៉ាងខ្លាំង នៅពេលព្រៃឈើបាត់បង់ ដីគ្មានគម្របត្រូវភ្លៀងហូរច្រោះ ដីបាត់បង់ជីជាតិ បាត់បង់ភ្នាក់ងារសម្អាតបរិយាកាស និងបាត់បង់ភ្នាក់ងារផលិតអុកស៊ីសែនសម្រាប់ទ្រទ្រង់ជីវិតមនុស្ស សត្វ នៅលើភពផែនដី។