ពាក្យ “មាតុភូមិ” មានន័យថាប្រទេសកំណើត ស្រុកកំណើត។
❶. សិក្សាពាក្យគន្លឹះ
- ពលរដ្ឋ (គុ.)
ពលរបស់រដ្ឋ ពលអាស្រ័យនៅក្នុងរដ្ឋប្រជាជនទាំងប្រុសស្រី ដែលទុកជាកម្លាំងរបស់ប្រទេស។
- ឆន្ទៈ (ន.)
សេចក្តីប្រាថ្នា បំណង គំនិតការយល់ព្រម។
- សមត្ថភាព (ន.) ភាពនៃសេចក្តីអាចហ៊ាន សេចក្តីមោះមុត។ល។
- ប្រពៃណី (ន.) ទំនៀម ពូជពង្ស
តំណវង្សត្រកូល។
- ចងអាឃាត (ន.) ការកួចភ្ជាប់គ្នានូវគំនុំគុំកួនការចងចិត្តគុំបង្រុងនឹងធ្វើការព្យាបាទ។
- កេរមរតក (ន.) ដំណែលដែលបន្សល់ទុកពីបុគ្គលដែលស្លាប់ហើយ
ជាសម្បត្តិរបស់ដូនតា
ឬមាតាបិតាដែលបានស្លាប់ទៅហើយ។
- តុល្យភាព (ន) ភាពស្មើគ្នា
ស្របគ្នា ដូចគ្នា ។
- គ្រូបាធ្យាយ (ន) គ្រូបង្រៀនធម៌ បង្រៀនច្បាប់ ។
❷. អត្ថបទសង្ខេប
ការស្គាល់ភារកិច្ចរបស់ខ្លួនចំពោះមាតុភូមិគឺ
ជាឧត្តមភាពមួយដ៏ប្រសើរបំផុត ពីព្រោះការស្គាល់ពីភារកិច្ចរបស់ខ្លួនដើម្បីបម្រើជាតិ
មាតុភូមិឱ្យបានល្អប្រកបដោយឆន្ទៈមុតស្រួច ប្រកាន់យុតិ្តធម៌ សច្ចធម៌ សុចរិត និងគុណធម៌សីលធម៌រស់នៅសមរម្យ
ថ្លៃថ្នូរ។
អត្ថបទបង្ហាញឱ្យឃើញច្បាស់នូវ“តម្លៃពលរដ្ឋម្នាក់ៗ”
ដែលស្រឡាញ់គ្នាសហការសាមគ្គីគ្នា និងការចេះជួយគ្នាទៅវិញទៅមកក្នុងការធ្វើការងារ
ដើម្បីជាតិមាតុភូមិ និងប្រជាជនខ្លួនឱ្យថ្កុំថ្កើង រុងរឿង មានកិត្តិយសខ្ពង់ខ្ពស់
និងមានការអភិវឌ្ឍ។
ពលរដ្ឋទាំងអស់
គឺសុទ្ធតែមានភារកិច្ចបម្រើមាតុភូមិបានគ្រប់ៗគ្នា។ ប៉ុន្តែ ដើម្បីឱ្យសម្រេចផលល្អ
អ្នកត្រូវមានឆន្ទៈមុតស្រួច មានស្មារតីប្តូរផ្តាច់ ប្រកាន់យកយុត្តិធម៌ជាមូលដ្ឋាន។
វាសនាប្រទេសជាតិពឹងផ្អែកលើពលរដ្ឋគ្រប់រូប។
