រាជសព្ទ [រាច-ជៈ-ស័ប] សព្ទស្តេច គឺពាក្យសម្រាប់ស្តេច ឬពាក្យសម្រាប់ប្រើចំពោះស្តេច។
សង្កេតខ្លឹមសារក្នុងសំបុត្រខាងក្រោម៖
ប៉ារីស,ថ្ងៃទី១៣
ខែមីនា ឆ្នាំ២០១០
បុត្រសូមក្រាបថ្វាយបង្គំព្រះមាតា
ព្រះបិតាជាទីនឹករឭកដ៏ជ្រាលជ្រៅ!
អស់រយៈពេលច្រើនខែមកហើយ ដែលបុត្របានមករស់នៅក្នុងទីក្រុងប៉ារីសប្រទេសបារាំង ដើម្បីបន្តការសិក្សា។ ក្នុងរយៈពេលនេះ បុត្រមានសេចក្តីសុខធម្មតាទេប៉ុន្តែបុត្រមានសេចក្តីនឹករឭកមកដល់់ព្រះមាតានិងព្រះបិតាជាពន់ពេក ។ បុត្រមិនដឹងថា តើទ្រង់មានសុខទុក្ខ និងមានព្រះទ័យនឹករឭកមកដល់បុត្រដែរឬយ៉ាងណា?
ចំណែកការសិក្សាវិញ បុត្រកំពុងយកព្រះទ័យទុកដាក់ព្យាយាមយ៉ាងខ្លាំង សូមព្រះមាតាព្រះបិតាកុំព្រួយព្រះទ័យឱ្យសោះ ។ កាលពីឆ្នាំមុន បុត្រទទួលបានចំណាត់ថ្នាក់លេខ១។ បុត្រសន្យាថានឹងព្យាយាមយកលេខ១ នៅឆ្នាំនេះទៀត ។ បុត្រសង្ឃឹមថាទ្រង់នឹងប្រទានរង្វាន់ដល់បុត្រជាមិនខាន។
តាមរយៈចុតហ្មាយនេះដែរ ទូលបង្គំសូមផ្ញើសេចក្តីនឹករឭកសាកសួរសុខទុក្ខចំពោះព្រះរាជវង្សានុវង្សទាំងអស់ពីចម្ងាយផង ។ បុត្រសង្ឃឹម ទ្រង់នឹងបានសុខមានព្រះសុខភាពបរិបូណ៌គ្រប់ៗអង្គ។
ដោយសារពេលវេលាមិនអនុគ្រោះ ទូលបង្គំសូមក្រាបថ្វាយបង្គំលាព្រះមាតាព្រះបិតាជាទីសក្ការៈដ៏លើសលប់ត្រឹមនេះចុះ ។ ជាទីបញ្ចប់ ទូលបង្គំសូមបួងសួងដល់ទេវតាទាំងឡាយទាំងពួង តាមជួយថែរក្សាព្រះអង្គឱ្យជួបតែសេចក្តីសុខចម្រើនគ្រប់ប្រការមានព្រះសុខភាពបរិបូណ៌ព្រះជន្មាយុយឺនយូរ កុំបីខាន។
ពីបុត្រ
