ទំនាស់តែងកើតឡើងជាញឹកញយទាំងនៅក្នុងសង្គមតិរច្ឆាន និងនៅក្នុងសង្គមមនុស្ស។ ជម្លោះរវាងពួកតិរច្ឆានមិនបង្កឱ្យមានមហន្តរាយធ្ងន់ធ្ងរដល់ពួកវាទេ ព្រោះពួកតិរច្ឆានប្រាថ្នាចង់បានតែមួយគេ និងទីស្នាក់តែមួយរយៈប៉ុណ្ណោះ។ ហើយពួកវាមិនមានគំនុំចំពោះគ្នាវា ព្រមទាំងមិនតាមយាយីព្យាបាទគ្នាទៀតផង។ ឯមនុស្សវិញ បើកាលណាគេឈ្លោះគ្នាហើយ គេតែងមានគំនុំចងអាឃាតឆ្លៀតរកឧបាយបំផ្លិចបំផ្លាញគ្នា មិនងាយនឹងបញ្ចប់ឡើយ។ ទំនាស់មានតាំងពីជម្លោះរវាងបុគ្គលនិងបុគ្គល រហូតដល់ជម្លោះរវាងក្រុម និងក្រុម ប្រទេស និងប្រទេស។ ជាទូទៅទំនាស់កើតឡើងពីមូលហេតុតូចតាច តែបើគូបដិបក្ខមិនដោះស្រាយ ឬដោះស្រាយមិនបានល្អពីដំបូងទេ វានឹងអាចរីករាលដាលក្លាយជាទំនាស់ធំ។
ទំនាស់មិនលើកមុខលើកមាត់មនុស្សឡើយ។ វាតែងតែធ្វើឱ្យមនុស្ស និងសហគមន៍បាត់ ទ្រព្យសម្បត្តិ កិត្តិយស កេរ្តិ៍ឈ្មោះ សាមគ្គីភាព និងពេលវេលាហើយជួនកាលបាត់បង់ទាំងអាយុជីវិតទៀតផង។ ចូរអ្នកទាំងឡាយចៀសចេញឱ្យឆ្ងាយពីទំនាស់ដើម្បីឱ្យជីវិតអ្នកមានភាពស្រស់បំព្រង ស្ថិតនៅក្នុងសេចក្តីស្ងប់និងថ្លៃថ្នូរ។ បើអ្នកជួបប្រទះទំនាស់ចូរអ្នកតាំងស្មារតីឱ្យនឹងនរប្រកាន់ខន្តីឱ្យខ្ជាប់ហើយរិះរកវិធីយ៉ាងណាដើម្បីដោះស្រាយទំនាស់ដោយសន្តិវិធី។
