- កេរដំណែល (ន) ដំណែល
ជាសម្បាច់របស់ដូនតា ឬមាតាបិតាជំនាន់ដើម។
- ពិសិដ្ឋ (គុ) ដែលល្អក្រៃលែង
ដែលប្រសើរខ្ពង់ខ្ពស់ថ្លៃថ្លាបំផុត។
- អនេក (គុ) ដែលច្រើនលើសលប់ក្រៃលែងឥតគណនា ។
- បុរី (ន)
ក្រុង រដ្ឋមណ្ឌល ។
- មច្ឆ (ន) ត្រី។
- គិរី (ន) ភ្នំ(បព្វតា)។
- ម្រឹគីម្រឹគា (គុ)
ពួកសត្វចតុប្បាទព្រៃញីឈ្មោលមាន ខ្លា ឈ្លូស ប្រើស។ល។
- ពុទ្ធសាសនិក (ន) អ្នកកាន់ព្រះពុទ្ធសាសនា ។
- រចនា (កិ) លម្អ
តុបតែងលម្អឱ្យល្អ ។
កម្ពុជា ជាប្រទេសកំណើតរបស់យើងគឺជាទឹកដីកេរដំណែលដ៏ពិសិដ្ឋ នៃដូនតាដែលជាមហាបុរសជាតិយើងបានខិតខំការពារ និងថែរក្សាទុកឱ្យកូនខ្មែរគ្រប់ៗរូប។ កម្ពុជាមាតុភូមិយើងជាទឹកដី សម្បូរបែប។ ប្រាសាទបុរាណដ៏ច្រើនអនេក បានក្លាយជាស្ថានីយប្រវត្តិសាស្រ្ត និងជាបុរីទេសចរណ៍ដ៏ល្បីល្បាញ ហើយត្រូវបានប្រសិទ្ធិនាមថា “កម្ពុជាព្រះរាជាណាចក្រអច្ឆរិយៈ” ។ បឹងទន្លេសាប ដ៏ធំល្វឹងល្វើយមានត្រីច្រើនជាងគេបំផុតក្នុងចំណោមបឹងក្នុងលោកទាំងប្រាំ។ វត្តអារាមដែលជាដួងព្រលឹងនៃពុទ្ធសាសនិកខ្មែរគ្រប់រូបមានស្ទើរគ្រប់ភូមិស្ថាន។ វត្តអារាមនីមួយៗតែងមានព្រះវិហារដ៏ល្អ និងធំស្កឹមស្កៃ ដែលមានរូបចម្លាក់ក្បាច់រចនាតាមសសរ មាត់ទ្វាបង្អួច និងតាមជញ្ជាំងគួរឱ្យគយគន់។ល។
យើងសូមទទួលយកមរតកដ៏ឧត្តុង្គឧត្តមនេះដោយទឹកចិត្តស្ងើចសរសើរ និងគោរពដោយស្មោះហើយ សូមប្តេជ្ញាចិត្តដើរតាមគំរូវីរភាពរបស់លោក និងបន្តកសាងថ្មីៗសម្រាប់ជាមរតកដល់អ្នកជំនាន់ក្រោយផងដែរ។ ទឹកចិត្តស្នេហារបស់យើងចំពោះមាតុភូមិ ពុំអាចមានឥទ្ធិពលអ្វីមកធ្វើឱ្យរង្គោះរង្គើបានឡើយ។
