ការភ្ញាក់រឭក គឺមានន័យថាគឺការនឹកឃើញសេចក្តីខុសត្រូវជារឿយៗ មិនភ្លេច ការដឹងថាខុស ឬត្រូវ។
- វក់វី (កិ.) វិលចុះ
វិលឡើងដដែលៗ ដូចគេវី។
- ធុរៈ (ន.) រវល់ ដំណើរជំពាក់ ដោយកិច្ចនីមួយៗ។
- ទើសទាល់ (កិ.) ទើសផង ទាស់ផង
គឺទើសដំណើរទាស់ទំនងដោយស្គាល់យោគយល់គ្នាជាដើម។
- សិ្នទ្ធស្នាល (គុ.) ដែលជាទីស្រឡាញ់
ជាទីពេញចិត្ត ជិតដិតនឹងគ្នាឥតរង្គៀស។
- រំលោភ (កិ.) បំពានដោយសេចក្តីលោភ បំពានអំណាច
ប្រព្រឹត្តល្មើ។
- ឱកាស (ន.) វេលា ពេលទំនេរ
ពេលស្រួលការយល់ព្រមតាម ទីទំនេរចន្លោះ។
ទិដ្ឋភាពទូទៅ
អត្ថបទភ្ញាក់រឭក ដកស្រង់ចេញពីរឿង “ស៊ឹមអ្នកបើកឡាន” ។
- ប្រភពរឿង៖ ប្រទេសកម្ពុជា។
- ប្រភេទ៖ អក្សរសិល្ប៍ទំនើបបែបប្រលោមលោក។
- អ្នកនិពន្ធ៖ អ៊ឹម ថុក
- កាលបរិច្ឆេទនិពន្ធ៖ ឆ្នាំ ១៩៥៦-១៩៥៩
- សង្គមបរិយាកាស៖ ដំណើរឿងបានព្រឹត្តទៅនៅសម័យអាណានិគមនិយមបារាំង ។
ស៊ឹមជាមនុស្សដែលឧស្សាហ៍ព្យាយាម
ខិតខំរៀនសូត្រទើបធ្វើឱ្យគាត់មានចំណេះដឹងអាចយកឈ្នះចិត្តរបស់ចៅហ្វាយរបស់ខ្លួនបាន។
គាត់បានណែនាំពូសនឱ្យខំអានសៀវភៅឱ្យបានច្រើន ទើបមានចំណេះដឹងអាចជួយខ្លួនឯងបាន។ អ្នកនិពន្ធបានបញ្ចប់រឿងត្រង់វគ្គដកស្រង់នេះ
ដោយក្តីសង្ឃឹម ដោយផ្តល់ភាពកក់ក្តៅដល់តួអង្គ
និងអ្នកសិក្សាព្រោះនៅចុងបញ្ចប់នៃវគ្គដកស្រង់នេះ ស៊ឹមបាននិយាយរៀបរាប់
និងពន្យល់ប្រាប់ពូសនឱ្យយល់ច្បាស់ អំពីទឹកចិត្តចៅហ្វាយនាយ ការស្រឡាញ់សិទ្ធិសេរីភាព
ចំណេះវិជ្ជា ផ្លាស់ប្តូរការរំលោភបំពាន ។
អត្ថបទនេះមានតម្លៃអប់រំយ៉ាងជ្រាលជ្រៅចំពោះសង្គម
ពិសេសកម្មករ ។ អ្នកនិពន្ធចង់បង្ហាញ ឱ្យឃើញថាទោះបីជាកម្មករបើកឡានអ្វីក៏ដោយ
ក៏ត្រូវតែចេះស្រឡាញ់ជីវិត ការពារអាយុជីវិត ដោយការចេះដឹងតាមរយៈការអានសៀនភៅ។
ការអានមានតម្លៃចំពោះ
មនុស្សធ្វើឱ្យមនុស្សមិនត្រឹមតែដឹងរឿងរ៉ាវ ហេតុការណ៍ ឬព្រឹត្តការណ៍ផ្សេងៗ នោះទេ
ប៉ុន្តែវាថែមទាំងដុសខាត់នូវគំនិតបញ្ញាស្មារតីឱ្យកាន់តែភ្លឺស្វាង
ឱ្យមនុស្សខ្លះមានការភ្ញាក់រឭក។ ងាកមករកទង្វើត្រឹមត្រូវសមហេតុផល
ព្រោះចំណេះដឹងទូលំទូលាយ នាំមនុស្សទៅផ្លូវត្រូវ និងទៅរកសេចក្តីសុខ។
