ពាក្យថា “វិជ្ជាជាទ្រព្យ” មានន័យថា មានចំណេះ ការចេះដឹង ក៏ដូចជាការដែលយើងមានទ្រព្យនៅក្នុងខ្លួនដូច្នោះដែរ ព្រោះនៅពេលយើងយកចំណេះទៅប្រើប្រាស់យើងនឹងបានមកវិញនូវមាសប្រាក់ លុយ ប្រើច្រើនចម្រើនកាន់តែខ្លាំងដែលមនុស្សគ្រប់គ្នា ខិតខំចាប់យកមកដាក់ខ្លួន។
- ទ្រព្យ (ន.) វត្ថុ ធនធាន សម្បត្តិ ។
- ឥតខ្ចោះ (គុ.) ដែលឥតមានទាស់ឆ្គងត្រង់ណា។
- ខ្សោះ (គុ.) ដែលស្ងួតសោះ ផ្អោះឥតមានរសជាតិ ។
- ឃ្មាតខ្មី (កិ.) ខំប្រឹង សង្វាតខ្លាំង ឃ្មាតខ្មីធ្វើការ ។
- ឧបសគ្គ (ន.) ដំណើររាំងស្ទះ គ្រឿងរារាំងជំទាស់។
- អប្រិយ (គុ.) ដែលពុំគួរស្រឡាញ់ ដែលមិនជាទីស្រឡាញ់ ។
ចំណេះវិជ្ជាជាទ្រព្យ សម្បត្តិល្អជាប់ ជាងទ្រព្យសម្ទាយ។
ទៅមកមិនបាច់វេចស្ពាយ ទោះនឹងចាយវាយ មិនងាយនឹងអស់។
ចាយច្រើនកើនច្រើនឥតខ្ចោះ មិនដែលរីងខ្សោះ មិនអស់ខាតខាន។
គ្មានចោរមកប្លន់ឆក់បាន ជាទ្រព្យរុញច្រាន ឱ្យបានពន្លឺ។
វិជ្ជាជាទ្រព្យរន្ទឺ នាំយើងឱ្យភ្លឺ ឈប់ឈឺងងឹត។
កូនអើយចូរនាងរិះគិត ចង់បាត់ងងឹត ប្រឹងគិតរៀនសូត្រ។
កើតមានធនធានរហូត មិនអាចរបូត បាត់បង់ឡើយណា ។
ចូរកូនខិតខំសិក្សា ឃ្មាតខ្មីឧស្សាហ៍ ជីវិតជោគជ័យ។
ឈ្នះគ្រប់ឧសគ្គចង្រៃ អវិជ្ជាអប្រិយ វិនាសសាបសូន្យ។
លើកស្ទួយជីវិតរលូន មាគ៌ាជាក្បូន ជីវិតពណ្ណរាយ។
កេរ្តិ៍ឈ្មោះរន្ទឺខ្ចរខ្ចាយ លេចឮសុះសាយ ល្បីពេញលោកកា។
ដោយក្តីសង្វាតឧស្សាហ៍ កើតពីកិច្ចការ បង្កើតទ្រព្យា។
រួចមានគំនិតការពារ គង់វង្សធានា និរន្តរៀងទៅ។
កាព្យនេះសូមផ្តាំកូនចៅ ទូន្មានទុកនៅ ត្រូវធ្វើឱ្យបាន។
កើតយសរបស់ផងមាន កើតសុខក្សេមក្សាន្ត បានជោគជយា។
