- សេចក្តីព្យាយាម (ន) សេចក្តីខិតខំប្រឹងប្រែង ខ្មីឃ្មាត ការប្រឹងប្រែង ការសង្វាត។
- ញ៉ាំង (កិ) ប្រើ បង្គាប់។
- សុចរិត (ន) សេចក្តីប្រព្រឹត្តល្អ ការប្រព្រឹត្តល្អ។
- ជំនាញ (គុ) ដែលជាញ គឺដែលវាងវៃ ប៉ិនប្រសប់ស្ទាត់ដែលចេះស្ទាត់ប្រាកដ.
ការមិនលះបង់សេចក្តីព្យាយាម គឺការមិនបោះបង់ ការមិនចាញ់ មិនរាថយ មិនបោះបង់ចោលសេចក្តីព្យាយាម គឺមិនបោះបង់ មិនចុះចាញ់ មិនរាថយ ចំពោះការខិតខំប្រឹងប្រែងក្នុងការធ្វើកិច្ចការអ្វីមួយដោយការតាំងចិត្ត អំណត់ អត់ធន់...។ ការព្យាយាមមានប្រយោជន៍ណាស់ដល់មនុស្ស ព្រោះវានាំមនុស្សទៅដល់គោលដៅ ឬសម្រេចបំណងដោយជោគជ័យដែលនាំមកនូវសេចក្តីសុខចម្រើនដល់មនុស្សគ្រប់គ្នា...។
សេចក្តីព្យាយាមជាលទ្ធផល នៃការខំប្រឹងប្រែង អាចបំពេញសេចក្តីត្រូវការរបស់មនុស្សគ្រប់រូប និងញ៉ាំងមនុស្សឱ្យមានទ្រព្យសម្បត្តិ កិត្តិយស កេរ្តិ៍ឈ្មោះ សេចក្តីសុខចម្រើន ដែលជាបំណងប្រាថ្នាដ៏សំខាន់របស់មនុស្ស ពោលគឺនាំមនុស្សទៅដល់ត្រើយសុភមង្គល ។ បុគ្គលណាដែលមានសេចក្តីព្យាយាមបុគ្គលនោះមានឈ្មោះថា ជាបុគ្គលដែលញ៉ាំង ទ្រព្យសម្បត្តិ កិត្តិយស កេរិ៍ឈ្មោះ សេចក្តីសុខ និងសុភមង្គល ឱ្យកើតមានឡើងដល់ខ្លួន ។ បុគ្គលណាដែលគ្មានសេចក្តីព្យាយាម បុគ្គលនោះមានឈ្មោះថា ជាបុគ្គលមិនបានញ៉ាំងទ្រព្យសម្បត្តិ កិត្តិយស កេរិ៍ឈ្មោះ សេចក្តីសុខ និងសុភមង្គលឱ្យកើតមានឡើងដល់ខ្លួននោះទេ ឬអាចចាត់ជាបុគ្គលមិនប្រសើរ។ បុគ្គលណាមានសេចក្តីព្យាយាម មានន័យថា មានទ្រព្យសម្បត្តិ កិត្តិយសកេរ្តិ៍ឈ្មោះ សេចក្តីសុខ និងសុភមង្គល ។ បុគ្គលណាគ្មានសេចក្តីព្យាយាមនោះមិនរាប់ថាជាបុគ្គលប្រសើរឡើយ។
ការងារគ្រប់ប្រភេទ សុទ្ធតែមានតម្លៃ ។ គ្មាននរណាម្នាក់រស់ដោយគ្មានការងារនោះទេ ឱ្យតែការងារនោះជាការងារសុចរិត ។ មានការងារជាច្រើនកំពុងរង់ចាំមនុស្ស ឱ្យតែមនុស្សមានសេចក្តីព្យាយាម គួបផ្សំ និងសមត្ថភាព និងភាពឈ្លាសវៃប្រកបដោយស្មារតី តស៊ូ ព្យាយាម ជំនះរាល់ការលំបាក ខិតខំរៀនសូត្រ ធ្វើការនោះយើងនឹងបំពេញសេចក្តីត្រូវការគ្រប់យ៉ាង និងក្លាយជាមនុស្សមានប្រយោជន៍សម្រាប់ខ្លួនឯង គ្រួសារ និងសង្គមជាតិទាំងមូល។
