- លាចាកលោក (កិ) ស្លាប់។
- ការដ្ឋាន (ន) កន្លែងធ្វើការ ទីនៃការងារ។
- ភស្តុតាង (ន) របស់ជាតឹកតាង ជាគ្រឿងសម្គាល់ជាតំណាង។
- ទ្រលុកទ្រលន់ (គុ) ដែលធាត់សាច់ទន់
ដែលមើលឃើញបែបណែន។
- លទ្ធភាព (ន)
ភាពនៃអ្វីៗដែលបានសម្រេចហើយ។
ជីវិតគឺជាការតស៊ូ នេះជាសម្តីបងស្រីមេម៉ាយម្នាក់ក្នុងចំណោមជនមាតុភូមិនិវត្តន៍ដែលបានស្ម័គ្រចិត្តចូលមករួមរស់នៅក្នុងមាតុភូមិវិញ។ ប្តីបងស្រីបានលាចាកលោកនេះបាត់ទៅហើយដោយបន្សល់ទុកកូនប្រាំនាក់ឱ្យរស់នៅកំព្រាឪពុកជួបនឹងការលំបាកលំបិនក្រៃពេកជាមួយបងស្រី។
គួរឱ្យសង្វេគពន់ពេក! ពេលខ្លះបងស្រីត្រូវទៅធ្វើការនៅកន្លែងឆ្ងាយដើម្បីយកអង្ករមកផ្គត់ផ្គង់ជីវភាពគ្រួសារ ហើយបងស្រីបានទុកកូនតូចៗទាំង៣នាក់ឱ្យនៅចាំផ្ទះ។ថ្វីត្បិតតែបងស្រីជាស្រ្តីមេម៉ាយក្រីក្រ ហើយមានកូន៥នាក់ តែបងស្រីមិនផ្តេកផ្តួលទៅតាមព្រេងវាសនាទេ។ គាត់ខិតខំធ្វើការកាប់គាស់ដាំដុះដំណាំគ្រប់បែបយ៉ាងមិនទំនេរដៃឡើយ។ ដូចត្រង់សម្តីគាត់និយាយថា “ទោះបីយ៉ាងណាក៏ដោយ ក៏ខ្ញុំមិនដើរសុំទានគេដែរ ខ្ញុំសុខចិត្តប្រើកម្លាំងដ៏ស្តួចស្តើងរបស់ខ្ញុំកាប់គាស់ដាំដំណាំយកមកចិញ្ចឹមកូនវិញ” ។
គាត់ជាមនុស្សឱ្យតម្លៃលើការងារណាស់ មិនសុខចិត្តដើរសុំទានគេទេ។ សកម្មភាពបងស្រី ចាត់ទុកជាគំរូដ៏ល្អមួយសម្រាប់មនុស្សទូទៅអនុវត្តតាម។
